Urubyiruko rwakoze ’application’ ishobora gufasha umuntu kwiga indimi 11

Yanditswe na IGIHE
Kuya 2 Kanama 2020 saa 07:39
Yasuwe :
0 0

Urubyiruko rwakoze application ya telefoni ishobora gufasha umuntu kwiga indimi z’amahanga, itangirana n’indimi 11 ziganjemo izo muri Afurika, ziyongeraho Icyongereza n’Igifaransa.

Ni application umuntu yinjiramo, agahitamo ururimi akeneye kwiga ubundi ikagenda imwereka intambwe akurikiza mu kwiga, ikamuha ibyo yiga ahereye ku by’ibanze nko gusuhuza no kubaza umuntu amakuru, akagenda yunguka amagambo mashya ashobora kumufasha.

Bénit Havugimana na mugenzi we nibo bashinze ikigo Soma Technologies ari nacyo cyatangije iyi application ya Somafri inaboneka muri Google Play Store. Nko mu Kinyarwanda, amagambo amaze kugezwa muri iyi application yose hamwe ni 471.

Havugimana yagize ati "Twabitangiye mugenzi wanjye ambwira ngo aba ashaka kuba yakwiga Lingala ariko umuntu wabimwigisha akaba yamubura, ati mba nshaka kwiga Ikinyarwanda kugira ngo nzaze nsure nk’u Rwanda, ariko ngashaka umuntu kuri internet wabinyigisha nkaba namubura.”

Baje gutekereza uburyo babigeraho bifashishije ikoranabuhanga, ndetse mu kwezi gushize babasha gusoza iyi application.

Uyu musore yarangije muri Kaminuza y’u Rwanda mu bijyanye na mudasobwa, ndetse aza gukora mu kigo Andela, cyigisha ibijyanye no gukora porogaramu za mudasobwa. Ubwo icyorezo cya COVID-19 cyafataga indi ntera, Havugimana na bagenzi be barasezerewe, ahita afata umwanya anoza umushinga we.

Uyu munsi Somafri yaruzuye ndetse ubu abantu bashobora kuyishyira mu matelefoni yabo, bakabasha kwiga indimi zirimo Haussa, Igbo na Yoruba zo muri Nigeria, Kiswahili, Lingala, Zulu, Icyarabu n’izindi. Mu minsi iri imbere ngo zigomba kuba nyinshi kurushaho.

Havugimana yakomeje ati “Niba ndi umunyarwanda nshaka kuyikoresha, nzashyira iyi application muri telefoni, nkoremo konti, ntange amazina yanjye n’ururimi kavukire, mpitemo urundi rurimi nkeneye kwiga, hakaza nk’ahantu hakwereka igisobanuro cy’interuro bitewe n’aho zikoreshwa.”

Muri ubu buryo, harimo interuro umuntu asoma, akerekwa icyo isobanura mu rundi rurimo akeneye, bigaherekezwa n’amajwi atuma umuntu abasha kumva neza uburyo ururimi runaka ruvugwamo.

Gushyiramo amagambo byaragoranye

Havugimana avuga ko mu gushaka amagambo yashyizwe muri iyi application byagoranye, kuko amwe ataboneka kuri internet kimwe n’uko asomwa.

Hifashishijwe abantu baba muri ibyo bihugu kugira ngo hamenyekane amagambo akenewe mu buryo bw’ibanze, n’uko asomwa, ku magambo amwe n’amwe hagakoreshwa uburyo bwo gufata amajwi y’umuntu ayasoma, mu gihe ku zindi ndimi nk’Icyongereza n’Igifaransa, iyo ukeneye kumva uko ijambo risomwa ubifashwa na robot, igatuma wumva neza imivugire y’abenerurimi.

Kwifashisha abantu ngo byatewe n’uko robot zihari zitumva Ikinyarwanda bitewe n’ubushobozi abazikoze bahawe, n’izagerageza kugisoma zakoresha imivugire y’abanyamahanga.

Avuga ko mu buryo gahunda yabo bayiteguye atari ugushaka amafaranga, nk’uko Google cyangwa Facebook umuntu ubikoresha ntacyo yishyuzwa, ariko serivisi zibishamikiraho zikinjiza amafaranga atubutse.

Havugimana yakomeje ati “Umushinga nk’uyu wa porogaramu yakozwe ufata igihe, natwe turizera ko mu mezi ari imbere wenda twazabona nk’umuntu wadutera inkunga akaba yadushyigikira, ku buryo twanoza ibyo tumaze gukora, tukaniga kuko nk’umushinga nk’uyu ukenera ubumenyi buhambaye.”

“Aho harimo kuba twabasha gukoresha robot ikaba yabasha kwakira ijambo ryose yakiriye ikarivuga neza mu Kinyarwanda, noneho bino twagiye dufata amajwi asanzwe bigasimbuzwa robot, ku buryo twafasha abantu gusemura ururimi, ukaba wavana interuro runaka ukarijyana mu rundi, harimo n’ijwi ribisoma.”

Ibyo ngo bizagirwamo uruhare na robot waba uha ijambo, ikarihindura mu zindi zose ushaka, kandi ngo birasaba ubundi bumenyi bwa mudasobwa.

Banateganya gukorana n’inzego zishinzwe ururimi rw’Ikinyarwanda, ku buryo amasomo atangwa aba ashingiye ku mikoreshereze yemewe y’ururimi.

Muri iyi application ya Somafri kandi uretse kwiga, harimo n’uburyo bw’isuzumabumenyi umuntu akora, akaba yahabwa amagambo mu rurimi arimo kwiga, bakamubaza icyo avuze mu rurimi rwe yahisemo ko akoresha neza.

Havugimana avuga ko kuva basohora iyi application ku wa 15 Nyakanga, mu cyumweru cya mbere babonye abantu 50 bayishyize muri telefoni zabo. Ubu bamaze kurenga.

Iyi application ifasha abantu kwiga indimi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .