Uko wakwirinda ibitero by’ikoranabuhanga mu Isi ya none

Yanditswe na IGIHE
Kuya 16 Nyakanga 2020 saa 09:05
Yasuwe :
0 0

Mu gihe gukoresha ikoranabuhanga bikomeje gutera imbere, abantu bakwiye kuzirikana ko hari n’ababa barekereje ngo barikoreshe biba cyangwa bangiza, ibyo bita ibitero by’ikoranabuhanga.

Kugira ngo umuntu agabe igitero cy’ikoranabuhanga abanza gushaka amakuru y’ahantu azakigaba. Ababigaba babanza kumenya email z’abakozi bamwe na bamwe, website y’ikigo, ubwoko bwa internet bakoresha kugira ngo bamenye aho bahera bakurikije ibyaborohera n’ibyabagora.

Kugaba ibyo bitero bikorwa mu buryo butandukanye burimo kuba ubikora yakohereza ubutumwa ku muntu yabonye ko afite ayo makuru ashaka, yabufungura akaba amuhaye uburenganzira bwo kwinjira mu mabanga ye cyangwa ay’ikigo.

Hari abandi bakwirakwiza ubutumwa bavuga ko bafite imitungo barazwe cyangwa amafaranga menshi bazigamiwe n’ababyeyi bashaka kuyabanyuzaho, kugira ngo ababubonye babufungure kandi ari uburyo bwo kwinjira mu mabanga yabo.

Mu kiganiro IGIHE yagiranye n’Umuyobozi w’Ikigo gifasha kurinda umutekano w’Ikoranabuhanga mu bigo bitandukanye, Intore Security Lab, Nyawakira Kevin, yavuze ko ushaka kukugabaho igitero aguha ubutumwa usabwa gufungura afite icyo agamije.

Yagize ati “Abantu batera ibitero by’ikoranabuhanga kenshi bakubwira ngo soma aya amakuru runaka, nukanda kuri iyi link irakujyana kuri Facebook nabyo bikujyane ku rubuga runaka. Bashobora kuguha link ukagira ngo ni Facebook nyamara ubikora biramuha amahirwe yo kujyana konti yawe.”

Muri rusange igihe cyose telefoni cyangwa mudasobwa iriho internet nyirayo aba afite ibyago byo kwinjirirwa mu mabanga. Ibyo bisaba ko umuntu amenya kubana n’ibikoresho by’ikoranabuhanga kugira ngo akoreshe internet anirinda.

Ubwirinzi bw’ibanze ni uko umuntu yarinda ibikoresho bye by’ikoranabuhanga, kwirinda gufungura link yohererejwe atazi iyo ivuye no gukoresha ijambo banga rikomeye (Strong Password) ndetse na anti-virus zizewe.

Yakomeje avuga ati “Kugira ngo wirinde ibyo bitero by’ikoranabuhanga icya mbere ni uko wakwirinda guha telefoni umuntu uwo ariwe wese, ikindi ikaba irimo umubare w’ibanga kandi ukomeye atari imwe bavuga ngo kuva kuri 1 kugeza kuri 6 ibyo ni bya bintu umuntu ashobora gutomboza.”

Kubera iterambere ry’ikoranabuhanga ibitero byaryo binabaho hagati y’ibihugu n’ibindi. Mu 2010 hamenyekanye Virusi yitwa ‘Stuxnet’ bikekwa ko yakoreshejwe mu gitero Israel yagabye ku ruganda rw’ingufu za nucléaire muri Iran.

Ni nyuma y’ikindi gitero cyatewemo virusi yitwa WannaCry mu 2017 yangije mudasobwa zigera ku bihumbi 300 mu bihugu 150 ku Isi gisiga ibitaro, ibigo by’ubucuruzi n’amabanki amwe mu bibazo bikomeye.

Icyo gihe Leta Zunze Ubumwe za Amerika n’u Bwongereza zashinje Korea ya Ruguru kuba inyuma y’ibyo bitero.

Mu bwirinzi ibihugu bigira icyitwa Security Operation Center (SOK) aho igihugu kibasha kubona hakiri kare ibitero biri gutegurwa kukigabwaho, cyangwa amakuru ari kugerwa amajanja, kigakaza ubwirinzi.

Ku rundi ruhande iyo mudasobwa cyangwa telefoni y’umuntu bitari kuri internet nta kibazo umuntu aba afite cyo kuba yakwinjirirwa.

Umuyobozi w’Ikigo gifasha kurinda umutekano w’Ikoranabuhanga mu bigo bitandukanye, Intore Security Lab, Nyawakira Kevin, yavuze ko abantu batera ibitero by’ikoranabuhanga kenshi basaba abantu gusoma amakuru runaka
Iterambere ry'Isi rituma ibitero by’ikoranabuhanga bigabwa byiyongera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .