Huawei mu biganiro n’ibigo byo muri Amerika ngo ibigurishe ikoranabuhanga rya 5G

Yanditswe na Habimana James
Kuya 20 Ukwakira 2019 saa 07:50
Yasuwe :
0 0

Ikigo Huawei cyo mu Bushinwa cyamaze guhagarikwa muri Leta Zunze Ubumwe za Amerika, kiri mu biganiro na bimwe mu bigo byo muri iki gihugu bikora mu by’itumanaho, ngo kibigurishe udukoresho dutanga internet ya 5G.

Umuyobozi Mukuru wungirije muri Huawei akaba n’umuyobozi w’inama y’ubutegetsi, Vincent Pang , yatangaje ko ibigo bimwe byo muri iki gihugu byagaragaje ko bishaka amasezerano nayo, gusa yirinze kuvuga ibyo bigo n’umubare wabyo.

Yagize ati “Hari ibigo bimwe birimo kutuvugisha, ntibizatwara igihe tudasoje buri kimwe cyose gikenewe.”

Vincent Pang yabibwiye ibiro ntaramakuru by’Abongereza, Reuters, ubwo yari mu ruzinduko mu Mujyi wa Washington.

Yatangaje ko ibi bigo byagaragaje ubushake, ibiganiro bikaba bimaze ibyumweru nubwo atavuga aho bigeze.

Ubutegetsi bwa Amerika butinya ko ikoranabuhanga rya Huawei rishobora gukoreshwa mu gutata abakiriya bayo, ibi byatumye iki gihugu kinasaba inshuti zayo gukumira iki kigo kuba byakoresha udukoresha twa Huawei dutanga murandasi ya 5G.

Iki kigo cyo cyakunze kwamagana ibi birego bya Leta Zunze Ubumwe za Amerika.

Kugeza ubu muri Leta Zunze Ubumwe za Amerika nta kigo cy’itumanaho gitanga udukoresho dutanga internet ya 5G, naho ibigo by’itumanaho byo mu Burayi bihanganye na Huawei birimo ERICb.ST na NOKIA.HE byo biracyahenze.

Muri Gicurasi uyu mwaka, Huawei yashyizwe mu bigo bitemerewe gukorera muri Amerika n’inzego z’umutekano, kibuzwa kandi kugura ibikoresha byakorewe muri Amerika kitabiherewe uburenganzira.

Leta ya Washington kandi yashyize ibyaha kuri iki kigo birimo kurenga ku bihano Amerika yafatiye igihugu cya Iran, n’ubujura mu by’ubucuruzi gusa iki kigo cyarabihakanye.

Iki kinyamakuru cyavuze ko hari amategeko ashobora kuva mu kigo cy’ubucuruzi muri Amerika muri uku kwezi, ashobora guhana burundu iki kigo kuba cyakorana n’ibigo byo muri Amerika.

Umuyobozi Mukuru wa Huawei, Ren Zhengfei aherutse gutangaza ko iki kigo cyiteguye kugurisha ubumenyi ku kigo cyo mu Burengerazuba bw’isi ku mushinga wa 5G, gusa byari bitaramenyekana ko harimo n’ibigo byo muri Amerika.

Kuva mu 2009, Huawei yakoresheje miliyari nyinshi z’amadorali mu gukora ikoranabuhanga rya interineti yihuta ya 5G.

Huawei iri mu biganiro n’ibigo byo muri Amerika ngo ibigurishe ikoranabuhanga rya 5G

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza