Urubuga rwa Slack rwagurishijwe ikigo gikomeye mu ikoranabuhanga kuri miliyari 27.7$

Yanditswe na IGIHE
Kuya 2 Ukuboza 2020 saa 05:38
Yasuwe :
0 0

Ikigo Salesforce gikomeye mu bijyanye na Porogaramu z’Ikoranabuhanga, cyemeye kugura urubuga rukoreshwa mu biganiro hagati y’abantu bakorana, Slack, kuri miliyari 27.7$, nka bumwe mu bucuruzi bukomeye bushobora kuba bubayeho hagati y’ibigo by’ikoranabuhanga mu myaka ya vuba.

Umuyobozi wa Salesforce, Marc Benioff, yavuze ko iki gikorwa ari ikintu gikomeye ku cyerekezo cy’iki kigo. Bishobotse nyuma y’igihe agerageza kwagura iki kigo na serivisi z’ikoranabuhanga gitanga, kugira ngo kibashe guhangana n’abakeba nka Microsoft.

Iri huzwa ry’ibigo byombi ribaye mu gihe icyorezo cya Coronavirus cyatumye abantu barushaho gukora batari hamwe ariko bagakenera kuganira, ikintu Slack ifashamo cyane.

Icyo kigo muri Werurwe cyari gifite abafatabuguzi bagera muri miliyoni 12.5, gusa cyagiye kigira ibibazo byo guhigika Microsoft Teams bijya gukora kimwe, yashyizwe ku isoko mu 2016 ubu ikaba ikoreshwa n’abagera muri miliyoni zisaga 100.

Mu bucuruzi bwumvikanyweho na Salesforce, abanyamigabane ba Slack bazahabwa 26.79$ ku mugabane, igiciro umugabane muri iki kigo wabarirwaga mu Ugushyingo, kuko amakuru y’iri gurishwa akijya hanze, igiciro cy’umugabane cyahise kizamuka kigera kuri 43$. Bazanahabwa imigabane mike muri Salesforce.

Biteganywa ko ubu bucuruzi buzashyirwaho akadomo mu mwaka utaha.

Salesforce igiye kwegukana Slack kuri miliyari 27.7$

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .