Umuburo! Abantu 9,000 binjiriwe bagerageza gushaka indirimbo z’abahanzi bakomeye ku Isi

Yanditswe na IGIHE
Kuya 30 Mutarama 2020 saa 04:59
Yasuwe :
0 0

Abajura mu by’ikoranabuhanga bahanze software ibafasha gukoresha amazina y’abahanzi n’indirimbo zahataniye ibihembo bya Grammy Awards 2020 bakinjira mu mikorere ya mudasobwa z’abantu batandukanye.

Software iri gukoreshwa ikoze mu buryo umuntu umanuye (download) indirimbo, mudasobwa ye cyangwa igikoresho yifashishije gifatwa na virusi ituma kibasha kwinjirirwa hanyuma nyiracyo akibwa amakuru y’ibanga akibitsemo.

Ikigo gitanga Ubwirinzi mu by’Ikoranabuhanga cya Kaspersky, cyatahuye ko ibitero by’abashaka kwinjirirwa byazamutseho 39% mu 2019 ugereranyije na 2018; ibyinshi bikoresha amazina n’amasura y’indirimbo n’ibikorwa by’abahanzi batandukanye bafite ibigwi mu muziki.

Abahanzi barimo Ariana Grande, Taylor Swift n’umuraperi Post Malone bari mu bifashishijwe cyane n’abo bajura mu by’ikoranabuhanga bituma abantu benshi binjirirwa mu 2019.

Umuziki benshi bawufata nk’umuti, utanga uburezi ndetse ukananyuzwamo ubutumwa butandukanye. Ibi bituma ubwinshi bw’abawushaka buhura n’abajura mu by’ikoranabuhanga bawunyuramo bifashishije abahanzi b’ibyamamare nyamara bagambiriye gusakaza virusi zabo zizabafasha kwinjira mu bubiko bw’abantu benshi.

Yifashishije ibihembo bikomeye bitangwa mu kugaragaza ubukana bw’ikibazo, abashakashatsi ba Kaspersky basesenguye amazina y’abahanzi n’ay’indirimbo z’abahatanye muri Grammy Awards 2020 nuko ashobora kuba yaribasiwe n’iyo virusi.

Kaspersky yasanze hari ububiko bwakozwe (fichier) 30,982 bufite virusi kandi bwifashishije amazina y’abahanzi cyangwa indirimbo zabo mu gusakaza iyo virusi, yahuye n’izigera ku 41,096 zikoresha Kaspersky.

Ubusesenguzi bwakoze bwasanze Ariana Grande, Taylor Swift na Post Malone ari bo bahanzi bakoreshejwe cyane kuko files zirenga 55% zasanganywe iyo virusi zari mu mazina yabo.

Ibi kandi ni nako byagenze kuri Billie Eilish Pirate Baird O’Connell, umuhanzi uheruka kwegukana ibihembo bitanu bya Grammy Awards. We na Finneas bavukana unamutunganyiriza indirimbo nibo begukanye ibihembo byinshi kuko na we yatahanye bitanu.

Uyu Munyamerika w’imyaka 18 yamamaye mu 2019 ndetse umubare w’abashaka indirimbo zitiriwe izina rye ariko zifite virusi uriyongera cyane ugereranyije na 2018 kuko wavuye 254 ugera kuri 2171.

Mu gihe abantu binjiriwe na virusi yavuye mu ndirimbo zitiriwe Billie Eilish muri Nigeria bari 381 mu 2018 bageze kuri 9,722 mu 2019. Muri rusange, mu mwaka wa 2019 Nigeria yahuye n’ibitero 94,630.

Indirimbo abajura mu by’ikoranabuhanga bagize iturufu yo kwinjirira mu bubiko bw’abantu mu 2019 zirimo ‘Sunflower’ ya Post Malone ‘Talk’ ya Khalid na ‘Old Town Road’ ya Lil Nas X.

Abahanga mu by’ikoranabuhanga bagaragaza ko mu kwirinda ko wakwinjirirwa na virusi mu gihe cyo kumva umuziki cyangwa kumanura indirimbo ugomba gukoresha serivisi zizewe nka Apple Music, Spotify Premium na Amazon Music cyangwa ugakoresha urubuga ruzwi ruriho indirimbo z’ubuntu rukwemerera kuzibona byemewe.

Ni ngombwa kwirinda link zishidikanywaho, zizeza kubona umuziki wihariye. Ni byiza gukurikirana imbuga nkoranyambaga zizewe z’abahanzi kugira ngo umenye niba amakuru atangwa ari impamo.

Umuhanzi Billie Eilish ari mu bifashishijwe n'abajura mu by'ikoranabuhanga bashaka kwinjiza virusi mu bikoresho [telefoni na mudasobwa] by'abashaka indirimbo ze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .