Abakobwa bahuguwe ku bijyanye no gukanika amagare yifashishwa muri uyu mukino

Yanditswe na N.Kubwimana Janvière
Kuya 14 Ugushyingo 2020 saa 11:19
Yasuwe :
0 0

Abakobwa n’abagore batangiye guhabwa amahugurwa y’ibanze ku bijyanye no gukanika amagare yifashishwa muri uyu mukino, mu rwego rwo kubumvisha ko n’ubwo bimenyerewe ko ari akazi gakunze gukorwa n’abahungu, nabo bamenye ko babishobora.

Ni amahugurwa y’iminsi itanu, yitabiriwe n’abagore 13, aho yasojwe ku wa 13 Ugushyingo 2020, abayitabiriye bagasubira mu makipe y’umukino w’amagare baturutsemo hirya no hino mu gihugu kugira ngo bazakomeze gukoresha ubumenyi bahawe babusangiza bagenzi babo.

Umuyobozi w’Ishyirahamwe ry’Umukino w’Amagare mu Rwanda, Murenzi Abdallah, wasuye itsinda ry’aba bakobwa, yavuze ko aya mahugurwa agamije kurema icyizere n’ ubushobozi mu bakobwa n’abagore ko nabo babishoboye, yaba kwinjira mu mukino w’amagare, kuyakanika, kuyatoza n’ibindi.

Yavuze ko kandi amahugurwa bahawe ari ay’ibanze mu kumenya iby’ibanze mu gukanika igare no kumenya ibice birigize ndetse bakanamenya uko mu gihe ryagize ikibazo kidakabije bamenya uko babyitwaramo.

Yabasabye ko bagomba gusigasira ubumenyi bahawe, banabwongera bifashishije ikoranabuhanga ritandukanye, ndetse bakanagerageza kubusangiza bagenzi babo basanzwe babana mu makipe, anabizeza ko bazakomeza guhabwa ubundi bumenyi bwisumbuyeho kugeza ubwo bazagera ku rwego rwo kwinjira mu bakanishi ba Tour du Rwanda.

Ati “Amahugurwa muhawe ni ay’ibanze, azabafasha kumenya bimwe mu bice bigize igare n’uko warikanika ryagize ikibazo gito nko gutoboka amapine, gukora amahembe n’utundi, ikindi mufite telefone zifite ikoranabuhanga, mujye kuri za Youtube murebe ngo igare ryapfuye rikorwa gute, umenye byinshi kuburyo muzava ku rwego muriho mukajya ku rwisumbuyeho, aho gukoresha izo telefone mu bitagira icyo bibasigira.”

“Ikindi ubu bumenyi muhawe mugende mubuhereho mubusangiza abo muzasanga mu makarabu mukoreramo, kuko umubare w’abo dukeneye uracyari muto cyane ugereranyije n’abo dufite, natwe tubemereye ko tuzakomeza kubategurira andi mahugurwa abongerera ubumenyi bwisumbuyeho, bubashyira mu cyiciro runaka, kuburyo nibura mu 2022 hari bamwe muri mwe tuzaba dufite muri Tour du Rwanda ari abakanishi bujuje ibisabwa.”

Umulisa Adelphine ni umwe mu bakobwa bitabiriye aya mahugurwa aturutse mu Karere ka Rwanagana, mu ikipe ya Les Amies Sportif, akaba yari anahagarariye iri tsinda ryahuguwe. Yavuze ko we na bagenzi be bungukiye byinshi muri aya mahugurwa, ndetse kuri bo nk’abakobwa bikaba byabateye ishema kuko Igihugu gikomeje kubabonamo ubushobozi bwo gukora nk’ibya basaza babo.

Ati “Twarishimye cyane kubw’aya mahugurwa, mbere nza hano nabonaga iri gare nk’irya Siporo ariko ibya tekinike nta bumenyi twabigiragaho, ariko mu minsi yose tumaze aha twamenye ibintu by’ibanze mu gukanika igare, tumenya ibice byaryo mu cyongereza n’uko wabikora mu gihe byagize ikibazo cyoroheje.”

“Ibi byaturemyemo icyizere ko natwe bakomeje kutubonamo ubushobozi bwo gukora nk’ibya basaza bacu, turabasaba kutuba hafi batwongerera ubumenyi kugeza ubwo tuzagera ku rwego mpuzamahanga mu gukanika igare rya Siporo.”

Kugeza ubu mu Rwanda habarurwa amakipe ane gusa y’abakobwa mu gihe amakipe y’abagabo agera ku 10.

Gusa, muri gahunda Ishyirahamwe ry’Umukino w’Amagare mu Rwanda rifite harimo gusaba aya makipe y’abagabo ko buri kipe izajya igira icyiciro cy’abakobwa kugira ngo na bo bagire uruhare rukomeye mu gukunda no guteza imbere uyu mukino.

Abagore 13 basoje amahugurwa ku bijyanye no gukanika amagare bafata ifoto y'urwibutso
Perezida wa FERWACY, Murenzi Abdallah, ashyikiriza impamyabushobozi abahuguwe
Abakobwa bahuguwe basabwe gukomeza kwiyungura ubumenyi no gusangiza abandi ibyo bize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .