Perezida Kagame yatangaje umubare wa telefoni zizatangwa na Madamu we n’abana muri #ConnectRwanda

Yanditswe na IGIHE
Kuya 24 Ukuboza 2019 saa 07:54
Yasuwe :
0 0

Perezida Kagame yatangaje ko Madamu we Jeannette Kagame n’abana be bose hamwe n’abandi bantu ba hafi bo mu muryango bamwiyunzeho mu bukangurambaga bwo kugeza telefoni zigezweho kuri buri rugo rwose mu Rwanda.

Ubu bukangurambaga bwatangiye ku wa Gatandatu w’icyumweru gishize aho Perezida Kagame yemeye kuzatanga telefoni 1500 za Mara Phone zikorerwa mu Rwanda.

Abinyujije ku rukuta rwe rwa Twitter yavuze ko umuryango we nawo wabigizemo uruhare uhereye ku muto kugera ku mukuru.

Ati “Ndashimira umuryango wanjye kuba wemeye kugira uruhare muri #ConnectRwanda ugatanga telefoni za Mara Phones. Jeannette yatanze 27 hanyuma abana banjye: Ivan:23, Ange Kagame na Bertrand:15, Brian (yifashishije amafaranga yazigamye ubwo yari ari mu kwimenyereza umwuga): 5, umwisengeneza wa Jeannette, Nana (aracyari muri Kaminuza): 3.”

Nyuma y’aho ubu bukangurambaga butangiriye, abantu benshi ku giti cyabo n’ibigo byaba iby’igenga n’ibya leta byahise byitabira iyi gahunda.

Nka Banki ya Kigali yemeye telefoni 1500 ndetse ku ruhande rw’abakozi bayo biyemeza gutanga 500; Banki y’Abaturage itanga 1000; I&M Bank itanga 1000; Donald Kaberuka wigize kuyobora Banki Nyafurika Itsura Amajyambera, yemera gutanga telefoni 300 afatanyije n’inshuti ze.

Mu bandi bagiye bemera gutanga telefoni harimo Banki Nkuru y’Igihugu yemeye gutanga 1000, Dr Vera Songwe uri mu kanama gafasha Perezida Kagame mu mavugurura muri AU atanga 30.

Umujyi wa Kigali wo wemeye gutanga 1158, Minisiteri y’Ubuzima yemera gutanga nayo 1000; MTN Rwanda yemeye gutanga 1000 ariko Umuyobozi wayo Mitwa Kaemba Ng’ambi arenzaho yemera gutanga 100 ku giti cye.

Minisitiri w’Ikoranabuhanga na Inovasiyo, Ingabire Paula, aherutse gutangaza ko iyi “Connect Rwanda Challenge” igamije ko buri munyarwanda yaba afite telefoni igendanwa ya smartphone.

Yavuye mu bitekerezo byabayeho hagati ya Minisiteri ayobora n’ibigo by’itumanaho, harebwa uko umuturage yarushaho koroherezwa kubona telefoni igendanwa.

Igitekerezo cyari uko abantu bakoroherezwa kuzigura bakajya bazishyura mu byiciro, aho nibura umwe yasabwaga kwishyura ibihumbi bine cyangwa umunani bitewe na telefoni gusa ikibazo kiza kuba ko hari n’abatabona ayo mafaranga.

Muri uko gushaka uko abaturage bose bagerwaho na telefoni, ngo MTN Rwanda yazanye igitekerezo cy’uko ibigo byakwiha umukoro bikishakamo ubushobozi bikagira izo biha abaturage.

Ati “MTN Rwanda iza kuzana igitekerezo cyiza cyo kuvuga iti reka dushyireho umukoro [challenge] w’amezi atatu aho ari ibigo cyangwa umuntu ku giti cye yashobora kuba yatanga telefoni umubare runaka kugira ngo noneho tuzikusanyirize hamwe, dufatanye n’inzego z’ibanze tugende tuzitanga mu ngo zitandukanye.”

Yakomeje agira ati “Umukoro dushaka kwiha, ni ukugira ngo za ngo miliyoni ebyiri n’ibihumbi 880 dufite mu Rwanda nibura buri rugo rugire smartphone kuko imwe izatuma buri wese uba muri urwo rugo abone izo serivisi biboroheye.”

Imibare y’Urwego Ngenzuramikorere (RURA) yo mu Ugushyingo uyu mwaka igaragaza ko Abanyarwanda batunze telefoni ngendanwa ari 9,527,829. Gusa iyo babara aba, haba hagendewe ku mubare wa sim card zikora, ku buryo ushobora gusanga hari umwe ufite izirenga ebyiri.

Ibi bisobanuye ko ugiye kubarura, ntiwasanga telefoni miliyoni icyenda n’imisago, ahubwo wabona sim card zingana n’uwo mubare zishobora kuba zikoreshwa muri telefoni zitanageze no kuri miliyoni eshanu.

Muri miliyoni icyenda n’imisago zibarurwa, MTN Rwanda yihariye umubare munini na 5,245,426 mu gihe Airtel ari 4,282,403.

Ni mu gihe abanyarwanda bangana na 52.1% ari bo bakoresha internet bavuye kuri 7.9% babarwaga mu 2010.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .