Yevgeniy Fedorov yegukanye Agace ka Mbere ka Tour du Rwanda 2020 (Amafoto)

Yanditswe na Eric Tony Ukurikiyimfura, Ishimwe Israel
Kuya 23 Gashyantare 2020 saa 10:34
Yasuwe :
0 0

Umunya-Kazakhstan Yevgeniy Fedorov w’imyaka 20, ukinira Vino- Astana Motors yo muri Kazakhstan, yegukanye agace ka mbere ka Tour du Rwanda 2020 kahagurukiye i Kigali kerekeza i Rwamagana, kagasorezwa Kimironko, ni nyuma yo gukoresha amasaha abiri, iminota 44 n’amasegonda 59.

Tour du Rwanda y’uyu mwaka iri kuba ku nshuro ya 12, nicyo gikorwa cy’imikino cyonyine kigera mu ntara zose z’u Rwanda kandi gikurikiranwa n’Abanyarwanda benshi badasabwe ikiguzi na gito, muri make ni ku buntu.

Ni inshuro ya kabiri iri siganwa riri kuba riri ku cyiciro cya 2.1 nyuma y’iry’umwaka ushize ryegukanwe n’Umunya-Erythrée Merhawi Kudus wa Astana, ariko akaba atazarikina uyu mwaka.

Tour du Rwanda yatangiye gukinwa mu 1988, yabaye mpuzamahanga kuva mu 2009, aho yashyizwe ku cyiciro cya 2.2 kugeza mu 2018.

Itandukaniro ry’ibi byiciro byombi riba ko mu isiganwa riri kuri 2.1, amakipe yemerewe gutumirwamo arimo ayo mu cyiciro cya mbere ‘World Tour’ atarenze 50% y’amakipe yose agize isiganwa, n’amakipe yo mu cyiciro cya kabiri ‘Pro-Continental teams’, naho isiganwa riri ku cyiciro cya 2.2 ryo amakipe yemerewe gutumirwa ni ayo mu cyiciro cya gatatu gusa bita ‘Continental teams’ n’amakipe y’ibihugu yo ku mugabane irushanwa ryabereyeho.

UKO ISIGANWA RYAGENZE

  • Video: Reba uko agace ka mbere kagenze

- Federov yihariye ibihembo by’Agace ka Mbere ka Tour du Rwanda 2020

Fedorov yahawe umwambaro w’uwatwaye etape watanzwe na SKOL. Yanabaye umukinnyi mwiza uzamuka, ahabwa umwambaro watanzwe na Cogebanque.

Uyu munya-Kazakhistan yahawe kandi umwambaro w’umuhondo uhabwa umukinnyi wa mbere ku rutonde rusange, anatwara igihembo cy’umukinnyi uvuduka cyatanzwe na SP. Yabaye kandi umukinnyi muto, ahabwa umwambaro watanzwe na Prime Insurance.

Uhiriwe Byiza Renus yambitswe umwenda w’umukinnyi uhatana kurusha abandi watanzwe na Visit Rwanda.

Byukusenge Patrick yabaye Umunyarwanda mwiza muri aka gace, ahabwa umwambaro watanzwe na Gorilla Games.

Umukinnyi mwiza w’Umunyafurika wahembwe na RwandAir ni Umunya-Eritrea Henock Mulueberhan.

Ikipe nziza yabaye iya Eritrea, ihabwa umwambaro na Inyange.

Uhiriwe Byiza Renus yahembwe na Visit Rwanda nk'umukinnyi wahatanye kurusha abandi
Cogebanque yahembye Yevgeniy Fedorov nk'umukinnyi wahize abandi mu manota yo kuzamuka
Yevgeniy Fedorov yambaye umwambaro w'umuhondo ku munsi wa mbere wa Tour du Rwanda 2020

13:25: Fedorov yegukanye Agace ka mbere ka Tour du Rwanda 2020

Yevgeniy Fedorov w’imyaka 20 ukinira Vino-Astana Motors ni we wegukanye agace ka mbere ka Tour du Rwanda 2020 gasorejwe Kimironko.

Ni ku nshuro ye ya mbere umukinnyi wo muri Kazakhstan yegukanye agace muri Tour du Rwanda.

Umunyarwanda uri hafi ni Byukusenge Patrick wa Benediction Ignite uri ku mwanya wa gatanu. Areruya ni uwa munani mu gihe Mugisha Moise yabaye uwa 13.

13:20: Hasigaye ibilometero bitanu gusa

Umunya-Kazakhistan Federov yinjiye mu bilometero bitanu bya nyuma. Yasize Uhiriwe Byiza Renus n’abandi bamukurikiye umunota umwe n’amasegonda 22 mu gihe igikundi cyo cyasigaye umunota umwe n’amasegonda 58.

13:07: Mugisha Samuel ayoboye igikundi

Kapiteni wa Team Rwanda, Mugisha Samuel ni we uyoboye igikundi gikurikiye abakinnyi batatu bari imbere. Iki kirimo abandi bakinnyi babiri ba Benediction Ignite kirushwa iminota itatu n’amasegonda 30 na Federov uyoboye.

13:05: Federov ku isonga ry’isiganwa

Umurusiya Federov ni we uyoboye mu gihe yari ageze ahaza gusorezwa isiganwa Kimironko. Ahise akata ibumoso yerekeza i Masoro mu cyanya cy’inganda, aho agiye gukora intera y’ibilometero bigera kuri 12.

Akurikiwe na Uhiriwe Byiza Renus ariko harimo ikinyuranyo kigera hafi ku munota wose.

13:01: Abasiganwa bageze Kimironko

Mu gihe hasigaye ibilometero 13 ngo isiganwa rirangire. Federov wasize Renus na mugenzi we bageze i Kabuga, kuri ubu agiye kugera aho basoreza ahite akomeza i Masoro mu cyanya cy’inganda.

12:40: Isiganwa rigeze i Masaka

Abasiganwa bari kwinjira i Masaka. Uhiriwe Byiza Renus w’imyaka 19 ni we uyoboye isiganwa. Yevgniy wa Vino- Astana Motors afite imyaka 20 mu gihe Batmunkh wa Teerngganu afite imyaka 25.

12:30: Hamaze gukorwa ibilometero 80

Isiganwa rigeze i Kabuga. Abakinnyi bagiye gufata umuhanda w’amabuye muri aka gace. Kuri ubu hamaze gukorwa ibilometero 80 muri 114.4 biteganyijwe, abakinnyi bayoboye barusha igikundi kibakurikiye iminota itandatu n’amasegonda atanu.

Abatuye i Kabuga bishimiye kubona amagare aca mu gace batuyemo

12:20: Twinjiye mu bilometero 40 bya nyuma

Ibilometero bisigaye gukorwa ni 40 gusa. Umunya-Mongolier Maral-Erdene Batmunkh ni we uri imbere hamwe na Uhiriwe Byiza Renus wa Benediction Ignite ndetse n’Umusuwisi Fedorov wa Vino- Astana Motors. Aba uko ari batatu bashyizemo iminota itandatu n’amasegonda 30 hagati yabo n’igikundi kibakurikiye.

- Abanyarwanda bifitiye icyizere

U Rwanda ruhagarariwe n’amakipe atatu muri Tour du Rwanda arimo Team Rwanda, Benediction Ignite na SACA.

Kapiteni wa Team Rwanda, , Mugisha Samuel, mbere yo guhaguruka yavuze ko yifitiye icyizere nubwo iri siganwa rikomeye.

Yagize ati “Iyi tour irakomeye kurusha izo twagiye tubanza mbere, urabona ko turaza kuzamuka ahantu hakomeye cyane. Ntibimeze nk’umwaka washize, utitonze watakaza ibihe. Birasaba andi mayeri atoroshye yo kuba umuntu yabasha kuba mu b’imbere.’’

Mugisha yavuze ko nubwo aka gace gasorezwa ahantu hazamuka nk’umukinnyi uzamuka cyane agerageza kwitwara neza.

Ati “Nabyutse neza, mfite imbaraga, igisagaye ni mu muhanda.’’

Mugisha yatwaye Tour du Rwanda ya 2018, ni umwe mu bahabwa amahirwe yo kwitwara neza muri uyu mwaka.

Ati ‘‘Intego mfite ni ukongera gutsinda Tour du Rwanda ya 2020.’’

12:12: Uhiriwe Byiza Renus yegukanye kandi amanota y’agasozi ka kabiri

Umunyarwanda Uhiriwe Byiza Renus ukinira Benediction Ignite ni we wonggeye gutwara amanota y’akazamuko ka kabiri muri aka gace ka mbere ka Tour du Rwanda 2020. Akurikiwe na Fedorov Yevgeniy wa Vino- Astana Motors.

12:10: Igikundi kigabanyije ibihe

Ibihe bisigayemo hagati y’abakinnyi batatu bacitse abandi n’igikundi kibakurikiye, bisigaye ari iminota itandatu n’amasegonda 31, bivuye ku minota irindwi n’amasegonda15.

11:55: Ubutumwa bwa Mugisha Samuel

Mbere y’uko bahagaruka, Mugisha Samuel yabwiye IGIHE ko aka ari agace katoroshye bitewe n’imisozi ibiri irimo baza kuzamuka inshuro ebyiri, ariko nk’Abanyarwanda bafite icyizere ko bashobora kukegukana.

11:50: Abakinnyi bari imbere batangiye guhindukira

Fedorov kuri ubu ni we uri ku isonga aho ari kumwe na Batmunkh na Uhiriwe Byiza Renus barenze mu Mujyi wa Rwamagana, aho bari guhindukira bagaruka i Kigali.

11:40: Igikundi cyafashe Benyoucef

Kugeza ubu hamaze gukorwa isaha yose ndetse umuvuduko w’isiganwa ungana n’ibilometero 40.1/h. Igikundi cyamaze gufata Benyoucef mu gihe abayoboye isiganwa bashyizemo iminota irindwi.

11:30: Uhiriwe Byiza Renus yegukanye amanota y’agasozi ka mbere

Uhiriwe Byiza Renus wa Benediction Ignite ni we wegukanye amanota y’umusozi wa mbere wa Ntunga muri Rwamagana, aho akurikiwe na Fedorov wa Vino.

Benyoucef akomeje kuza mu bayoboye isiganwa, ahiga Renus na bagenzi bebashyizemo iminota itandatu n’amasegonda 55.

11:28: Iminota ikomeje kwiyongera

Abakinnyi bari imbere barimo na Uhiriwe Byiza Renus, bamaze gushyiramo iminota itandatu n’amasegonda 55. Igikundi kirimo abakinnyi benshi nacyo gikomeje kubakurikira.

Benyoucef yakurikiye abayoboye

Benyoucef wa GSP, yacitse bagenzi be ajya guhiga abakinnyi batatu bari imbere. Uyu yasize igikundi iminota ine n’amasegonda 40 mu gihe Byiza Renus na bagenzi be bo bashyizemo iminota itanu n’amasegonda 40.

11:20: Isiganwa rigeze mu bilometero 30

Abasiganwa bamaze gukora intera y’ibilometero 30. Byiza Renus na bagenzi be ni bo bakiyoboye ndetse igikundi kibakurikiye ntacyo kiragabanya ku bihe.

11:15: Abasiganwa binjiye muri Rwamagana

None aha nibwo abakinnyi binjiye mu Burasirazuba, mu Karere ka Rwamagana.

11:10: Abasiganwa bageze i Nyagasambu

Kuri ubu abakinnyi bageze i Nyagasambu. Uhiriwe Byiza Renus na bagenzi be bashyizemo iminota itatu n’amasegonda 20.

Igikundi cy’abakinnyi benshi bari kugendera hamwe na cyo kiri muri aka gace ka Nyagasambu.

Byiza Renus na bagenzi be bashyizemo iminota itatu

Uhiriwe Byiza Renus wa Benediction Ignite, Fedorov (Vino) na Batmunkh (Terengganu) bashyizemo iminota itatu basize igikundi cy’abakinnyi benshi babakurikiye.

11:00: Abanyarwanda bakereye kureba Tour du Rwanda

10:57: Umunyarwanda mu bari imbere

Uhiriwe Byiza Renus ni umwe mu bakinnyi kuri ubu bayoboye isiganwa, aho bashyizemo iminota ibiri n’amasegonda abiri.

Ari kumwe na Fedorov (Vino) na Batmunkh (Terengganu).

Abanyarwanda bafite icyizere

Abanyarwanda bagiye gukina iri rushanwa ndetse n’abandi bose babashyigikiye bafite icyizere ko rishobora kongera kwegukanwa n’Umunyarwanda nyuma y’uko Mugisha Samuel ariheruka mu 2018.

Uyu musore w’imyaka 22 hamwe na Aruya Joseph (2017) na Nsengimana Jean Bosco (2015) bose baritwaye, bari mu bakinnyi batanu bagize Team Rwanda.

Uhiriwe Byiza Renus, Mugisha Moise, Munyeza Didier bo muri Benediction Ignite na SACA na bo ni abakinnyi bashobora guhindura ibintu mu isiganwa.

Umutoza w Team Rwanda, Sterling Magnell

10:35: Hatangiye kubarwa ibihe

Abasiganwa bageze aho batangirira kubarirwa ibihe. Ni mu cyanya cy’inganda i Masoro aho n’ubundi baza kongera guca nyuma mu gusoza isiganwa.

10:30: Isiganwa riratangiye

Abakinnyi bahagarutse kuri Kigali Arena nyuma yo kwerekana amakipe agiye gukina iri rushanwa. Ni intera y’ibilometero 114.4 igiye gukorwa.

Minisitiri wa Siporo Munyangaju Aurore Mimosa ari kumwe na Murenzi Abdallah uyobora Ferwacy nibo batangije isiganwa.

Inzira z’Agace ka Mbere ka Tour du Rwanda 2020: Kigali- Rwamagana- Kigali

Agace ka mbere ka Tour du Rwanda 2020 kahagurukiye kuri Kigali Arena mu gihe isiganwa ryasorejwe Kimironko.

Abakinnyi 80 bitabiriye isiganwa ry’uyu mwaka bavuye kuri Kigali Arena bazamuka kuri KIE- kwa Rwahama, Umushumba Mwiza – Inyange- Masaka Hospital- Kabuga – Rwamagana- Nyagasambu – Kabuga- Centre des jeunes - Riviera - 19 - Inyange - 12 - Kigali Parents – Kimironko.

Abakinnyi bageze aho basoreje isiganwa bakata iburyo berekeza mu cyanya cy’inganda i Masoro, bagaruke banyuze kuri 12, bongere guca kuri Kigali Parents ubundi basoze isiganwa.

Agace ka mbere ka Tour du Rwanda 2020 karimo imisozi ibiri itangirwaho amanota y’abahatanira umwenda w’abarusha abandi kuzamuka imisozi, inshuro ebyiri.

Ni umusozi wa Ntunga wo mu Karere ka Rwamagana ndetse n’uwo kuri Kigali Parents School i Kigali.

Abasiganwa bajya i Rwamagana baza kuzamuka bagera ku gasongero kawo bagahabwa amanota, bakaza kongera kuwuzamuka bava i Rwamagana bagaruka i Kigali bakongerwa andi manota.

Ibi ni ko biri bugende bageze kuri Kigali Parents School bazamuka inshuro ebyiri zirimo iya nyuma bakora bavuye i Masoro mu cyanya cy’inganda.

Umukinnyi witwara neza muri iyi misozi, yahembwe umwenda w’urusha abandi kuzamuka, ‘meilleur grimpeur’, utangwa na Cogebanque.

Cogebanque nk'umwe mu baterankunga b'imena ba Tour du Rwanda, yabukereye
Ikipe y'u Rwanda yiteguye isiganwa
Abakinnyi babanje gusinya

Amafoto: Niyonzima Moïse

Video: Mugwiza Olivier


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza