00:00:00 IGIHE NETWORK KN KINYARWANDA EN ENGLISH FR FRANCAIS

RICTA yatangije ipaki y’ikoranabuhanga igenewe ibigo bito n’ibiciriritse

Yanditswe na IGIHE
Kuya 1 June 2022 saa 12:41
Yasuwe :

Ikigo gihagarariye abakoresha murandasi no guteza imbere Indangarubuga y’u Rwanda [RW], RICTA, cyashyize ahagaragara ipaki yitwa ‘AkadomoRW social media package’ igamije gufasha abafite imishinga mito n’iciriritse hagamijwe kumenyekanisha ibyo bakora binyuze ku mbuga nkoranyambaga.

Iyi paki izubakira ku byagezweho mu bukangurambaga bugera kuri bubiri bwiswe "Nahisemo" na "Zamuka na AkadomoRW", bwari bugamije gushishikariza ibigo byo mu Rwanda kwifashisha no gukoresha indangarubuga [.RW] nk’izina ry’ibanze ku Banyarwanda.

Hamwe n’ubukangurambaga bwa “Zamuka na Akadomo RW” ubucuruzi bwinshi bwo mu Rwanda bwarushijeho kugaragara kuri internet.

RICTA muri iki gihe iratanga ipaki yoroshye kandi ihendutse ifite uburyo bwo gukoresha imbuga nkoranyambaga ziriho abantu basaga miliyoni mu Rwanda ku rubuga rumwe.

Iyi paki ntabwo igenewe gusa ubucuruzi busanzwe bugurisha ku mbuga nkoranyambaga nka Instagram, WhatsApp, Facebook ahubwo ireba n’ubushya bwiyemeza gutangira kugurisha bukoresheje imbuga nkoranyambaga.

Umuyobozi Mukuru wa RICTA, Grace Ingabire Mwikarago, yavuze ko ’AkadomoRW Social media package’ ari nk’igikoresho cyoroheye buri wese kandi kidahenze cyakozwe mu guha imishinga mito n’iciriritse mu Rwanda urubuga rwo gukora ubucuruzi mu buryo bw’ikoranabuhanga rihendutse rushobora kuzamura ibicuruzwa bitabaye ngombwa ko hubakwa urwihariye.

Ati “Iyi paki izaha ubucuruzi kurushaho kugaragara ku mbuga nkoranyambaga no kubafasha kugurisha ibicuruzwa byabo na serivisi kuri Facebook, WhatsApp na Instagram mu gihe bazungukira no ku bindi bintu nk’indangarubuga y’u Rwanda (.RW), aderesi ya google na email imwe y’ubucuruzi”.

Yakomeje agira ati "Turizera ko iyi paki itoroheye abantu gusa, ahubwo izafasha n’abakiliya kuko bazajya bakorana ubucuruzi mu buryo butaziguye. Ibi bizatuma habaho inyungu ku bucuruzi no ku bakiriya.”

Muri iki gihe aho guhahira ku ikoranabuhanga byabaye nka gahunda y’umunsi, ubukangurambaga bushya bwa RICTA bwibanda ku bucuruzi bushya n’ubukora bukeneye kunguka byihuse binyuze mukongera uburyo bwo kubugaragaza ku ikoranabuhanga bishobora gutuma hagurishwa ibicuruzwa byinshi.

Mu zindi nyungu, ni uko imbuga nkoranyambaga zoroshye kugaragaza ibicuruzwa kurusha gukoresha urubuga rwa Website.

Ingabire yakomeje atii "Turizera ko iki ari igitekerezo cyiza ku bigo bito n’ibiciriritse bikomeje gukira ingaruka za Covid-19 n’umwanya mwiza wo guteza imbere ubucuruzi bwo kuri murandasi mu Rwanda."

Iyi paki abacuruzi bazabasha kuyibona ku giciro cy’ibihumbi 30.000 Frw ku mwaka. Ntibikubiyemo uburyo umukiliya ashobora kwishyura ariko ashobora kwivuganira n’umucuruzi bakemeranya uburyo bwo kumwishyura.

RICTA ni Ikigo kidaharanira inyungu gihagarariye iz’abakoresha murandasi mu Rwanda. Cyashinzwe hagamijwe kuzamura no guteza imbere imikoreshereze ya murandasi mu Rwanda. Iki kigo cyashinzwe mu 2005 gifite intego yo gucunga indangarubuga ya [.RW] hamwe n’uburyo bwo guhererekanya amakuru atanyuze hanze y’igihugu, Rwanda Internet Exchange Point (RINEX).

RICTA yatangije ipaki y’ikoranabuhanga igenewe ibigo bito n’ibiciriritse
Iyi paki abacuruzi bazabasha kuyibona ku giciro cy’ibihumbi 30.000 Frw ku mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .