Robot yitwa Sophia yahuye na Minisitiri w’Intebe wa Ethiopia

Yanditswe na IGIHE
Kuya 3 Nyakanga 2018 saa 08:14
Yasuwe :
1 0

Sophia, imashini muntu (robot) imaze kwamamara mu biganiro bitandukanye, yahuye na Minisitiri w’Intebe wa Ethiopia, Abiy Ahmed.

Bahuye ku wa Mbere, tariki ya 2 Nyakanga 2018, mu murwa mukuru Addis Abeba, nyuma yo kongera kubona bimwe mu bice by’iyi robot byari byatakaye ku kibuga cy’indege cya Frankfurt mu Budage.

Kubura kw’igikapu cyari kirimo bimwe mu bice bya Sophia, byatumye haburizwamo ikiganiro iyi mashini yagombaga kugirana n’abanyamakuru mu nzu ndanagamurage ya Ethiopia ku wa Gatanu w’icyumweru gishize.

Nk’uko tubikesha CGTN, ibyo Sophia yaganiriye na Minisitiri w’Intebe Abiy ntabwo biratangazwa.

Iyi mashini muntu yakozwe n’Ikigo cyo muri Hong Kong cyitwa Hanson Robotics mu 2015. Ikorwa yahawe ubushobozi bwo kuvuga no gukoresha ururimi rw’Icyongereza ariko yaje no kongerwamo Amharic, ururimi rukoreshwa muri Ethiopia.

Ntabwo mu kuganira iyo mashini iba ifite ibisubizo biyibitsemo ahubwo yifitemo uburyo bwo kumenya ibyo abantu bari kuvuga igatanga igisubizo igendeye ku byo yumvise cyangwa ibonye.

Iyi mashini muntu yamenyekanye cyane mu Ukuboza 2017 ubwo yemererwaga ubwenegihugu bwa Arabia Saoudite.

Minisitiri w’Intebe wa Ethiopia, Abiy Ahmed, yahuye na Robot yitwa Sophia

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .