Mu Rwanda hashobora gushyirwaho ikigo gihugura abayobora Drones

Yanditswe na Nshimiyimana Jean Baptiste
Kuya 20 Nzeri 2018 saa 12:38
Yasuwe :
0 0

Umunyamabanga wa Leta ushinzwe gutwara abantu n’ibintu, Uwihanganye Jean de Dieu, yatangaje ko mu gihe hagaragara icyuho mu gukoresha indege za gisivili zitagira abapilote mu Rwanda, hazashyirwaho ikigo kibihugurira abantu.

Mu 2016 hashyizweho amabwiriza agena ibisabwa mu gukoresha indege za gisivile zitagira abapilote zizwi nka ‘Drones’ mu Rwanda, bidatinze zitangira gukoreshwa mu bikorwa byo kujyana amaraso ku bitaro bitandukanye.

Mu kiganiro kigufi, Uwihanganye yagiranye na IGIHE, yavuze ko mbere yo kwemerera umuntu gutwara utwo tudege bisaba kumenya neza niba yarabiherewe ubumenyi mu buryo bufatika.

Gusa ngo muri gahunda z’igihe kirekire zihari, harimo ko mu gihe hazagaragara icyuho hazashyirwaho ikigo gihugura abatwara Drones.

Ati “Nitubona harimo icyuho dupanga mu gihe kirekire, uko byiyongera kuvuga ngo reka dushyireho ikigo [training center] abantu bajye bahugura abapilote, umuntu wese kuko yazanye akantu gafotora ntapfe kuyikoresha.”

Nta gihe ntarengwa iki kigo gihugura abatwara indege za gisivile zitagira abapilote cyaba cyashyizweho.

U Rwanda na Afurika y’Epfo nibyo bihugu byemerera Drones kugenda byoroshye mu kirere cyabyo, ibindi bihugu bya Afurika biracyarwana no gushyiraho amategeko abigenga.

Amabwiriza agena ko “nta muntu ugomba kuyobora utu tudege azi ko afite ikibazo mu miterere y’umubiri cyangwa mu mikorere y’ubwonko, gishobora kubangamira imikorere isesuye ya zo.”

Ikindi inzego zibishinzwe zibuza umuntu kuyobora Drone yanyoye inzoga cyangwa ikindi kiyobyabwenge, abasaba kuziyobora bagasabwa kuba bafite imyaka 18, gutsinda ikizamini cy’ubumenyi bw’ikirere, kwishyura 50 000 Frw kandi ubwo burenganzira bukamara amezi 24.

Mu gihe hagaragara icyuho mu kuyobora no gukoresha Drones hazashyirwaho ikigo kibitangaho amahugurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza