WhatsApp yajyanye mu nkiko ikigo cyayifashishije mu kwiba amakuru

Yanditswe na Rabbi Malo Umucunguzi
Kuya 30 Ukwakira 2019 saa 06:39
Yasuwe :
0 0

Ubuyobozi bwa WhatsApp bwatangaje ko bwareze mu rukiko ikigo cyo muri Israel, cyihishe inyuma y’igitero cy’ikoranabuhanga giheruka kwibasira abakoresha uru rubuga, kigashyira muri iyi porogaramu virusi ituma kibasha kwibamo amakuru.

Ni igikorwa bavuga ko cyibasiye cyane impirimbanyi z’uburenganzira bwa muntu, abanyamakuru, impunzi za politiki, abadipolomate n’abayobozi muri guverinoma.

Ikigo cya Facebook ari nacyo WhatsApp ibarizwamo, cyatangaje ko cyajyanye mu nkiko NSO mu rukiko rwo muri Leta Zunze Ubumwe za Amerika, kuri uyu wa Kabiri.

Umuyobozi wa WhatsApp, Will Cathcart, yanditse muri Washington Post ati “Ibi bikwiye kuba nk’uburyo bwo guhwitura ibigo by’ikoranabuhanga, za guverinoma n’abantu bose bakoresha internet.”

Yavuze ko uburyo busanzwe bukoreshwa mu kugenzura ibintu burimo kugenda bukoreshwa nabi, ugasanga amakuru y’abantu ashobora kujya mu biganza bibi.

NSO ni Ikigo gikora Ikoranabuhanga rigenzura ibintu runaka aho bibaye ngombwa. Kirashinjwa ko cyakoresheje ububiko bwa WhatsApp buherereye muri Leta Zunze Ubumwe za Amerika mu kohereza virusi muri smartphones zisaga 1400 n’ibindi bikoresho by’ikoranabuhanga, hagati ya Mata na Gicurasi.

Abari bagambiriwe barimo impirimbanyi z’uburenganzira bwa muntu zisaga 100, abanyamakuru n’abandi bakora mu miryango itari iya leta hirya no hino ku Isi. Ngo babarizwaga mu bihugu bya Mexique, Leta Zunze Ubumwe z’Abarabu na Bahrain.

Gusa mu itangazo NSO Group yashyize ahagaragara, yavuze ko itemeranya n’ibyo birego ndetse izaburana urwo rubanza.

Iti "Akazi ka NSO ni uguha ikoranabuhanga ibigo by’iperereza byemewe bya za guverinoma n’inzego zishinzwe iyubahirizwa ry’amategeko, mu kuzifasha kurwanya iterabwoba n’ibindi byaha bikomeye. Ikoranabuhanga ryacu ntabwo ryakorewe cyangwa ryaherewe uburenganzira gukoreshwa mu kwibasira abaharanira uburenganzira bwa muntu n’abanyamakuru.”

Igitero cyabayeho cyatumye WhatsApp ikora iperereza ifatanyije n’impuguke zo muri Kaminuza ya Toronto, ryaje gutahura abari inyuma y’ibyo bikorwa.

Ngo basanze NSO yaroherezaga muri telefoni y’umuntu virusi yiswe Pegasus, umuntu agahita ahamagarwa kuri WhatsApp ku buryo kugira ngo telefoni ye ifatwe bitasabaga ko anitaba abamuhamagaye. Ngo hari n’ubundi buryo bwakoreshejwe mu kwanduza telefoni n’ubu butaramenyekana.

Iyo virusi yagendaga yiba muri telefoni amakuru arimo imibare y’ibanga, nimero umuntu abitse, ibyo yashyize ku ndangaminsi ya telefoni, ubutumwa bugufi n’ibindi.

WhatsApp n’Ikigo ishamikiyeho cya Facebook, byasabye urukiko guhabwa impozamarira ya $75,000 hamwe n’igihembo cya avoka, kimwe n’indi nyishyu y’ibyangijwe byakwemezwa n’urukiko.

Ibyo ngo byajyana no kubuza icyo kigo n’ibigishamikiyeho kongera gukoresha serivisi za WhatsApp cyangwa Facebook, zirimo gufunguza konti cyangwa kuzihagumana mu gihe baba bazisanganywe.

WhatsApp yitabaje inkiko ku kigo cyayifashishije mu kwiba amakuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza