Ba rwiyemezamirimo mu ikoranabuhanga igihumbi bagiye gufashwa kubyaza umusaruro ubumenyi bwabo

Yanditswe na Dufitumukiza Salathiel
Kuya 4 Werurwe 2021 saa 04:54
Yasuwe :
0 0

Leta y’u Rwanda n’Umuryango w’Ubumwe bw’u Burayi (EU) byashyize umukono ku masezerano yo gushinga ibigo by’ikoranabuhanga mu turere twa Muhanga,Nyagatare, Rubavu na Rusizi, bizafasha ba rwiyemezamirimo bato kongera ubumenyi no guhanga imishinga ifatiye ku ikoranabuhanga.

Itangazo Minisiteri y’Ikoranabuhanga na Inovasiyo yageneye abanyamakuru, risobanura ko ibigo bine byiswe “HANGA Hubs” bizashyirwa muri utwo turere byitezweho gushyigikira ba rwiyemezamirimo bakizamuka bagera ku gihumbi, ibintu bizageza ku ihangwa ry’imishinga 192.

Minisitiri w’Ikoranabuhanga na Inovasiyo, Ingabire Paula, yatangaje ko uwo mushinga ugamije koroshya no kugeza amahirwe yo guhanga udushya mu ikoranabuhanga kuri ba rwiyemezamirimo bacyizamuka.

Yakomeje ati ”Uyu mushinga uzibanda cyane kuri ba rwiyemezamirimo bafite ibitekerezo byubaka n’ibisubizo mu ngeri z’ingenzi z’ubukungu zirimo ubuzima, ubuhinzi, ishoramari, ubukerarugendo no kwakira abantu, ubwubatsi,uburezi n’ibindi.”

Ingabire yanavuze ko uwo mushinga uziye igihe kandi ujyanye n’umurongo Leta y’u Rwanda irimo wo kongerera ingufu no kwagura udushya mu ikoranabuhanga.

Ambasaderi wa EU mu Rwanda, Nicola Bellomo, yavuze ko imishinga izashyigikirwa nubwo yaba ari mito ishobora kugira uruhare mu kuzamura ubukungu.

Yagize ati ”Imishinga igitangira ishobora guhindura no kuzamura ubukungu. Ishobora kuba ari mito, ariko ishobora guhinduka[igakura] ikaba yazana ibikenewe ku isoko. Unahereye ku gisobanuro cy’umushinga HANGA [guhanga] wakumva ko bizaba byuzuyemo udushya.”

Umushinga wa HANGA Hubs uzamara imyaka ine, witezweho gufasha ba rwiyemezamirimo bagitangira guhanga udushya tubageza ko kongera umusaruro, guhangana ku isoko no gukuza imishinga yabo.

Abasaga 1000 ni bo bazahabwa amahugurwa abafasha guhangana ku isoko ry’umurimo, imishinga isaga 400 yungukire mu mahirwe azagaragarizwamo, naho 768 bagizwe na 30% by’igitsina gore bashyigikirwe mu gihe cy’amezi icyenda.

Amafaranga azifashishwa muri uwo mushinga ni aya gahunda ya EU yo gushyigikira urwego rw’abikorera no guhanga imirimo mu Rwanda yatangijwe mu 2020.

Urubyiruko rusaga igihumbi ruzungukira mu bufatanye hagati ya Guverinoma y'u Rwanda na EU

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .