Abahanga boherejwe mu isanzure na SpaceX bagarutse ku Isi bururukira mu nyanja

Yanditswe na Umwali Zhuri
Kuya 3 Kanama 2020 saa 02:58
Yasuwe :
0 0

Urugendo rwa mbere rwakozwe na Sosiyete yigenga rugana mu isanzure rwasojwe neza aho abahanga mu by’ubumenyi bw’ikirere bari barugiyemo, bururutse bakagera ku Isi bakoresheje imitaka aho baguye mu Nyanja iri mu kigobe cya Mexique muri Leta ya Floride.

Ni ku nshuro ya mbere abahanga mu by’ubumenyi bw’ikirere bagiye ku isanzura hanyuma bakururukira mu mazi kuva mu 1975 ubwo Ikigo cya Amerika gishinzwe iby’isanzure, Nasa, yakoraga ubutumwa bwayo bwa mbere bujya mu isanzure bwakozwe n’icyogajuru cya Apollo kijya ku zuba.

Ni bwo bwa mbere habayeho amateka aho ikigo cyigenga cyohereje abantu mu isanzure mu bushakashatsi. Robert L. Behnken na Douglas G. Hurley bari bagiyeyo boherejweyo na Sosiyete ya SpaceX y’umuherwe Elon Musk.

Bombi bari bamaze iminsi 64 mu rugendo rwabo mu isanzure, aho byitezwe ko rugiye gukurikirwa n’izindi nyinshi zirimo izigamije gusura no gukora ubushakashatsi cyangwa se izigamije kujya gukanika za satellite ziba zaroherejweyo.

Kugira ngo bajyeyo, hari nyuma y’uko NASA isabye sosiyete ebyiri, SpaceX na Boeing ko zajya zijyana ndetse zikanavana abahanga mu byogajuru ku Sitasiyo Mpuzamahanga ikora ubushakashatsi ibarizwa mu isanzure. SpaceX ni yo yabaye iya mbere muri urwo rugendo yohereza babiri muri Gicurasi uyu mwaka.

Kuba bagarutse ku Isi bakagwa mu nyanja ni ibintu bisanzwe kuko no mu myaka ya 1960 na 1970, ibyogajuru by’Abanyamerika n’ibya Leta Zunze Ubumwe za Amerika byagiye bigaruka ku Isi muri ubwo buryo.

Uru rugendo rukozwe na sosiyete yigenga rugiye gufungura amayira ya Amerika mu bijyanye n’ingendo zigana mu isanzure.

Impamvu ni uko mu gihe kiri imbere, ingendo zose zigana mu isanzure zizajya zikorwa na sosiyete zigenga, ku buryo niba ari abantu bashaka kujya gukora ubushakashatsi, bishyura nka SpaceX ikabatwara.

NASA itangaza gushyira mu maboko y’abikorera iyi gahunda bizatuma igabanya miliyari nyinshi z’amadolari yashyiraga muri ibi bikorwa ahubwo zigakoreshwa mu kohereza abahanga mu byogajuru ku kwezi nyuma no kuri Mars.

Aba bahanga mu by'isanzure bagarutse ku Isi bururukira mu nyanja bari mu mitaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .