Telefoni za mbere za Huawei zakumiriwemo porogaramu za Google zirashyirwa ku isoko

Yanditswe na Ishimwe Israel
Kuya 19 Nzeri 2019 saa 01:19
Yasuwe :
0 0

Sosiyete ya Huawei ikomeye mu by’Ikoranabuhanga n’Itumanaho, kuri uyu wa Kane irashyira ku isoko telefoni zo mu bwoko bwa Mate 30 na Mate 30 Pro zidafite zimwe muri porogaramu za Google.

Telefoni z’iyi sosiyete y’Abashinwa ziramurikirwa mu Mujyi wa Munich mu Budage.

Ni iza mbere Huawei igiye gushyira ku isoko nyuma yo gukomanyirizwa na Leta Zunze Ubumwe za Amerika muri Gicurasi 2019, aho bimwe mu bikoresho byayo bitemerewe gukoresha zimwe muri porogaramu na serivisi za Google.

Izingiro ry’ikibazo cya Amerika na Huawei ni uko iki gihugu cy’igihangange ku Isi cyagaragaje impungenge zo kuba u Bushinwa (aho Huawei ibarizwa) bushobora kwifashisha ibikoresho byayo mu kuneka ibihugu n’ibigo bitandukanye.

Telefoni za Mate 30 zifite porogaramu y’ikoranabuhanga ’Operating System’ ya Android ya Google ariko ntabwo zishobora gukoresha ububiko bwayo buzwi nka Google Play Store cyangwa izindi porogaramu nka YouTube, Gmail na Google Maps.

Bitewe no kuba izi telefoni hari serivisi zitandukanye zidafite, hari impungenge ku mubare w’abazigura ku isoko mpuzamahanga.

Mu ntangiriro z’umwaka, Umuyobozi wa Huawei, Ren Zhengfei, yatangaje ko telefoni iyi sosiyete icuruza ku Isi zamanutseho 40% mu kwezi nyuma y’ibihano bya Amerika.

Ubushakashatsi bwakozwe n’Ikigo cyo mu Bwongereza cya IHS Markit bwagaragaje ko Huawei yari ifite isoko rya telefoni rikomeye ku Mugabane w’u Burayi.

Huawei yohereje telefoni miliyoni 26.3 mu Burayi mu 2018, zizamutseho 60% ugereranyije n’umwaka wabanje.

Umusesenguzi Thomas Husson ukorana n’Ikigo cy’Ubushakashatsi cya Forrester yavuze ko telefoni za Mate 30 zizafasha Huawei guhangana ku isoko ry’u Bushinwa ariko hanze yabwo izakomeza kugongwa n’ibura rya serivisi za Google Play Store.

Yakomeje ati “Ishoramari rya Huawei ku Mugabane w’u Burayi riri mu kaga.’’

Muri Kanama 2019, Huawei yamuritse porogaramu yayo yihariye ya Harmony OS ariko iyi sosiyete yatangaje ko itazakoreshwa muri telefoni ahubwo kuri ubu yagenewe televiziyo n’ibindi bikoresho by’ikoranabuhanga.

Abasesenguzi bagaragaza ko Huawei igiye kwinjira mu bihe bishobora kuyigora byo kugurisha telefoni zidafite porogaramu za Google nubwo hari uburyo umuntu ubwe ashobora kuzibona (download) akazikoresha.

Telefoni za Huawei nshya zifite camera nziza kandi zigezweho. Zifite ikoranabuhanga rishobora kwakira internet inyaruka ya 5G.

Ibiciro bya telefoni ntibiratangazwa gusa bishobora kuba byisumbuyeho kuri Mate 20 yagurwaga $882 na Mate 20 Pro ya $1,158 ku isoko ry’u Burayi.

Huawei igiye gushyira ku isoko Mate 30 itarimo Porogaramu za Google

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza