Abanyarwanda ntibahiriwe n’agace ka kane ka Tour du Cameroun

Yanditswe na Eric Tony Ukurikiyimfura
Kuya 5 Kamena 2019 saa 07:30
Yasuwe :
0 0

Umunya-Maroc, Bdadou Youssef, ni we wegukanye agace ka kane ka Tour de Cameroun mu gihe umunya-Cameroun, Kamzong Clovis, yashyizemo ikinyuranyo kinini hagati ye n’abamukurikiye ku rutonde rusange, aho kuri ubu arusha umunota umwe n’amasegonda 13 umunyarwanda uza hafi, Uwizeyimana Bonaventure.

Iri siganwa rizenguruka Cameroun riri ku rwego rwa 2.2 ryakomeje kuri uyu wa Kabiri, aho abasiganwa bahagurukiye i Pouma basoreza i Kribi ku ntera y’ibilometero 155.8.

Umunya-Maroc, Bdadou Youssef, ni we wabaye uwa mbere kuri iyi ntera nyuma yo gukoresha amasaha atatu, iminota 45 n’amasegonda 43, akurikirwa n’umunya-Slovakia, Mahdar Martin ndetse n’umunya-Cameroun, Kamzong Clovis banganyije ibihe, aho aba batatu ba mbere bashyizemo ikinyuranyo cy’amasegonda 47 ku babakurikiye.

Umunyarwanda waje hafi muri aka gace ka kane ni Uwizeyimana Bonaventure wabaye uwa 13, asizwe amasegonda 48 n’aba mbere mu gihe Isiaka Cissé wari wegukanye agace ka gatatu, yabaye uwa 16 anganya ibihe na Bonaventure.

Nzafashwanayo Jean Claude, Manizabayo Eric, Ruberwa Jean Damascène na Byukusenge Patrick baje mu itsinda rimwe na Uwizeyimana Bonaventure, na bo basizwe amasegonda 48 mu gihe Mugisha Moïse yabaye uwa 39 asizwe umunota umwe n’amasegonda 22.

Ku rutonde rusange, umunya-Cameroun, Kamzong Clovis Bassolo wanegukanye agace ka kabiri k’iri siganwa riri kubera mu gihugu cye, ni we uyoboye, aho amaze gukoresha amasaha 14, iminota 40 n’amasegonda 38, arusha Youssef Bdadou wa kabiri amasegonda 11 mu gihe Isiaka Cissé wari wafashe umwambaro w’umuhondo ku wa Mbere kuri ubu arushwa amasegonda 55.

Umunyarwanda Uwizeyimana Bonaventure wanegukanye Tour du Cameroun mu mwaka ushize, ari ku mwanya wa munani ku rutonde rusange, arushwa umunota umwe umwe n’amasegonda 13 n’uwa mbere mu gihe Byukusenge Patrick ari ku mwanya wa 15 we arushwa umunota umwe n’amasegonda 59.

Kuri uyu wa Gatatu abasiganwa barahaguruka i Kribi berekeza i Douala mu gace ka gatanu k’isiganwa, aho baza gusiganwa ku ntera y’ibilometero 176, akaba ari nako gace karekare muri Tour du Cameroun y’uyu mwaka iri kuba ku nshuro ya 16.

Umunya-Maroc, Bdadou Youssef, ni we wegukanye agace ka kane ka Tour de Cameroun

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza