Sobanukirwa akamaro ka ‘Windsock’ ku kibuga cy’indege

Yanditswe na Cyril Ndegeya
Kuya 18 Nzeri 2020 saa 03:44
Yasuwe :
0 0

Ushobora kuba wari warakabonye ku nyubako runaka, ku kibuga cy’indege, karaguciye mu maso ntubyiteho cyangwa ukibaza akamaro kako ukabura igisubizo, uyu munsi ndagira ngo usobanukirwe n’agakoresho kitwa Windsock.

Abakoresha ururimi rw’igifaransa bakazi nka manche à air gusa ndisegura sinzi neza uko bakita mu Kinyarwanda, ubindusha yabimbwira.

Windosock nk’uko mukabona ku mafoto, ni agakoresho kameze nk’umutemeri gato ariko gafite akamaro kanini cyane ku bibuga by’indege.

Impamvu ni uko kugira ngo indege iguruke cyangwa imanuke ku butaka, umuyaga ni ikintu cyitabwaho cyane n’abapilote.

Windsock ifasha mu buryo bwihuse kumenya icyerekezo cy’umuyaga uri ku kibuga ndetse n’ikigereranyo cy’umuvuduko ufite, ayo ni amakuru y’ingenzi cyane ku mupilote w’indege uwo ariwe wese kandi igihe cyose.

N’ubwo hari irindi koranabuhanga rikoreshwa ku kibuga no mu ndege zigezweho mu kumenya aya makuru, si ko ibibuga bigwaho indege byose biba bifite iri koranabuhanga.

Urugero nko mu Rwanda, murabizi ko igihugu gifite ibindi bibuga bishobora kugwaho indege nto na za kajugujugu, hirya no hino mu gihugu: i Huye, Bugesera, Musanze n’ahandi, uretse Ikibuga cya Kamembe kizwi ku rwego mpuzamahanga.

Aha hose mvuze rero hashobora kuba hatari ikoranabuhanga rihambaye nk’iryo ku Kibuga cy’indege cya Kigali i Kanombe cyangwa ugasanga hari n’aho ritari.

Icyo gihe rero bisaba ko umupilote mu gihe arimo kuhagera abanza guterera akajisho kuri iriya windsock kugira ngo ahite amenya neza icyerekezo cy’umuyaga, anamenye niba ari mwinshi (wihuta cyangwa utihuta). Ibyo bimuha ishusho y’icyerekezo ari buturukemo amanura indege kuri icyo kibuga cyangwa se ayigurutsa.

Amabara ya Windsock afite igisobanuro

Windsock rero igira amabara asimburana yera n’atukura, ibi nabyo bifite icyo bivuze. Igisobanuro cyabyo ni uko buri gice cy’ibara gisobanuye umuvuduko runaka w’umuyaga unyura muri iyi windsock, buri gace kaba gasobanura umuvuduko wa knot (kt) eshatu.

Mu busanzwe knot imwe (1kt) ingana na 1,852 km/h, gusa ku byerekeye indege ingero z’imivuduko akenshi zibarwa muri knot.

Iyo nta muyaga uhari Windsok iba itendera kuri ka kuma ishinzeho, ireba hasi ariko uko umuyaga ugenda uyinjiramo ni ko igenda irambuka biva ku ibara ritukura bijya ku ry’umweru.

Ubwo ni ukuvuga ko iyo agace ka mbere gatukura gatambitse utundi dukurikiyeho tureba hasi. Icyo gihe uwo muyaga uba ufite umuvuduko wa 3kt, twaba ari duce tubiri dukurikiranye, ubwo umuvuduko aba ari 6kt, gutyo gutyo bigakomeza umuyaga waba mwinshi ikarambuka yose niba yari igizwe n’uduce dutanu ubwo urumva ko umuvuduko ari 15kt kuzamura, ibyo bituma umupilote w’indege amenya uko yitwara ku muyaga wa 15kt cyangwa urenzeho.

Gusa windsock si yo yonyine yiringirwa mu kumenya aya makuru, nababwiye ko andi yisumbuyeho abapilote bayakura mu ikoranabuhanga riba mu ndege cyangwa se bakayahabwa n’abayobora indege bari ku butaka, cyane cyane ko ku bibuga by’indege haba hari ibyuma bifata bene ibyo bipimo nibura buri minota 30 hiyongereyemo n’amakuru y’uko ikirere cyifashe muri rusange.

Ushobora kwibaza uti ese mu ijoro windsock iboneka ite?

Igisubizo ni uko aho ishinze akenshi iba ifite amatara ayimurikiye cyangwa ayimurikamo imbere ku buryo umupilote wese ari bubashe kuyibona. Gusa si hose kuko ibibuga byose si ko indege zibigwaho mu ijoro, hari ibikora ku manywa gusa mu ijoro bigafunga, ubwo rero ku manywa ayo matara ntabwo aba akenewe.

Ikindi wakwibaza ni ukuvuga ngo ese umupilote ugiye kugwa ku kibuga runaka ari ubwa mbere, atazi aho windsock ishinze, azaba afite umwanya wo kuraranganya amaso ayishakisha?

Icyo wamenya ni uko windsock zidashyirwa ahabonetse hose ku bibuga by’indege, ahubwo akenshi usanga ziri ahantu hazwi n’abari buzikenere.

Ikindi ni uko abapilote baba bafite ikarita y’ibibuga (Airport Ground Charts) bari bugweho, ishushanyijeho buri kintu umwanya kirimo harimo n’izi windsock ku buryo ajya kuhagera azi neza aho ari buyibone (naramuka ayikeneye) mu ruhande uru n’uru rw’umuhanda bagushaho indege uzwi nka runway.

Ibi ni byo bisobanuro by’ingenzi kuri windsock. Niba hari icyo udasobanukiwe neza, cyangwa ikindi ufiteho amatsiko wanyandikira kuri [email protected]

Ground Chart y'Ikibuga Mpuzamahanga cya Kigali inerekana aho windsok ebyiri zacyo zishinze
Ubu kuri iyi harimo umuyaga wa 3kt
Umuyaga wa 5kt winjira muri windsock ikamera gutya
Windsock iri ku kibuga gito cy'ibyatsi mu Busuwisi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .