00:00:00 IGIHE NETWORK KN KINYARWANDA EN ENGLISH FR FRANCAIS

Abahanga bavumbuye undi mubumbe uteye nk’Isi ushobora no guturwaho

Yanditswe na IGIHE
Kuya 6 June 2022 saa 05:37
Yasuwe :

Abahanga mu by’Ubumenyi bw’Ikirere bavumbuye undi mubumbe ufite imiterere nk’iy’Isi ndetse ushobora no guturwaho.

Uyu mubumbe mushya wavumbuwe witwa Kepler-1649c; uzengurukwa n’inyenyeri ingana na ¼ cy’izuba.

Aba bahanga mu by’isanzure bavuze ko umubumbe bavumbuye uriho amazi, ikimenyetso cyerekana ko ushobora guturwa kandi ufite ubuzima.

Ikigo cy’Abanyamerika gikora Ubushakashatsi ku Bumenyi bwo mu Kirere n’Isanzure (NASA) cyagaragaje ko mu mibumbe 2000 itari mu isanzure rigaragiye izuba ‘exoplanets’, yavumbuwe hifashishijwe Icyogajuru cya Kepler [Kepler Space Telescope], Kepler-1649c ni yo isa n’Isi haba mu ngano ndetse n’ubushyuhe bwayo.

Umuyobozi muri NASA, Thomas Zurbuchen, yavuze ko ibyo babonye ‘bitanga icyizere ko hashobora kuba hari Isi ya kabiri iri hagati y’inyenyeri, itegereje kuvumburwa.’

Nubwo NASA yavuze ko hari imibumbe ijya kungana n’Isi, indi ikaba ijya kugira ubushyuhe nk’ubwayo, nta wundi mubumbe ujya gusa na yo mu kuba ushobora guturwaho.

Umubumbe mushya wavumbuwe, ni mugari kurushaho Isi ku gipimo cya 1.06 ndetse n’urumuri ruwugeraho rungana na 75% ugereranyije n’urwo Isi yakira ruvuye ku zuba, bisobanuye ko ubushyuhe bushobora kuba bujya kungana.

Abahanga mu bya Siyansi bavumbuye uyu mubumbe ubwo barebaga mu byavuye mu bushakashatsi bw’ibyakusanyijwe n’Icyogajuru cya Kepler, cyahagaritse gukora mu 2018, ubwo amavuta cyakoreshaga yashiraga.

Nubwo iki cyogajuru cyahagaritse misiyo yacyo mu myaka ine ishize, haracyakusanywa amakuru cyohereje ku Isi mu gihe cyakoze.

Icyogajuru cya Kepler cy’Ikigo cy’Abanyamerika gikora ubushakashatsi ku bumenyi bwo mu kirere n’isanzure (NASA), cyagaragaje ibyavuye mu bushakashatsi ko hariho imibumbe mishya 219 itari mu isanzure rigaragiye izuba, muri iyo 10 ikaba ijya kungana n’Isi.

Icyogajuru Kepler cyakozwe mu 2009; imibare yo kugeza mu 2018 yerekanaga ko kimaze kuvumbura imibumbe 4,034. Nasa yagaragaje ko igera kuri 2335 yemejwe bidasubirwaho.

Nyuma ya Kepler, ikindi cyogajuru cyakomeje gukora ubushakashatsi ni TESS (Transiting Exoplanet Survey Satellite). Kimwe n’icyakibanjirije cyitegereza buri mubumbe ukekwaho kubaho ubuzima, kikareba niba haba ibimera, umwuka uhari, ubushyuhe n’ibindi, kigatanga amakuru y’ibyo cyakusanyije.

Abashakashatsi bagaragaza ko kuvumburwa kwa Kepler-1649c, ari intambwe ikomeye mu mateka y’ikiremwamuntu.

Abahanga bavumbuye undi mubumbe uteye nk’Isi
Ibyahagaragaye byerekana ko ushobora no guturwaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .