Abiga muri Muhabura Integrated Polytechnic College beretswe serivisi z’ikoranabuhanga zitangwa muri Inoventyk

Yanditswe na IGIHE
Kuya 28 Ukwakira 2019 saa 12:31
Yasuwe :
0 0

Abanyeshuri 23 biga mu Ishuri ry’Ubumenyi ngiro ry’i Musanze, Muhabura Integrated Polytechnic College basuye Ikigo gitanga Serivisi z’Ikoranabuhanga cya Inoventyk, berekwa imikorere yacyo ijyanye n’umuvuduko w’Isi mu ikoranabuhanga.

Uru rugendo shuri rwari rufite intego yo gufasha abanyeshuri gusobanukirwa byimbitse iterambere ry’ikoranabuhanga n’uburyo bagendana naryo.

Abarwitabiriye ni abiga mu Ishami rya Software Development muri Muhabura Integrated Polytechnic College; bagaragaje ko bungukiye byinshi muri uru rugendo shuri ndetse byabahaye imbaraga zo gushyira umwete mu masomo yabo.

Imwe mu mpamvu yatumye Inoventyk itoranywa ni ukubera ubuhanga ifite mu gutanga serivisi z’ikoranabuhanga cyane ko ariyo yakoze website z’ibigo bikomeye mu Rwanda.

Ukobizaba Baptiste wari uhagarariye abanyeshuri bo muri Muhabura Integrated Polytechnic College, yabwiye IGIHE ko hari byinshi bungukiye mu byo babonye.

Yagize ati “Byaradushimishije cyane kuko abana bari bafite inyota yo kumenya uko amasomo biga ashyira mu bikorwa n’uburyo abakozi b’Ikigo cya Inoventyk bakora. Bahuye n’abakozi bafite ubumenyi kandi hari ibyo babigiyeho.’’

Yakomeje avuga ko batashye bishimye cyane kuko basangijwe ubumenyi akenshi usanga biba bigoye kubona ahantu hose.

Yakomeje ati “Twabonye ikigo gifite ibikoresho bigezweho n’imikorere myiza. Byahaye isomo abanyeshuri bacu ko bakwiye gushyira umutima ku kintu kimwe, bakagikora batajarajara, ni byiza kugira icyo bitaho kurusha ibindi.’’

Inoventyk ibarizwa mu Mujyi wa Kigali rwagati kwa Ndamage, yatangiye gukora mu ntangiriro za 2019. Itanga serivisi zirimo izo gufungura imbuga no kuzandikisha, gukora website na design, kuzikurikirana no kuzishyira mu bubiko (server) n’ibindi.

Umuyobozi wa Inoventyk, Nsengiyumva Paterne, yabwiye IGIHE ko iki gikorwa cyari kigamije gusangiza abakiri ku ntebe y’ishuri ubunararibonye mu byo bakwiye gushyiramo imbaraga.

Yagize ati “Rwari urugendo shuri rugamije kungura ubumenyi abanyeshuri bakibyiruka mu bijyanye n’amasomo y’ikoranabuhanga arimo uburyo imbuga za internet zikorwa, ibijyanye na software development, design za website, raporo n’ibindi.’’

“Dusanzwe dutanga amahugurwa n’imenyerezamwuga ku mashuri n’ibigo bitandukanye. Abadusuye bifuje ko abanyeshuri bari mu mwaka wa Gatanu barimo abo mu mwaka utaha bazaba batangiye kwimenyereza umwuga twabasangiza imiterere y’ikoranabuhanga rikenewe ku kazi ngo bakure bazi ibyo bakeneweho.’’

Mu banyeshuri basuye Inoventyk, umwe muri bo wakoze urubuga rwa internet yemerewe ubufasha bwo kurunoza kugira ngo ubutumwa ashaka ko rutanga bugera ku babugenewe.

Nsengiyumva yakomeje avuga ko ‘‘Hari umunyeshuri werekanye impano yo gukora website ariko twasanze ikoze mu Cyongereza tumwemerera kumuha ubufasha bwo kuyishyira mu Kinyarwanda.’’

Icyerekezo cya Inoventyk ni uguhanga udushya mu ikoranabuhanga no korohereza Abanyarwanda kubyaza umusaruro amahirwe aririmo bijyanye n’icyerekezo cy’igihugu cyo kubaka ubukungu bushingiye ku bumenyi n’ikoranabuhanga.

Abahuguwe bagaragaje imwe mu mishinga y'ikoranabuhanga bafite, bamwe muri bo bizezwa ubufasha bwo kuyinoza ngo yungukire benshi
Abanyeshuri biga muri Muhabura Integrated Polytechnic College beretswe serivisi z’ikoranabuhanga zitangwa mu Kigo cya Inoventyk
Mwesigwa Allan ukora muri Inoventyk asobanura iby'ibanze byo kwitwararika mu gihe umuntu agiye gukora website
Kalima Alain ukora ibijyanye na 'Graphic Design' yasangije abanyeshuri basuye Inoventyk ubumenyi afite n'ibyo bakeneye gukora ngo bazisange ku isoko ry'akazi
Abiga muri Muhabura Integrated Polytechnic College banyuzwe n'amasomo bahawe n'abakozi ba Inoventyk
Intego y'uru rugendo shuri ni ugufasha abanyeshuri gusobanukirwa iterambere ry’ikoranabuhanga mu nzego zitandukanye
Abitabiriye iki gikorwa ni abanyeshuri biga mu Ishami rya Software Development
Nyuma y'urugendo shuri, abanyeshuri bo muri Muhabura Integrated Polytechnic College n'abakozi ba Inoventyk bafashe ifoto y'urwibutso

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza