Umuyapani niwe uzaba uwa mbere kugera ku kwezi ajyanywe na SpaceX

Yanditswe na Mukaneza M.Ange
Kuya 18 Nzeri 2018 saa 02:17
Yasuwe :
0 0

Ikigo cy’ikoranabuhanga cya SpaceX cyatangaje ko umuherwe w’Umuyapani, Yusaku Maezawa ari we mugenzi wa mbere uzajya ku kwezi akoresheje icyogajuru cya Big Falcon Rocket (BFR).

Urugendo rwo kujya ku kwezi ruri gutegurwa n’iki kigo cyashinzwe n’umuherwe Elon Musk ruteganyijwe mu 2023.

Ni rwo rwa mbere ruzaba rukozwe n’abantu, nyuma y’abagiyeyo mu cyogajuru Apollo 17 cya NASA mu 1972.

BBC ivuga ko kuri uyu wa kabiri aribwo SpaceX yatangaje iby’uru rugendo rwa Maezawa, aho iki kigo gihamya ko ari intambwe ikomeye izafungurira amarembo abafite inzozi zo kuzenguruka mu isanzure.

Maezawa w’imyaka 42 usanzwe ukora ibijyanye n’ubuhanzi bw’imideli, yatangiye kuvugwa cyane umwaka ushize ubwo yaguraga igihangano cya nyakwigendera Jean Michel Basquiat kuri miliyoni 110.5 z’amadolari.

Uyu mugabo usanzwe ukunda ibirebana n’ubuhanzi yavuze ko azatumira abanyaugeni bagera ku munani bakazajyana muri uru rugendo rugana ku kwezi.

Ati “ Bazasabwa guhanga ikintu cyihariye nyuma yo kugaruka ku Isi. Ibihangano byabo bizabera inganzo abafite inzozi bose muri twebwe.”

Abanyamerika 24 gusa nibo babashije kujya ku kwezi, gusa bose siko bahakandagije ibirenge kuko bamwe muri bo bari bafite inshingano zibasaba kuguma mu cyogajuru.

Maezawa nawe ntazabasha gukandagiza ibirenge bye ku kwezi, kuko nyuma yo kuzenguruka iruhande rw’iyi nyenyeri iruta izindi azahita agaruka ku Isi.

Iby’uru rugendo bitangajwe mu gihe Musk washinze SpaceX akomeje kunengwa n’abatari bake nyuma y’aho agaragaye ari kunywa urumogi, ubwo yaganiraga n’umunyarwenya w’Umunyamerika bakoresheje mudasobwa.

Ku wa Mbere kandi nabwo byatangajwe ko agiye kujyanwa mu nkiko ashinjwa gusebanya, nyuma yo kuvuga ko Umwongereza watabaye abana bo muri Thailand bari baheze mu buvumo azwiho gufata abana ku ngufu.

Vernon Unsworth uvuga ko yasebejwe yifuza guhabwa na Musk impozamarira ingana n’ibihumbi 75 by’amadolari.

Umuherwe w’Umuyapani, Yusaku Maezawa ni we mugenzi wa mbere uzajya ku kwezi akoresheje icyogajuru cya Big Falcon Rocket

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza