Spedag yatangije ikoranabuhanga ryorohereza umukiriya gukurikirana ibyo yatumije mu mahanga

Yanditswe na Mathias Hitimana
Kuya 30 Ugushyingo 2018 saa 02:38
Yasuwe :
0 0

Sosiyete ya Spedag Interfreight izobereye mu gukurikirana imizigo y’abatumiza ibintu mu mahanga kuva ku cyambu kugeza mu bubiko, yashyizeho uburyo bw’ikoranabuhanga umukiriya wayo azajya abasha kwikurikiranira aho ibye bigeze.

Iyi sosiyete yashyizeho porogaramu yitwa ‘PeriSpoor’, umukiriya ashobora gukoresha kuri telefone cyangwa kuri mudasobwa ye, akamenya neza aho ibyo yatumije bigeze bitamusabye guhamagara, akabibona neza kuri Google Map.

Iri koranabuhanga rya ‘PeriSpoor’ ryubatswe n’ikigo cy’Abasuwisi cyitwa ‘Periplus’ ryafunguwe ku mugaragaro i Kigali ku wa 28 Ugushyingo 2018, naho i Kampala ritangizwa ku wa 29.

Umuyobozi wa Spedag Interfreight muri Afurika y’Iburasirazuba, Dilip Bhandari, yabwiye abanyamakuru ko iri koranabuhanga rizaniye igisubizo abakiriya babo.

Yagize ati “PeriSpoor ni ikoranabuhanga riterekana gusa aho ikamyo iherereye, ryerekana n’umuzigo wawe, waba uri mu ndege, mu nyanja, mu modoka cyangwa muri gari ya moshi; ukabonera kuri internet aho uri n’uko uri kuzanwa.”

Bhandari ashimangira ko PeriSpoor umukiriya ashobora kuyikoresha yibereye mu rugo, kuri telefone cyangwa kuri mudasobwa.

Umuyobozi Mukuru wa M+ Spedag Group, Daniel Richner, yabwiye itangazamakuru ko yizeye ko iri koranabuhanga rizorohera buri wese gukoreshwa kandi rikabungura.

Yagize ati “Ku Banyarwanda, rizihutisha inzira yose imizigo yabo inyuramo, mu buryo budahenze.”

Yanashimangiye ko bizongera icyizere abakiriya bagirira Spedag mu gihe babasha nabo kwirebera aho imizigo yabo iherereye banibereye mu rugo.

Stephen Musale uyobora ikigo cya Ultimate Logistics gicuruza amavuta ya Shell mu Rwanda, yavuze ko PeriSpoor izatuma bakorera mu mutuzo kurushaho kuko azajya abasha kumenya neza aho umuzigo we ugeze, bikagira n’umutekano.

Yagize ati “Dufite abakiriya batumiza ibintu, umuntu akakubaza ngo imodoka igeze he, ukavuga ngo mpa umunota umwe, ugahamagara umushoferi uti ‘ugeze he?’ rimwe na rimwe akakubeshya ngo ari i Nairobi, cyane cyane umushoferi w’umunyamahanga iyo ageze nka Nairobi aryama iwe.”

Muri icyo gihe umushoferi yitahiye iwe akaruhuka mu mpera z’icyumweru, bishobora gutuma azinduka ku wa Mbere, agatwara ikamyo hafi amasaha 24 yakuranwa na kigingi nta kuruhuka ngo bagere i Kigali igihe cyari giteganyijwe.

Avuga ko bazajya babasha guha amabwiriza umushoferi, agatwara amasaha runaka, andi akaruhuka kuko utwaye menshi ananiwe yakora impanuka, ugasanga biteje igihombo.

Byongeye kandi, avuga ko n’umukiriya ashobora kumuha uburyo bwo kwinjira muri iryo koranabuhanga nawe akizera neza aho umuzigo ugeze.

Umyobozi wa Spedag mu Rwanda, Humphrey Pule, yagaragaje ko iri koranabuhanga riziye igihe, buri wese azaryishimira.

Yagize “Uru rwego n’abandi bose bakoresha serivise, bakwiye kugana ubu buryo bw’ikoranabuhanga butuma ubona neza umuzigo, bakaruhuka guhamagara kuri telefone abatwaye amakamyo ngo bamenye aho umuzigo wabo ugeze.”

Yakomeje avuga ko itanga icyizere ku Rwanda ndetse n’Akarere k’Afurika y’Uburasirazuba mu gukora neza igenamigambi ry’imishinga yabo mu gihe bizeye neza aho ibikoresho batumije imahanga bizeye neza aho biherereye.

Umunyamabanga Uhoraho muri Minisiteri y’Ubucuruzi n’Inganda, Sebera Michel, yashimye Spedag Interfreight, avuga ko ifitiye akamaro abashoramari ko gutuma badataka igihe.

Ati “Ndabona iri shoramari rikomeye muri uru rwego, riri mu cyerekezo Guverinoma yihaye, cyo kongera gukorera mucyo n’umutekano w’imizigo hakoreshejwe ikoranabuhanga mu gihugu.”

Yashimangiye ko ikoranabuhanga ari ryiza, atanga urugero ku rimaze igihe rikoreshwa na leta mu gukurikirana amakamyo n’ibicuruzwa mu Muhora wa Ruguru, byagabanyije igihe amakamyo yamaraga mu muhanda, kiva ku minsi 10 kigera kuri itanu kuva i Mombasa kugera i Kigali.

Spedag Interfreight isanzwe ikorera muri Afurika y’Iburasirazuba, yatangaje ko mu mwaka utaha izafungura ibiro muri Zambia, Repubulika Iharanira Demokarasi ya Congo no mu Burundi.

Umyobozi wa Spedag mu Rwanda, Humphrey Pule, aganira n'itangazamakuru
Umuyobozi wa Spedag Interfreight muri Afurika y’Iburasirazuba, Dilip Bhandari, yashimangiye PeriSpoor izafasha abakiriya babo kwikurikiranira neza aho umuzigo wabo uherereye
Umuyobozi Mukuru wa M+ Spedag Group, Daniel Richner, yavuze ko ikoranabuhanga rizafasha kwihutisha akazi bikongera n'icyizere
Umunyamabanga Uhoraho muri Minisiteri y’Ubucuruzi n’Inganda, Sebera Michel, yashimye Spedag Interfreight gutera ikirenge muri gahunda ya leta yo kwimakaza ikoranabuhanga
Porogaramu y'ikoranabuhanga ya PeriSpoor yatangirijwe i Kigali ku wa 28 Ugushyingo 2018

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza