00:00:00 IGIHE NETWORK KN KINYARWANDA EN ENGLISH FR FRANCAIS

Ubushobozi bwa AI mu kugaragaza amarangamutima bukomeje gukemangwa

Yanditswe na Nshuti Hamza
Kuya 5 June 2024 saa 06:52
Yasuwe :

Kimwe mu byuho byakomeje kugaragazwa mu mikorere y’Ubwenge Bukorano (Artificial Intelligence, AI) ni ukugaragaza amarangamutima no gushyira mu nyurabwenge ibyo iryo koranabuhanga rikora.

Ibyo ni ibintu umuntu akora mu buryo bumworoheye cyane, ariko bikomeje kuba ihurizo kuri AI abashakashatsi bashakaga kugaragaza nk’ifite ububasha bwo gukora iby’abantu basanzwe bakora byose.

Mu bwumvane (communication) hagati y’umuntu n’undi cyangwa umuntu n’inyamaswa, kugaragaza amarangamutima haba mu ijwi cyangwa mu myitwarire bifite ikintu kinini bisobanura, bitewe n’aho ari, icyabaye, cyangwa icyo ashaka.

AI nayo ushobora kuyibwira kugutangira ubutumwa, ariko ntiyabasha kumenya aho igera ikavuga iseka, irira, ivugira hasi cyangwa hejuru, cyangwa ngo yisegure ku muntu igihe ubutumwa imuhaye bumukomerekeje kuko ntiyabasha kumenya uko abwakiriye.

Ubushakashatsi buherutse gukorwa n’abarimo Andrea Cuadra wigisha muri Stanford University, bwerekanye ko nubwo AI ishobora kugaragaza amarangamutima mu gihe itanga ubutumwa bumwe na bumwe, impungenge zikiri zose kuko itabasha kumenya uwo kwereka impuhwe n’uwo kutazereka.

Cuadra yabigereranyije n’inkota ifite ubugi bukeba ku mpande zose.

Abo bashakashatsi bemeje ko icyo ari ikibazo gikwiye kwitabwaho mu maguru mashya kubera uko abantu batandukanye bafata ibyo AI ikora, n’uburyo amabwiriza agenga imikoreshereze y’iryo koranabuhanga usanga ari hafi ya ntayo mu bihugu byinshi.

Impamvu y’iyo mpuruza ni uko muri iyo nyigo byagaragaye ko iyo AI ihaye ubutumwa umuntu burimo amarangamutima, iyo ayibwiye uwo ari we itagira icyo ihindura ku byo imubwira, ibyo basanga byatuma bamwe bumva bakorewe ivangura cyangwa bibasiwe.

Abo bashakashatsi bagaragaje ko hakenewe ko abakora AI bakwiye gushyiraho uburyo bwo kuzibuza kuvuga ku ngingo zo kwitondera, kugira ngo zitajya ziteza ibibazo kuri bamwe mu bazikoresha.

Mu bintu 65 bitandukanya abantu byahimbwe n’abashakashatsi hashingiwe ku ngingo 12 z’ingenzi zirimo ubwoko, igitsina, imitekerereze na politiki; inyigo yasanze AI itanga ibisubizo bishobora guteza ikibazo ku bijyanye n’ihohoterwa, ubuzima bwo mu muntwe, no gushyira ku nkeke.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .