Microsoft yemeye ko Windows 10 yagize ibibazo bituma uyikoresha abura internet

Yanditswe na IGIHE
Kuya 20 Nyakanga 2020 saa 08:59
Yasuwe :
0 0

Ikigo cy’ikoranabuhanga Microsoft cyemeje ko porogaramu ya Windows 10 yifashishwa n’abakoresha mudasobwa, by’umwihariko iyavuguruwe muri Gicurasi 2020, ifite ibibazo byo kuba yatakaza internet, kandi ihari ndetse ihagije.

Uko Windows 10 igenda ivugururwa ijyanishwa n’igihe (update) yagiye igaragaza ibibazo byihariye bigashakirwa umuti, ariko bimwe ntibirangira. Ubu noneho bireba Windows 10 yo mu 2004 yakorewe amavugurura muri Gicurasi 2020.

Bamwe mu bakoresha Windows 10 ngo bagiye babona ikimenyetso ko nta internet bafite, kiza hamwe kuri mudasobwa ubonera niba ufite internet ukabona uturongo igihe urimo gukoresha internet nziramugozi (WiFi) cyangwa ikimenyetso cya mpandenye igihe ukoresha iy’umugozi (Ethernet).

Mu gihe Windows 10 ikubwiye ko nta internet ufite, nyamara hari ubwo iba ihari kuko niba urimo gukoresha porogaramu igufasha gushakisha ibintu ku mbuga zinyuranye (browser) yo izakomeza ikore, ariko kubera ko Windows 10 yakubwiye ko nta internet ifite, applications ziyishamikiyeho ntizikora.

Mu zihagarara gukora harimo nk’ishakiro rya Cortana, Microsoft 365, OneDrive cyangwa Microsoft Store, imikino inyuranye n’uburyo bufasha mu kumva cyangwa kureba ibintu hifashishijwe internet nka Spotify.

Ikindi ni uko n’inzira yashyizweho na Microsoft izwi nka Windows 10 Feedback Hub, ituma umuntu abamenyesha ikibazo cyose arimo guhura nacyo, nayo idakora.

Umwe mu bayobozi ba Microsoft mu bijyanye n’ikoranabuhanga yemeje ko icyo kibazo gihari, ndetse bari kugikoraho iperereza ariko nta muti uraboneka. Ni ibintu byatumye abakoresha Windows 10 batangira gushaka uburyo bwabafasha mu gihe bahuye n’icyo kibazo.

Harimo kunyura mu ishakiro rya Window ukandikamo ‘Registry Editor’, ukinjiramo ubundi ugakurikira inzira “HKEY_LOCAL_MACHINE\SYSTEM\CurrentControlSet\Services\NlaSvc\Parameters\Internet”

Iyo ugezemo uhitamo “EnableActiveProbing” ahari 0 akahashyira 1, ubundi ugakanda ‘OK’, ugahita ufunga. Icyo gihe usabwa gutangiza mudasobwa bundi bushya, ikibazo kikaba gikemutse.

Ni uburyo bushobora gutanga igisubizo by’igihe gito, ndetse hari abahurira ku mbuga z’ikoranabuhanga bavuga ko babikoze ntibitange umusaruro. Hategerejwe kureba niba igenzura rya Microsoft rizatanga umuti uhamye.

Ni inshuro ya kabiri ivugurura rya Windows 10 rizanye ibibazo byo gukuraho internet bya hato na hato mu mezi atatu ashize.

Ibindi bibazo byagiye bishamikira ku kujyanisha n’igihe Windows 10 birimo ko hari imikino yagiye ihagarara, amakuru y’umuntu agatakara, mudasobwa ntibashe gukorana n’ibyuma bisohora inyandiko ku mpapuro (printers) n’ibindi.

Microsoft yemeye ko Windows 10 ifite ikibazo gikomeye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .