00:00:00 IGIHE NETWORK KN KINYARWANDA EN ENGLISH FR FRANCAIS

Banki ya Kigali na Inkomoko bigiye gutangiza icyiciro cya gatandatu cya ‘BK Urumuri Initiative’

Yanditswe na IGIHE
Kuya 6 May 2022 saa 10:12
Yasuwe :

Banki ya Kigali ifatanyije n’Ikigo gihugura ba rwiyemezamirimo, Inkomoko Entrepreneur Development, igiye gutangiza icyiciro cya gatandatu cya ‘BK Urumuri Initiative’, gahunda igamije guteza imbere no gushyigikira imishinga 25 igaragaza guhanga udushya.

BK Urumuri Initiative ni gahunda yatangijwe mu 2017 ubwo Banki ya Kigali yizihizaga isabukuru y’imyaka 50, kugira ngo ifashe ba rwiyemezamirimo bakiri bato guteza imbere imishinga yabo ishobora kuvamo ubucuruzi bukomeye mu gihe kiri imbere.

Abazatsinda muri iyi gahunda bazahembwa guhugurwa amezi atandatu ndetse no guhabwa ubujyanama mu by’ubucuruzi na Inkomoko. Bahabwa kandi na Banki ya Kigali amahirwe yo kubona inguzanyo zidasaba inyungu.

Umuyobozi Mukuru wa Banki ya Kigali, Dr Diane Karusisi yavuze ko banki ayobora yahisemo gushyigikira iyi gahunda kuko ishyira imbere kuzamura imishinga y’urubyiruko.

Ati “Muri Banki ya Kigali twemera ubucuruzi nk’uburyo bushobora kwifashishwa mu guhindura ubuzima bw’igihugu cyacu. Twiyemeje gufasha imishinga y’ubucuruzi y’urubyiruko binyuze mu kubaha inguzanyo zidasaba inyungu.”

Yakomeje avuga ko nk’uko bisanzwe binyuze muri BK Urumuri y’uyu mwaka hazatoranywa imishinga yimakaza guhanga udushya.

Ati “Muri BK Urumuri y’uyu mwaka, tuzatoranya ibitekerezo by’imishinga myiza igaragaza guhanga udushya no gutanga ibisubizo bishingiye ku ikoranabuhanga ndetse duhe aba ba rwiyemezamirimo ubumenyi bakeneye kugira ngo babyaze umusaruro ubushobozi bwabo ndetse bateze imbere ubucuruzi bwabo.”

Hazatoranywa imishinga igaragaza guhanga udushya, iteza imbere imikoreshereze y’ikoranabuhanga, hagamijwe gukemura bimwe mu bibazo u Rwanda rufite uyu munsi.

Umuyobozi w’agateganyo wa Inkomoko, Emmanuel Mugabo yavuze ko ikigo ayobora gitewe ishema no kuba kigira uruhare muri iyi gahunda.

Ati “Ubukungu bushingiye ku ikoranabuhanga ntabwo bukiri ibintu tubona nk’inzozi, birahari ndetse ba rwiyemezamirimo benshi b’Abanyarwanda batangiye kubibyaza umusaruro, batanga ibisubizo bishingiye ku guhanga udushya. Turi kubona ibigo byinshi by’ubucuruzi biyoboka ikoranabuhanga mu mirimo yabyo ya buri munsi. Muri Inkomoko duterwa ishema no gushyigikira ba rwiyemezamirimo bazatanga ibisubizo bishingiye ku ikoranabuhanga bizafasha u Rwanda n’amahanga.”

Igihe ntarengwa cyo gusaba kwinjira muri BK Urumuri ni tariki 13 Gicurasi. Abazatoranywa bazatangira guhugurwa na Inkomoko kuva muri Kamena kugeza muri Nzeri.”

Kuri iyi nshuro ba rwiyemezamirimo bose bemerewe kwitabira bitagendeye ku myaka cyangwa ubwenegihugu. Icyo bisaba ni ukuba ikigo cyinjiza amafaranga ari munsi ya miliyoni 500Frw, bigaragara ko cyunguka cyangwa se gishobora kunguka mu mwaka utaha.

Abashaka guhatana muri iyi gahunda bashobora kunyura kuri www.inkomoko.com cyangwa bagahamagara kuri 250 788 358 639 igihe hari aho bahuye n’ikibazo.

Banki ya Kigali na Inkomoko bagiye gutangiza icyiciro cya gatandatu cya ‘BK Urumuri Initiative’

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .