Abanyarwanda bagowe n’agace ka gatatu ka La Tropicale Amissa Bongo yahiriye Abanya-Erythrée

Yanditswe na Eric Tony Ukurikiyimfura
Kuya 22 Mutarama 2020 saa 06:24
Yasuwe :
0 0

Isiganwa rizenguruka Gabon ryitiriwe Albertine Amissa Bongo, La Tropicale Amissa Bongo, rikomeje kugora Abanyarwanda mu gihe Abanya-Erythrée bakomeje kwigwizaho intsinzi.

Kuri uyu wa Gatatu nibwo hakinwe agace ka gatatu k’isiganwa ry’uyu mwaka riri kuba ku nshuro ya 15 kuva rigiye ku rwego rwa 2.1.

Hari hitezwe kureba niba iyi ntera yongera kwegukanwa n’Umunyarwanda nk’uko Areruya Joseph yabikoze mu 2018 ubwo yatwaraga iri siganwa.

Abasiganwa 86 bahagurutse i Mitzic berekeza mu gace ka Ndjole, ku ntera y’ibilometero 186, yegukanywe n’Umunya-Erythrée Hailu Biniam ukinira Nippo Delko Provence yo mu Bufaransa, akoresheje amasaha ane, iminota 16 n’amasegonda 28.

Yakurikiwe n’Umufaransa Jordan Levasseur ukinira Natura4Ever Roubaix, amusize amasegonda abiri mu gihe undi Mufaransa, Morin Emmanuel ukinira Cofidis Solutions Crédits yo mu Bufaransa, yabaye uwa gatatu asizwe amasegonda ane, kimwe na mugenzi we w’Umutaliyani Viviani Attilio wegukanye agace ka mbere.

Umunyarwanda waje hafi muri aka gace ka gatatu ni Uhiriwe Byiza Renus wabaye uwa 17, arushwa amasegonda 19 n’uwa mbere ndetse yari mu gikundi kimwe na Munyaneza Didier wabaye uwa 22.

Nzafashwanayo Jean Claude yabaye uwa 28 yasizwe amasegonda 32 n’uwa mbere mu gihe Mugisha Moïse yasoreje ku mwanya wa 36, yasizwe amasegonda 45.

Nyuma y’uduce dutatu tumaze gukinwa, urutonde rusange ruyobowe na Natnael Tesfazion w’ikipe y’Igihugu ya Erythrée, umaze gukoresha amasaha 10, iminota 20 n’amasegonda 56, arusha amasegonda ane, Umufaransa Jordan Levasseur ukinira Natura4Ever–Roubaix–Lille Métropole.

Umunyarwanda uza hafi ku rutonde rusange ni Munyaneza Didier ‘Mbappé’ urushwa amasegonda 30 na Tesfazion mu gihe Nzafashwanayo Jean Claude wa 15 asigwa amasegonda 43 n’uyu Munya-Eythrée wa mbere.

La Tropicale Amissa Bongo izasozwa ku Cyumweru, irakomeza kuri uyu wa Kane hakinwa agace ka kane, aho abasiganwa bazahagurukira Lambarene berekeza mu gace ka Mouila, ku ntera y’ibilometero 180.

Umunya-Erythrée Hailu Biniam ukinira Nippo Delko Provence yo mu Bufaransa ni we wegukanye agace ka gatatu ka La Tropicale Amissa Bongo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .