Iri siganwa ryabaye kuri iki Cyumweru, tariki ya 27 Mata 2025, ryakinwe mu byiciro birimo abatarabigize umwuga, ingimbi n’abangavu ndetse n’abakuru mu bagabo n’abagore.

Mu bagabo basiganwe intera y’ibilometero 113 byatangiriye kuri Canal Olympia ku i Rebero, bagakatira i Nemba mbere yo gusubira ku i Rebero, byarangiye hatsinze Ikundabayo Roben wa Muhazi Cycling Generation.

Mugisha Moïse wa Benediction Club na Nkundabera Eric wa Les Amis sportifs bigeze gusiga igikundi iminota itatu n’amasegonda 40 mu rugendo rusubira ku i Rebero, ariko bombi bagorwa no kuhagera bayoboye.

Ikundabayo yegukanye isiganwa akoresheje amasaha abiri, iminota 44 n’amaseginda 46, akurikirwa na Nsengiyumva Shemu wa Java-InovoTec yasize amasegonda atatu kimwe na Masengesho Vainqueur wa Benediction.

Ni mu gihe Mugisha Moïse yasoreje ku mwanya wa karindwi yasizwe amasegonda 24, Munyaneza Didier aba uwa cyenda naho Nkundabera Eric aba uwa 14 yasizwe iminota ibiri. Abakinnyi 36 muri 48 bakinnye iki cyiciro ni bo basoje isiganwa.

Mu bagore bakinnye intera y’ibilometero 71,8 mu nzira Canal Olympia - Nyamata - Canal Olympia, hatsinze Nzayisenga Valentine wa Benediction Club akoresheje amasaha abiri n’iminota ibiri, asiga Ntakirutimana Marthe na Iragena Charlotte ba Ndabaga Women Team iminota 13 n’iminota 23 uko bakurikirana.

Mu ngimbi zakinnye intera y’ibilometero 80, bageze ku Gahembe, hatsinze Tuyipfukamire Jean Faustin wa Muhazi Cycling Generation akoresheje amasaha abiri n’amasegonda 12, asiga amasegonda atandatu Ishimwe Brian wa Ndabaga CT na Tuyipfukamire Aphrodice wa Benediction.

Ni mu gihe Masengesho Yvonne ukinira Ndabaga yabaye uwa mbere mu bangavu na bo bakinnye ibilometero 71,8, akurikirwa na Uwiringiyimana Liliane wa Friend of Nature na Ishimwe Cynthia wa Ndabaga WCT.

Isiganwa ry’abatarabigize umwuga, ryakinwe ku ntera y’ibilometero 71,8, ryegukanywe na Niyireba Innocent wa Rwanda Beyond, akurikirwa na Hakizimana Olivier na Roman Meszaros.

Kugeza ubu, abanyamuryango barindwi ba FERWACY barimo Sakumi Anselme wari Visi Perezida wayo, ni bo bamaze kumenyekana ko bishwe muri Jenoside yakorewe Abatutsi mu 1994.

Mbere y’iri siganwa ryitabiriwe n’abakinnyi 142 mu byiciro byose, abaryitabiriye basuye Urwibutso rwa Jenoside rwa Nyanza ya Kicukiro bunamira inzirakarengane zihashyinguwe.

Iki gikorwa cyitabiriwe n’abayobozi muri FERWACY, Minisiteri ya Siporo, Komite Olempike y’u Rwanda, abayobozi b’amakipe, abakinnyi n’abafatanyabikorwa b’iri Shyirahamwe ry’Umukino w’Amagare mu Rwanda.

"Race to Remember" yatangiye gukinwa mu 2016, gusa ntiyabaye mu 2020 na 2021 kubera icyorezo cya COVID-19.

Mbere y'uko haba isiganwa, abayobozi muri FERWACY, Minisiteri ya Siporo, Komite Olempike y'u Rwanda n'abafatanyabikorwa b'iri Shyirahamwe basuye Urwibutso rwa Jenoside rwa Nyanza ya Kicukiro

Abakinnyi bari mu basuye Urwibutso rwa Jenoside rwa Nyanza ya Kicukiro aho bunamiye inzirakarengane z'Abatutsi zihashyinguye

Ubwo abakinnyi biteguraga guhaguruka kuri Canal Olympia

Race to Remember y'uyu mwaka yitabiriwe n'abakinnyi 142 mu byiciro bitandukanye

Ubwo Mugisha Mugisha Moïse na Nkundabera Eric bari bayoboye isiganwa

Masengesho Yvonne wa Ndabaga Women Cycling Team yegukanye isiganwa mu bangavu

Tuyipfukamire Jean Faustin wa Muhazi Cycling Generation yishimira intsinzi yabonye mu cyiciro cy'ingimbi

Nzayisenga Valentine ni we watsinze mu bagore

Ikundabayo Roben ukinira Ikipe ya Muhazi Cycling Team yishimira kwegukana 'Race to Remember' ya 2025

Abayobozi bifotozanya n'abakinnyi batsinze muri buri cyiciro