Dushimiyimana ari kubaka ikoranabuhanga rizifashishwa mu kwishyura lisansi kuri sitasiyo

Yanditswe na Ishimwe Israel
Kuya 7 Kanama 2020 saa 08:09
Yasuwe :
0 0

Dushimiyimana Jean Baptiste akiri ku ntebe y’ishuri yagize igitekerezo cyo kubaka ikoranabuhanga rizoroshya serivisi yo kugura no kwishyura lisansi mu Rwanda. Agisoza amasomo ye mu Ishuri Rikuru ry’Ikoranabuhanga rya Tumba yakomeje uwo mushinga.

Uyu musore w’imyaka 27 yasoje amasomo ye muri Tumba College of Technology (TCT) mu 2019 mu bijyanye na Electronics.

Mu gusoza amasomo ye yatanze umushinga wo kubaka ikoranabuhanga rizajya ryifashishwa mu kwishyura lisansi kuri sitasiyo zitandukanye. Iki gitekerezo yagisangije bagenzi be barimo na Nirere Claudette biganye muri TCT.

Yagize ati ‘‘Nagize igitekerezo cyo guhindura imikorere ya sitasiyo ikajya mu ikoranabuhanga. Njye na bagenzi banjye twaricaye turavuga tuti reka dutekereze ikintu twakora kikazakomeza ntikirangirire ku ntebe y’ishuri kuko nitugera hanze nta kazi kadutegereje.’’

Yakomeje avuga ko nyuma yo gusanga nta bantu bakomeye baziranye bazabafata ukuboko ngo babafashe kubona akazi, bahuje imbaraga bakora umushinga ufatika.

Ati ‘‘Twaravuze tuti twakora ikintu kikatuvuna ariko kikazagira umumaro mu gihe kizaza. Twari dufite amahitamo menshi ariko tureba ashoboka kandi akenewe.’’

Ku ikubitiro Dushimiyimana na mugenzi we batekereje gukora isaha iyobora abafite ubumuga bwo kutabona ariko baza kugorwa no kubona ibikoresho byayo.

Ati ‘‘Nyuma twarebye sitasiyo ziri hanze, kuko nari narumvise ko hari ibibazo zihura nabyo twiga uko twabikemura. Ukajya kuri sitasiyo ugasanga utanga lisansi yagiye wenda imvura ni nyinshi, bikagusaba gutegereza kandi wihutaga. Hari ubwo ugera ahantu nijoro, ukeneye kunywa lisansi kandi badakora ugasanga bibangamye. Twasanze ari byiza gukuraho izo mbogamizi ku buryo sitasiyo ishobora gukora amasaha 24 yikoresha.’’

Abakozi ba sitasiyo rimwe na rimwe bahura n’ibibazo aho usanga bagwa mu gihombo ku mpamvu zitandukanye.

Ati ‘‘Izo mbogamizi zose zo gutinda kuri sitasiyo usaba inyemezabwishyu n’ibindi nibyo dushaka gukemura.’’

Agisoza amasomo, Dushimiyimana yakomeje kubaka ikoranabuhanga rye ndetse anafungura ikigo cye yise DSP (Digital Service Pump) Group isobanuye ko gishaka kuba ikigo cy’icyitegererezo muri izo serivisi mu gihugu.

Imiterere y’ikoranabuhanga ari kubaka izatuma umuntu ufite ikinyabiziga ashobora kunywesha lisansi bidasabye ko ahuzwa n’uyicuruza, ahubwo azajya akoresha ikarita yabugenewe agure lisansi ihuye n’ubushobozi bwe.

Imashini iri kubakwa izifashishwa mu kwishyura lisansi kuri sitasiyo. Nta gihindutse yatangira gukoreshwa mu ntangiriro za 2021

Dushimiyimana yasobanuye ko umuntu azahabwa ikarita ifite password ku buryo nyirayo ariwe uyimenya gusa ku buryo yanatakara byoroha kumuha indi.

Ati “Twamaze gukora imashini yacu ariko turacyakeneye kubona abafatanyabikorwa by’umwihariko abakora kuri sitasiyo ku buryo twakorana. Tuzafata ikoranabuhanga ryacu, tubihuze ku buryo ibyo ushobora kurikoreraho bizajya bikorerwa kuri ya mashini isanzwe itanga lisansi.’’

Yasabye inzego za Leta kumuba hafi ku buryo ikoranabuhanga rye rikiri mu mushinga rizashobora gutanga umusaruro.

Ati ‘‘Si byiza ko bizaba bya bindi byo gutangiza imishinga ariko ntimare kabiri. Kugira ngo ibyo ntibibe, ni byiza ko inzego zibishinzwe zitwegera, ku buryo abantu baza bakaba abanyamigabane, tugafatanya, tugakorana kuko igihugu gifite abantu benshi twafatanya gutekereza no kwagura uyu mushinga ukagera ku rwego mpuzamahanga.’’

Mu gihe aho iri koranabuhanga rikoreshwa ku Mugabane w’u Burayi bakoresha amakarita ya banki, Dushimiyimana yahisemo gukora amakarita yihariye ku buryo n’abafite amikoro make bagura lisansi nta nkomyi.

Dushimiyimana arateganya ko nibigenda neza ikoranabuhanga rye rizatangira gukoreshwa mu Mujyi wa Kigali mu ntangiriro z’umwaka utaha wa 2021.

Uyu musore na bagenzi be bafite intego yo kugeza ibikorwa byabo ku rwego mpuzamahanga ku buryo no mu bindi bihugu bazajya bayikoresha bavuga ko ari ikoranabuhanga rifite inkomoko mu Rwanda.

Kurikira ikiganiro usobanukirwe uko iri koranabuhanga rikora

Dushimiyimana Jean Baptiste avuga ko yagize igitekerezo cyo kubaka ikoranabuhanga rizoroshya serivisi yo kugura no kwishyura lisansi akiri ku ntebe y’ishuri muri Tumba College of Technology
Dushimiyimana Jean Baptiste wize ibijyanye na Electronics ari kubaka ikoranabuhanga rizafasha kunoza gutanga serivisi zitangirwa kuri sitasiyo za lisansi mu Rwanda no hanze yarwo
Dushimiyimana Jean Baptiste na Nirere Claudette (uwa kabiri iburyo) biganye muri Tumba College of Technology banatangiranye umushinga bari kumwe na Uwase Marie Marie-Aimée na Niyitegeka David bakorana muri DSP Group mu kubaka ikoranabuhanga ryabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .