Abaturarwanda bavugiye kuri telefoni iminota isaga miliyari 3.5 mu mezi atatu ya 2018

Yanditswe na Dusabimana Aimable
Kuya 21 Nyakanga 2018 saa 08:53
Yasuwe :
0 0

Urwego Ngenzuramikorere, RURA, rugaragaza ko mu mezi atatu ya mbere ya 2018, abakoresha telefoni ngendanwa mu Rwanda bakoresha imirongo itandukanye, bazivuganiyeho iminota isaga miliyari eshatu n’igice, bohererezanya ubutumwa bugufi burenga miliyoni 600.

Iyi mibare iheruka gushyirwa ahagaragara, yagaragaje uko Abaturarwanda bakomeje kwitabira serivisi z’itumanaho no kuzikoresha mu buryo butandukanye mu buzima bwabo bwa buri munsi.

Icyegeranyo cya RURA kigaragaza ko iminota Abaturarwanda bavugira kuri telefoni bahuriye ku murongo umwe w’itumanaho yiyongereyeho 0.8% kuva mu gihembwe cya kane cy’umwaka ushize kugeza mu cya mbere cy’uyu mwaka naho abakoresha itandukanye bakiyongera ku kigero cya 14.5%.

RURA yanagaragaje ko iminota abari hanze y’igihugu bahamagaraga abari mu Rwanda yiyongereye ku kigero cya 13.0% naho guhamagarwa ku bari imbere mu gihugu byo bikazamuka ku kigero cya 12.9%.

Abaturarwanda bavugiye kuri telefoni iminota iri hejuru ya miliyari eshatu n’igice

Iki cyegeranyo cyerekanye abakoresha telefoni mu Rwanda bahuriye ku murongo umwe, iminota bazivugiyeho yavuye kuri 3,430,027,715 ikagera kuri 3,456,135,287; mu guhamagarana bakoresheje imirongo itandukanye, iminota yavuye kuri 38,483,598 igera kuri 45,210,330.

Abari imbere mu gihugu bahamagawe n’abari hanze iminota 62,547,280 ivuye kuri 55,372,938 yo mu gihembwe cya nyuma cya 2017. Abahamagaye hanze y’u Rwanda iminota 25,454,557 ivuye kuri 22,548,234.

Imibare ya igaragaza ko mu gihembwe cya mbere cy’uyu mwaka hari abantu 346,456 basanzwe ku mirongo yo mu Rwanda bayikoresheje mu mahanga bifashishije uburyo bwa Roaming naho abanyamahanga 284,751 bakabukoresha bari imbere mu gihugu.

RURA ivuga ko ‘Umubare munini w’abatuye mu Rwanda ukomeza kwimakaza ikoreshwa rya telefoni ngendanwa nk’uburyo bw’ikoranabuhanga mu guhererekanya amakuru kurusha za ‘Telefoni zitagendanwa.’

Ikomeza ivuga ko imibare y’ubwiyongere bw’abakoresha telefoni ngendanwa muri Werurwe uyu mwaka yari igeze kuri 76.6% mu gihe ubwa ‘Telefoni zitagendanwa’ bwari kuri 0.1%.

Ubutumwa bugufi burenga miliyoni 650

Ubutumwa bugufi Abaturarwanda bohererezanya na bwo bwariyongereye kuko mu gihembwe cya nyuma cy’umwaka ushize abahuriye ku mirongo imwe bari bohererezanyije 650,169,250 naho mu cya mbere cy’uyu mwaka bikagera ku butumwa bugufi 658,607,008.

Ibi ariko siko bimeze mu kohererezanya ubutumwa bugufi ku bakoresha imirongo inyuranye kuko byagabanutseho -1.0% bikava ku butumwa bugufi 14,928,697 bikagera SMS 14,772,594.

Ubutumwa bugufi buturuka hanze y’igihugu bwohererejwe abari mu Rwanda bwavuye kuri 4,562,200 bugera kuri 4,601,267 naho ubujyayo zigira ubwiyongere buhanitse bwa 43.8% aho zavuye kuri 4,423,922 zikagera kuri 6,362,064.

RURA igaragaza ko ibiciro byo guhamagarana mu Rwanda kuva mu 2010 byagiye bigabanuka ku bakoresha telefoni ngendanwa babarirwa muri miliyoni icyenda bazitunze nk’uko byagaragajwe mu ibarura ryo muri Mata 2018.

Abanyarwanda bavugiye kuri telephone iminota isaga miliyari eshatu n'igice mu mezi atatu
Igiciro cyo guhamagarana ku munota mu Rwanda cyagiye kigabanuka kuva mu 2010
Ikoreshwa rya telefoni zitagendanwa 'Telephone Fixe' mu Rwanda rirarushaho gukendera mu gihe telefoni ngendanwa ziyongera ubutitsa
Uko ibigo by'itumanaho bisangiye abafatabuguzi mu guhamagarana

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza