00:00:00 IGIHE NETWORK KN KINYARWANDA EN ENGLISH FR FRANCAIS

Ibirimo telefone na mudasobwa byakoze bya miliyoni 12 Frw byafashwe nk’ibidafite inkomoko izwi

Yanditswe na Akayezu Jean de Dieu
Kuya 26 Ukuboza 2022 saa 05:38
Yasuwe :

Ikigo cy’Igihugu gishinzwe Ubugenzuzi bw’Ubuziranenge, Ihiganwa mu Bucuruzi no kurengera Umuguzi (RICA) gikomeje kugenzura abacuruza ibikoresho by’amashanyarazi n’iby’ikoranabuhanga byakoreshejwe hirya no hino mu gihugu kireba niba bafite impushya zibemerera gukora.

Ubu bugenzuzi bw’ibicuruzwa biri ku isoko bukorwa ku bufatanye na Polisi y’u Rwanda n’izindi nzego. Ni ibikorwa bigamije guca akajagari n’ubujura byakunze kwigaragaza muri ubu bucuruzi.

Bwashyizweho nyuma y’aho RICA ishyiriyeho amabwiriza agenga ubu bucuruzi aho ababukoraga bose bagombaga kuba biyandikishije bitarenze ku wa 11 Kanama 2022 bagahabwa impushya zibemerera kubukora ku mugaragaro.

Ni amabwiriza ateganya ko uguze ibikoresho by’amashanyarazi n’iby’ikoranabuhanga byakoreshejwe n’ubimugurishije bagirana amasezerano yanditse ndetse hakanatangwa inyemezabuguzi hagamijwe gukemura ibibazo byavuka hagati y’umucuruzi n’umuguzi.

Ayo masezerano bagirana akubiyemo umwirondoro wose w’umucuruzi n’ibiranga igicuruzwa cyose kiguzwe, igiciro cyacyo n’umwirondoro wose w’umuguzi byose bigaherekezwa n’imikono yabo bombi ihamya ko bemeranyijwe ku biranga ikiguzwe n’inkomoko yacyo.

Muri ubu bugenzuzi, harebwa niba abakora ubu bucuruzi bafite ibyangombwa bibemerera gukora bitangwa na RICA, kureba niba ibicuruzwa byose bafite byanditswe mu bitabo byabugenewe kandi bifite inkomoko izwi bakanagirwa inama zibafasha gukora kinyamwuga.

Kugeza ubu mu bugenzuzi bukomeje gukorwa hirya no hino mu gihugu hafatiriwe ibikoresho byiganjemo telefoni zigendanwa na za mudasobwa bifite agaciro ka miliyoni 12 Frw.

Umuyobozi w’Ishami rishinzwe Ubugenzuzi bw’Inganda n’Ibicuruzwa ku masoko muri RICA, Mutabazi Joseph, yavuze ko ubu bugenzuzi buzakomeza gukorwa mu gihugu hose harebwa niba ibiteganywa n’amabwiriza agenga ubu bucuruzi byubahirizwa, kwigisha ababukora uko banoza imikorere n’imikoranire hagamijwe gufasha abaguzi kugura ibyujuje ubuziranenge.

Avuga ko iyo abagenzuzi basanze ukora ubu bucuruzi adafite amakuru ahagije ku byo acuruza kandi atagaragaza inkomoko yabyo icyo gihe bahita babifatira akazabisubizwa ari uko agaragaje ibimenyetso by’ukuri byemeza inkomoko yabyo.

Ati “Turagenzura, tukigisha abakora ubu bucuruzi uko babunoza ariko iyo tugusanganye ibikoresho ntugaragaze inkomoko yabyo icyo gihe turabifatira ukazabisubizwa ari uko ugaragaje ibimenyetso bigaragaza aho wabikuye.”

Mutabazi yongeyeho ko uretse gufatira ibyo bikoresho, ubifatanywe acibwa amande nkuko biteganywa n’aya mabwiriza.

Bimwe mu bihano biteganywa n’aya mabwiriza birimo amande angana na 100.000 Frw ku mucuruzi wese utabika inyandiko zisobanutse zerekeye ibikoresho by’amashanyarazi n’iby’ikoranabuhanga byakoreshejwe acuruza mu gihe ufashwe acuruza nta ruhushya cyangwa rwararengeje igihe ahanishwa amande ya 200.000 Frw.

Bamwe mu bakora ubu bucuruzi bavuga ko aya mabwiriza yaziye igihe kuko mbere yaho bwarangwaga n’akavuyo n’ubujura bwinshi bigatuma abaguzi batizera neza umutekano w’ibyo baguze bakeka ko igihe icyo ari cyo cyose bashobora kubyakwa.

Maniriho Yves ucuruza ibi bikoresho mu Karere ka Rusizi yemeza ko umubare w’ababagana bashaka ibikoresho wiyongereye agahamya ko byatewe n’uburyo uguze n’ugurishije bagirana amasezerano yanditse kandi buri ruhande rukabanza kugaragaza inkomo y’icyo gikoresho.

Ibikoresho bitandukanye byafashwe bicuruzwa ariko nta nkomoko yabyo izwi
Mu byafashwe harimo telefone na za mudasobwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .