Perezida Kagame yakomoje ku cyuho cya Covid-19 mu burezi kubera internet idahagije

Yanditswe na Dufitumukiza Salathiel
Kuya 22 Werurwe 2021 saa 09:34
Yasuwe :
0 0

Perezida Kagame yagaragaje ko uburezi ari rumwe mu nzego zazahajwe cyane n’icyorezo cya Covid-19, by’umwihariko kubera icyuho kiri mu kugeza internet kuri bose.

Yabitangaje kuri uyu wa Mbere mu Nama ya Komisiyo y’Umurongo mugari wa Internet (Broadband Commission), ishinzwe kugeza umuyoboro wa internet kuri bose hagamijwe kugera ku iterambere rirambye.

Ni inama yabaye ku gicamunsi cyo kuri uyu wa 22 Werurwe 2021 mu buryo bw’ikoranabuhanga, ku nsanganyamatsiko igira iti “Kubaka ahazaza h’ikoranabuhanga ridaheza nyuma ya COVID-19.”

Perezida Kagame yavuze ko bishimishije uburyo ikoreshwa ry’umurongo mugari wa internet ryatumbagiye mu gihe cy’icyorezo cya Covid-19, ahanini bishingiye ku kuba abantu batari bemerewe guhurira hamwe nka mbere mu rwego rwo kwirinda icyorezo.

Icyakora, Perezida Kagame yavuze ko uko gukoresha internet cyane byatumye icyuho cy’abayikoresha n’abatayikoresha cyigaragaza cyane, byumvikana ko hari abatarabashije kujya kuri internet kandi ariho ubuzima bwasaga n’ubwimukiye.

Yagize ati “Mu gihe ubuzima bwarushagaho kwimukira kuri internet, icyuho cy’abakoresha ikoranabuhanga n’abatarikoresha cyarushijeho kwigaragaza. Byaragaragaye cyane mu burezi. Mu gihe amashuri asanzwe aho kwiga imbonankubone byari bifunze, hari umubare munini w’abanyeshuri batabashije kwigira kuri internet. Hari benshi bamaze umwaka batiga.”

No ku babashije kubona internet bagakomeza kwiga, Perezida Kagame yavuze ko bari bakeneye gukurikiranirwa hafi kugira ngo hatagira ikibahungabanya bari kuri internet.

Ati “Mu gihe kandi abana bamara umwanya munini kuri internet, tugomba guharanira ko bahaba batekanye. Ni yo mpamvu gahunda y’ibikorwa ya Komisiyo y’umurongo mugari wa Internet mu guhangana na Covid-19 ishingiye ku ngingo eshatu ari zo Internet ihamye, igera kuri bose kandi itekanye.”

Perezida Kagame yavuze ko nyuma y’uko ibihugu byinshi ku Isi bitangiye gukingira abaturage babyo Covid-19, icyizere gihari ko icyorezo gishobora kurangira ubuzima bugasubira uko bwahoze.

Icyakora, yavuze ko hagikenewe imbaraga kugira ngo ubukungu bwongere kuzahuka ariyo mpamvu hakenewe ishoramari rihamye hifashishijwe ikoranabuhanga.

Ati “Mu gihe inkingo ziri kugera mu bihugu byinshi, biragaragara ko Covid-19 izarangira ariko urugendo ruracyari rurerure mu guteza imbere ubukungu. Ni umwanya wo gushyira hamwe kugira ngo umurongo mugari wa internet ugere kuri bose, maze ishoramari ryiyongere ntawe usigaye.”

Iyi nama kandi yitabiriwe n’Umuyobozi Mukuru w’Ishami ry’Umuryango w’Abibumbye rishinzwe Umuco n’Uburezi (UNESCO), Audrey Azoulay; Umunyamabanga Mukuru w’Umuryango Mpuzamahanga w’Ikoranabuhanga (ITU), Houlin Zhao n’Umuyobozi wa Sosiyete ya Telmex iteza imbere Ikoranabuhanga hashakishwa ibisubizo by’ibibazo byugarije rubanda, Carlos Slim Helu.

Yibanze ku guhindura ikoranabuhanga ry’Isi binyuze mu kuzahura uburyo bw’itumanaho, kurizanamo udushya n’ingamba nshya, kuvugurura amabwiriza arigenga, kumenyereza abaturage kurikoresha baka cyangwa bahabwa serivisi no gukora za porogaramu.

Ibyo byitezweho gukomeza kuzamura urwego rw’ikoranabuhanga rikagera ku bo mu ngeri zose kandi rikabafasha kwiteza imbere.

Komisiyo y’Umurongo mugari wa Internet yatangijwe na ITU ifatanyije na UNESCO mu 2010, nk’ikiraro gihuza abafite ikoranabuhanga riciriritse n’abafite iriteye imbere, rigahuzwa hagamijwe kugera ku iterambere rirambye.

Iyo Komisiyo itumira abakuru b’ibihugu na za guverinoma, abayobozi b’ibigo mpuzamahanga n’ab’inganda, impuguke ndetse n’abafata ibyemezo mu nzego nkuru; bakayisangiza ibitekerezo bishobora kongerera ingufu ishyirwa mu bikorwa rya gahunda y’Umuryango w’Abibumbye yo kugera ku iterambere rirambye mu 2030.

Perezida Kagame yavuze ko icyuho cya internet itagera kuri bose cyagize ingaruka zikomeye ku burezi mu gihe cya Covid-19
Abayobozi batandukanye bitabiriye inama igamije kugeza Umurongo mugari wa Internet kuri bose
Iyi nama yigaga ku ruhare rw'umurongo mugari wa internet mu gufasha Isi kwigobotora ingaruka za Covid-19

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .