NASA yasakaje amafoto ya Jupiter yafashwe n’ikigendajuru cya Juno

Yanditswe na Ishimwe Israel
Kuya 16 Ukuboza 2018 saa 12:00
Yasuwe :
0 0

Ikigo cy’Abanyamerika gikora Ubushakashatsi ku Bumenyi bwo mu Kirere n’Isanzure (NASA) cyashyize hanze amafoto agaragaza ubwiza bw’umubumbe wa Jupiter yafashwe n’Ikigendajuru cya Juno.

Juno iguruka ikoresheje imbaraga z’imirasire y’izuba, yakozwe n’Ikigo cy’Abanyamerika gicura intwaro n’ibindi bikoresho cya Lockheed Martin.

Yoherejwe mu kirere ku wa 5 Kanama 2011, igera ku nzira (orbit) ya Jupiter mu ijoro ryo ku wa 4 Nyakanga 2016. Ni urugendo rwamaze imyaka ine, amezi 10 n’iminsi 29.

Nyuma y’imyaka ibiri ihageze, NASA yasohoye amafoto yafashwe agaragaza Jupiter n’ubwiza bw’ibiyigaragiye mu buryo bwa nyabwo.

Inkuru ya CNN ivuga ko aya mashusho yafashwe ku wa 29 Ukwakira 2018, ubwo iki kigendajuru cyazengurukaga ku nshuro ya 16 uyu mubumbe.

Juno yoherejwe mu kirere nk’uburyo bwo gufasha abahanga mu by’ubumenyi bw’ikirere gukora inyigo ku miterere n’imikurire bya Jupiter.

Juno yageze ku mubumbe ikora neza izawuzenguruka inshuro 37 mu mezi 20. Ni ikigendajuru cya mbere cyakoze neza kuko Galileo yoherejweyo ku wa 18 Ukwakira 1989, yahuye n’ibibazo byatumye cyangizwa ku wa 21 Nzeri 2003.

Umuyobozi ukuriye Imikorere y’Ikigendajuru cya Juno, Scott Bolton, ubwo hamurikwaga amafoto cyafashe muri Gicurasi 2018, yavuze ko bishimiye ibyo babonye kuri Jupiter.

Ati “Intego nyamukuru y’ubushakashatsi bwacu ni itandukaniro ry’imiterere ya Jupiter n’uburyo twayitekerezaga. Cyatanze ishusho ya bugufi yegereza umuntu imiterere ya Jupiter.”

Amashusho yasakajwe agaragaza ibimeze nk’amazi awukikije y’amabara menshi, ni ibicu bya Jupiter.

NASA yavuze tariki ya 21 Ukuboza 2018, Juno izaba igeze kuri kimwe cya kabiri cy’intego yayo yo gukusanya amakuru. Byitezwe ko mu minsi izaza amafoto n’amashusho afatirwa kuri Jupiter azakomeza kugaragaza ubwiza bwayo.

Iki kigendajuru ni igikoresho cya mbere mu mateka cyakozwe n’amaboko y’abantu kigendera ku muvuduko uhambaye, kuko Juno yagendeye ku w’ibilometero 265 000 ku isaha.

Agahigo k’umuvuduko udasanzwe kari gafitwe n’ibigendajuru bya NASA, Helios 1 na Helios 2 byoherejwe mu kirere ahagana mu 1970 bigiye kwiga imiterere y’izuba, byari bifite umuvuduko w’ibilometero 253 000 ku isaha.

Ni umuvuduko uhambaye kuko nk’isasu rizwi ko ryihuta, iyo urirashe mu kirere rishobora kunyaruka ibilometero 2 735 ku isaha, bivuze ko umuvuduko wayo ukubye uw’isasu inshuro 96.8. Nasa yakoresheje ingengo y’imari ya miliyari $1.1 yohereza Juno kuri Jupiter.

Jupiter ni umubumbe wa gatanu uvuye ku zuba ndetse niwo mugari mu isanzure. Umurambararo wayo ukubye uw’Isi inshuro 11.2, naho ubunini bungana no gufata Isi dutuye ukayikuba inshuro 1321.3.

Ishusho igaragaza imisusire ya Jupiter

Ishusho yafashwe n'ikigendajuru cya Juno igaragaza umubumbe wa Jupiter
Iyi foto yafashwe n'ikigendajuru cyoherejwe na NASA mu kirere mu 2011, kikagerayo mu 2016

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza