Ibigo bya Leta byasabwe guhagarika gukoresha Zoom kubera impungenge z’umutekano

Yanditswe na IGIHE
Kuya 10 Mata 2020 saa 08:20
Yasuwe :
0 0

Ikigo cy’u Rwanda gishinzwe Ikoranabuhanga mu Itumanaho n’Isakazabumenyi (RISA), cyasabye ibigo bya leta guhagarika gukoresha uburyo bwa Zoom bufasha abantu gukora inama mu buryo bw’iyakure, kubera impungenge z’umutekano w’amakuru anyuzwaho.

ZOOM ni uburyo burimo kwifashishwa cyane mu gukorana inama haba mu buryo bw’amajwi cyangwa amashusho, nyuma y’uko abantu benshi hirya no hino batangiye gukorera mu ngo mu gukumira ikwirakwira ry’icyorezo cya Coronavirus.

Umuyobozi Mukuru wa RISA, Innocent Bagamba Muhizi, yabwiye The New Times ko iri koranabuhanga rimaze kugenda rigaragaza ibibazo bitandukanye.

Yagize ati “Twahagaritse kuyikoresha ndetse twatanze amabwiriza ku nzego za Leta ko bahagarika kuyikoresha, ifite ibibazo by’umutekano kandi kugeza bikemutse, twasabye ko abantu baba bahagaritse kuyikoresha.”

Bimwe mu byo ubu buryo bwanenzwe harimo ko mu mezi make ashize, amakuru y’abayikoresha anyura mu Bushinwa aho iri koranabuhanga ryakorewe, nubwo abarikoze bavuga ko aguma mu gihugu baherereyemo.

Hari kandi nk’igikorwa kirimo kwitwa "Zoombombing", aho abajura mu by’ikoranabuhanga batatumiwe mu kiganiro, bashobora kucyinjiramo ugasanga berekanyeho nk’amashusho y’urukozasoni cyangwa andi magambo y’urwango.

Ibindi bigo bitandukanye nka Google, Sena ya Amerika, SpaceX, Minisiteri y’Ubuzima y’u Budage, Guverinoma ya Taiwan n’abandi, bahagaritse ikoreshwa rya Zoom.

Mu bundi buryo bushobora kwifashishwa mu gukorana inama harimo WebEx, Signal, Skype, Facetime, Google hangouts n’ubundi.

Inkuru wasoma:Impamvu ‘Zoom’ yanikiye izindi porogaramu zifasha mu guhamagara cyangwa gukora inama mu ikoranabuhanga


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .