00:00:00 IGIHE NETWORK KN KINYARWANDA EN ENGLISH FR FRANCAIS

Imodoka za Tesla zamuritswe ku isoko ry’u Rwanda (Amafoto)

Yanditswe na Igizeneza Jean Désiré
Kuya 23 March 2024 saa 12:47
Yasuwe :

Ikigo gicuruza imodoka cyitwa Auto24 Rwanda cyamuritse izikoresha amashanyarazi by’umwihariko gikora agashya gihera ku zikorwa n’Uruganda rwa Tesla rwashinzwe n’umuherwe Elon Musk.

Ni imodoka z’ubwoko bwa Tesla Model Y, zikomeje kugurwa cyane kuko urebye nko mu mwaka ushize, Tesla yagurishije izigera kuri miliyoni 1,2, bingana n’inyongera ya 64% ugereranyije n’umwaka wabanje.

Tesla Model Y iri mu byiciro bitatu ni ukuvuga izigenda urugendo rurerure kugeza ku bilometero 531, izigenda ibilometero 487 n’izidakunze kwamamazwa cyane zigenda ibigera ku 449 zitarongera gushyirwamo umuriro.

Auto24 Rwanda yazanye mu Rwanda izi zigenda ibilometero 531, ishobora kuva ku muvuduko wa 0 - 90 km/h mu masegonda atatu, ariko iki kigo kivuga ko kizamenya intera kigenda neza ari uko zagenzuriwe mu Rwanda.

Ni imodoka yakwicarwamo n’abantu kuva kuri batanu kugeza kuri barindwi ubariyemo na shoferi.

Igira uburyo bufasha umushoferi kuyitwara neza hirindwa impanuka, burimo kumubwira ibiri mu muhanda mu mpande ze kugira ngo atagonga na feri yikoresha mu gihe cy’amage.

Igira écran nini imeze nka tablet iri hafi ya volant igenzurirwaho imikorere hafi ya yose y’imodoka n’irindi koranabuhanga rifasha uyitwaye kuryoherwa n’ubwiza bwayo.

Umuyobozi wa Auto24 Rwanda, Ivan Ruzibiza, yavuze ko iryo koranabuhanga ndetse n’uburyo ikunzwe ku Isi ari byo byabasunikiye kuyizanira Abaturarwanda ariko bijyana n’uko biyemeje kugeza mu gihugu imodoka zigezweho ku rwego rw’Isi.

Ati “Turashaka kuzana mu Rwanda imodoka z’amashanyarazi zigezweho tubona mu bihugu bikomeye ku Isi. Si izi gusa tuzanye kuko tuzazana ubundi bwoko bushya bukoresha amashanyarazi.”

Ku ikubitiro iki kigo cyagejeje mu gihugu imodoka ebyiri zo muri ubu bwoko.

Ruzibiza yavuze ko umwaka uzarangira iyi sosiyete izanye bene izi modoka za Tesla zigeze kuri 50, ndetse yifuza ko izaba imaze kwinjiza mu gihugu izikoresha amashanyarazi 100% ziri hagati ya 100 na 150 zifite ibiciro bitandukanye byigonderwa n’Abaturarwanda.

Ushaka iyi modoka ya Telsa Model Y, yayibonera kuva ku bihumbi 58$ kugeza kuri 62$.

Ibara ridahenda cyane ni umukara, rigakurikirwa n’iry’ivu (grey), ayo agakurikira amabara ahenda cyane arimo umweru, ubururu n’umutuku.

Ruzibiza yavuze ko hari izindi modoka ziri mu nzira zizaba ziri mu mabara y’ubururu n’umutuku, bitandukanye n’iz’umukara zagejejwe mu Rwanda.

Igihe zishyizwe ku muriro usanzwe wo mu rugo bishobora gufata amasaha umunani n’iminota 15 kugira ngo zuzure, zashyirwa kuri chargeur yabugenewe bigafata iminota 27.

Ruzibiza yavuze ko ku biro byabo bashyizeho chargeur ifite umuvuduko wa kilowatt 22 ku isaha, bijyanye n’uko iyi Tesla Model Y ifite batiri ikenera kilowatt 75, ukabona ko kugira ngo yuzure bizajya bitwara amaha atatu n’igice.

Tesla Model Y, imodoka ikoresha amashanyarazi ifite ikoranabuhanga rihambaye
Ibirori byo kwakira imodoka za Tesla Model Y byabereye ku cyicaro cya Auto24Rwanda giherereye ku Muhima
Umuyobozi wa Auto24 Rwanda, Ivan Ruzibiza mu modoka ikorwa n'Uruganda rwa Tesla rwashinzwe n'umuherwe Elon Musk
Iyi modoka ifite umwanya wagenewe gushyirwamo imizigo
Aho ni ho hifashishwa mu gushyira umuriro muri Tesla Model Y, haherereye inyuma ku ruhande rw'ibumoso
Imbere n'inyuma Tesla Model Y yagenewe imyanya yo gushyiramo imizigo
Amapine yayo ni uko ameze
Ifite écran nini igenzurirwamo imikorere yayo yose
Tesla Model Y yahawe amapine yihariye ayifasha gukora ibilometero byinshi mu gihe gito
Uyitwaye ayikoresha bijyanye n'uburyo akunda, ibigeraho ikamumenya rimwe ikajya ibyikorera
Buri wese yifuzaga kuyifatiraho ifoto y'urwibutso
Tesla Model Y ifite uburebure bwa metero 4,7, ubugari bwa 2,1 n’ubuhagarike bwa metero 1,6
Aha ni ahagenewe gushyira amazi cyangwa ikawa ku bayikunda, kuko inzoga zo ntizemewe, gutwara wanyoye birahanirwa
Amatara yayo y'inyuma ni uko ameze
Tesla Model Y yazanywe mu Rwanda n'ikigo gicuruza imodoka cya Auto24 Rwanda
Iyi modoka ihuzwa n'ibindi bikoresho by'ikoranabuhanga biyifasha kugira ubwiza buhebuje
Mu mwijima ni uko iba imeze
Imbere yagenewe umwanya wo gushyiramo imizigo
Ifite intebe nziza zikoze mu ruhu
Izi zose zamaze kugurwa
Auto24 icuruza n'izindi modoka ziganjemo iza Hybrid, ni ukuvuga zikoresha lisansi n'amashanyarazi
Umuyobozi Ushinzwe Abakiliya muri Ecobank, Olivier Mpenzi (ibumoso) na mugenzi we wo muri Akagera Business Group mu bari bagiye kwihera amaso imodoka za Tesla zagejejwe mu Rwanda bwa mbere
Abayobozi ba Auto24 Rwanda bari kumwe na bamwe mu bakiliya babo
Umuyobozi wa Auto24 Rwanda, Ivan Ruzibiza agaragaza impamvu bahisemo kubanziriza ku modoka zikorwa n'Uruganda rwa Tesla

Amafoto: Irakiza Yuhi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .