Ni ikirego cyatanzwe mu Rukiko Rwisumbuye rwa Ontario mu mpera z’iki cyumweru. Ibinyamakuru byareze ni Torstar, Postmedia, The Globe, The Canadian Press na CBC/Radio-Canada.

Bishinja OpenAI kuba ikoresha inyandiko zabyo mu gutoza porogaramu ya ChatGPT imaze kumenyerwa cyane mu bijyanye n’ubwenge bw’ubukorano.

Ibi binyamakuru byasabye ko OpenAI ihabwa ibihano, igacibwa amande akomoka ku nyungu yakuye mu nyandiko z’ibi binyamakuru ndetse igafatirwa ingamba zizatuma itongera gukoresha izi nyandiko.

Byatangaje ko ibyo OpenAI ikora bigize icyaha kuko izi nyandiko izikoresha ntawe ibisabiye uburenganzira.

Kugeza ubu ntacyo OpenAI iratangaza kuri ibi birego.