Inyungu ba rwiyemezamirimo bato biteze nyuma yo gutyariza ubumenyi muri 250 StartUps (Amafoto na Video)

Yanditswe na Ishimwe Israel
Kuya 31 Nyakanga 2019 saa 03:21
Yasuwe :
0 0

Muri Kamena 2018 nibwo hatangijwe umushinga wa ‘250Startups’ ufasha ba rwiyemezamirimo bari mu by’ikoranabuhanga kubona ubumenyi butuma bagura ibyo bakora.

Ni gahunda yashyizweho mu gukemura ikibazo cyatumaga imishinga y’ikoranabuhanga idindira itararenga umutaru.

Urugaga rw’Abikorera (PSF) rufatanyije n’Ikigo cy’u Buyapani gishinzwe Iterambere, JICA n’icy’Igihugu gishinzwe Ikoranabuhanga mu Itumanaho n’Isakazabumenyi (RISA) ni byo bishyira mu bikorwa uwo mushinga.

‘250 Startups’ ntitanga inkunga y’amafaranga, ahubwo iha abafite udushya bahanze ubumenyi bakeneye ngo babashe kwiyubaka no kubahuza n’abashoramari.

Kuri ubu ba rwiyemezamirimo 18 ni bo bamaze guhugurwa ku bijyanye no kunoza imikorere mu mishinga ifitiye inyungu sosiyete.

Mu biganiro bikorwa buri kwezi bizwi nka Capital Talk/Market Talk bigaruka ku isoko n’ishoramari byabereye i Kigali ku wa 25 Nyakanga 2019, ba rwiyemezamirimo bagaragaje inyungu bakuye mu bumenyi bahawe n’uko bazayikoresha.

Semafara Joseph yavuze ku mvano yo gushinga ikigo cya Solve IT gitanga ubumenyi ku banyeshuri biga ikoranabuhanga bashaka kwimenyereza umwuga.

Yagize ati “Ubwo nasozaga amashuri yisumbuye byambereye ikibazo kubona aho kwimenyerereza umwuga. Nagize igitekerezo cyo gutangiza gahunda yanjye yo gufasha abanyeshuri kubona aho bahererwa ubumenyi.’’

Solve IT ifite umwihariko wo gutanga ubumenyi bwuzuza ubutangirwa mu mashuri na kaminuza zo mu Rwanda. Iki kigo cyatangiranye n’abanyeshuri 60 mu 2017, cyakiriye 300 mu 2018.

Uwizeye Tadhim washinze Olado ikora ubucuruzi bwo kuri internet yagaragaje ko yungutse ubumenyi buzamufasha kwiteza imbere.

Yagize ati “Iyi porogaramu yaradufashije cyane. Twatangiye tuvuye mu kazi duhita twisanga mu ishoramari kandi hari byinshi umuntu aba atazi. Badufashije gushyira ku murongo ibitekerezo byacu, bakatwereka n’inzira ducamo. Mu gutangira hari ibigutega rimwe na rimwe bikaba byanagusubiza hasi. Iyi porogaramu igufasha gukora amahitamo akwiye, ukamenya uko wita ku bakiliya n’ibindi.’’

Olado ni urubuga ruhuza abacuruzi n’abakiliya binyuze kuri internet, rushyirwaho ibicuruzwa n’ibiciro byabyo ku buryo umuntu ukibengutswe agitumiza akakigezwaho iwe mu rugo.

Capital Talk ni ibiganiro ba rwiyemezamirimo bamurikiramo uko imishinga yabo ihagaze n'ingano y'amafaranga ikeneye ngo yagurwe

Ibiganiro bihuza ba rwiyemezamirimo n’abashoramari biba buri kwezi harebwa intambwe bateye mu mishinga yabo itandukanye.

Umuyobozi wa North Harvest Ltd itanga serivisi yo gucuruza inyanya n’imbuto ibinyujije muri Park and Pick, Iragena Segond Fidens, yavuze ko amahugurwa yamufashije kunoza uko asobanura umushinga we.

Yagize ati “Ibikorwa nk’ibi biba bigamije kuduhuza n’abashoramari b’Abanyarwanda bumva neza uburyo bwo gushora imari mu mishinga mito izamuka ikoresheje ikoranabuhanga.’’

Park and Pick yashibutse mu gitekerezo Iragena yagize nyuma yo kubona umukozi wo mu rugo wagonzwe avuye guhaha inyanya, atekereza ko mu kugabanya izo mpanuka hakwiye uburyo bw’ikoranabuhanga ibyo bicuruzwa byajya bitumizwamo bikagezwa mu rugo byoroshye.

Umuyobozi wa 250 StartUps, Shyaka Charles, yavuze ko uru rubuga rufasha urubyiruko na ba rwiyemezamirimo bafite imishinga izana impinduka muri sosiyete.

Ati “Uyu mushinga utanga ubufasha bwo kunononsora ibikorwa no kubyagura mbere yo kubigeza ku isoko. Dufasha ba rwiyemezamirimo bahanze uburyo bwo gukemura ibibazo bakoresheje ikoranabuhanga.’’

250 StartUps kandi ifasha abize ibijyanye n’Amategeko n’Icungamari gukorana na ba rwiyemezamirimo mu imenyerezwa ry’amezi atandatu, aho babaha ubufasha bujyanye n’ibyo bize.

Uyu mushinga wiyemeje gufasha ba rwiyemezamirimo gutekereza ku isoko ryagutse rizatuma bagwiza abakiliya baha serivisi zabo.

Shyaka yavuze ko “Ibigo bine bya mbere byoherezwa mu bindi bihugu aho ba nyirabyo bigira uko banoza imikorere.’’

Mu mishinga yanyuze muri ‘250 StartUps’ harimo uw’ ikoranabuhanga rizwi nka AICOS ryifashishwa mu micungire y’amakoperative mu Rwanda. Ikigo cya Extra Technologies kirigenzura cyashinzwe na Muhiza Frank giheruka kwegukana igihembo cya $5000 mu marushanwa akomeye azwi nka DataHack4FI Innovation.

Umushinga ‘250Startups’ ufite intego yo kuba mu 2025 waragize uruhare mu gutuma ibigo bisaga 100 bigira agaciro ka miliyoni $50.

Uwizeye Tadhim ubwo yasobanuraga umushinga we. Olado yatangiye mu Ugushyingo 2017 nyuma yo kwishyira hamwe k'urubyiruko rwashatse gutanga umusanzu wo gufasha abacuruzi kumenyekanisha ibyo bakora no korohereza abakiliya kubibona
Semafara Joseph washinze Solve IT yavuze uko yagowe no kubona aho kwimenyerereza umwuga agisoza amashuri akanzura gushinga ikigo gifasha abafite icyo kibazo
Iki gikorwa cyitabiriwe n'abantu batandukanye barimo ba rwiyemezamirimo n'abashoramari baturutse mu nzego zinyuranye
Irankunda Dieudonne watangije the the Einstein asobanura imiterere y’umushinga we ugamije gukusanya inkunga ifasha abababaye
Iki gikorwa cyamurikiwemo imishinga igamije gukemura ibibazo biri muri sosiyete ariko yifashishije ikoranabuhanga
Umuyobozi wa 250 StartUps, Shyaka Charles yavuze ko uyu mushinga ugikeneye amaboko y'abafatanyabikorwa mu kurushaho kugera ku ntego zawo
Iragena Segond Fidens yatangije Park and Pick ashaka korohereza abantu kugerwaho n'imboga n'imbuto badatakaje umwanya bajya mu masoko
Umuyobozi wa 250 StartUps, Shyaka Charles, yavuze ko ubunini bw'ikibazo umushinga w'ikoranabuhanga uzakemura aribwo butuma utoranywa mu igomba kongererwa ubumenyi

Amafoto: Dushimimana Ami Pacifique

Video: Tumukunde Nadine


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza