Babiri batsindiye moto binyuze muri poromosiyo ya “Mu Munyenga na Mastercard” ya BK

Yanditswe na Mukahirwa Diane
Kuya 1 Werurwe 2021 saa 09:58
Yasuwe :
0 0

Banki ya Kigali, ku wa Gatandatu tariki 27 Gashyantare 2021, yashyikirije abakiliya bayo moto ebyiri batsindiye muri poromosiyo yiswe Mu Munyenga na Mastercard.

Iki gikorwa cyabaye mu buryo bw’ikoranabuhanga aho cyanyuraga kuri Televiziyo y’u Rwanda, abahembwe ni abanyamahirwe barushije abandi guhaha bakoresheje Mastercard ya Banki ya Kigali.

Iyi poromosiyo yatangiye ku wa 14 Ukuboza 2020, aho Banki ya Kigali yatangije ubukangurambaga bushishikariza abakiliya bayo kwishyura ibicuruzwa na serivisi bakoresheje uburyo bw’ikoranabuhanga.

Ubu bukangurambaga bwasabaga abakiliya guhahisha ikarita ya Mastercard ya BK kuri murandasi cyangwa akayishyuza kuri POS ibicuruzwa bifite agaciro nibura nk’ibihumbi Frw 25 akinjira mu banyamahirwe batsindira ibihembo bitandukanye.

Mu bihembo bitangwa harimo moto, mudasobwa, ikarita yo guhahiraho no gusubizwa amafaranga atari munsi y’ibihumbi 55 Frw. Igihembo nyamukuru kizatangwa muri iyi poromosiyo ni imodoka yo bwoko bwa Mahindra KUV 100 NXT.

Abatsindiye moto kuri iyi nshuro bavuze ko basanzwe bakoresha Mastercard ya Banki ya Kigali ndetse bemeza ko kuba batsinze bigiye gutuma barushaho kuyikoresha.

Umwe mu banyamahirwe witwa Nkuranga John Baptiste yavuze ko yatsinze bimutunguye.

Yagize ati “Sinari niteguye ko nahamagarwa mbwirwa ko natsinze muri iyi poromosiyo. Byarantunguye nubwo nari nsanzwe nkoresha ikarita ya BK Mastercard.”

Uwimana Huguette, na we watsinze yavuze ko yamenye ko hariho poromosiyo bituma akangukira gukoresha ikarita ya BK Mastercard, aza guhamagarwa n’abakozi ba Banki ya Kigali bamubwira ko yatsinze.

Ati “Nagiye kubitsa muri BK menya ko iyi poromosiyo ihari ntangira gukoresha cyane ikarita yanjye ya BK Mastercard. Baje kumpamagara ko natsinze biranezeza cyane. Ndashishikariza abandi kugerageza amahirwe kuko haracyari imodoka, bashobora kuyegukana.”

Umukozi ushinzwe Serivisi y’Amakarita muri Banki ya Kigali, Byukusenge Tharcisse, yavuze ko iyi banki ishishikariza abakiliya bayo gukomeza gukoresha amakarita bakazabasha kwegukana igihembo nyamukuru cy’imodoka.

Ati “Turashimira abakiliya kuba barakangukiye gukoresha amakarita, icyo nababwira ubu poromosiyo iracyakomeje kugeza tariki 5 Werurwe 2021. Abakiliya bacu bakomeze bakoreshe amakarita yabo ya BK Mastercard, bakomeze bahabwe ibihembo bishimishije ndetse umunyamahirwe umwe azegukana imodoka.”

Kuva iyi poromosiyo yatangira Banki ya Kigali imaze gutanga ibihembo bitandukanye birimo moto eshatu, mudasobwa zo mu bwoko bwa laptop umunani, amakarita 80 yo guhaha ibintu ahwanye na miliyoni 4 Frw, n’ibihembo 60 by’amafaranga asubizwa kuri konti y’abakiliya afite agaciro k’angana na miliyoni 3,3Frw. Biteganyijwe ko iyi poromosiyo izarangira tariki 5 Werurwe 2021.

Nkuranga John Baptiste na Uwimana Huguette bishimiye moto batsindiye
Kuba muri poromosiyo yo mu Munyenga na Master card bisaba kuba uri umukiliya wa BK

Amafoto: BK


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .