Algeria yinjiye muri gahunda ya Smart Africa

Yanditswe na IGIHE
Kuya 14 Nzeri 2019 saa 07:30
Yasuwe :
0 0

Igihugu cya Algeria cyabaye icya 27 cyinjiye muri gahunda ya Smart Africa igamije guteza imbere ikoranabuhanga ku mugabane wa Afurika.

Kuri uyu wa Gatandatu nibwo Algeria yatangaje ko yamaze kwinjira muri Smart Africa, Ihuriro rifite icyicaro i Kigali, rifite n’inama y’ubutegetsi iyobowe na Perezida Paul Kagame.

Iki gihugu kibaye icya 27 cyinjiye muri uyu mushinga, nyuma ya Zimbabwe iherutse kwinjiramo.

Kugeza Smart Africa ihagarariye ibihugu bituwe na miliyoni 700 z’abaturage ku mugabane, ukaba ukorana n’ibigo bikomeye mu ikoranabuhanga bisaga 30 birimo Facebook, Microsoft, Huawei n’ibindi.

Smart Africa yamuritswe mu 2013 n’abakuru b’ibihugu birindwi, yiyongereyeho n’imiryango iharanira iterambere ry’ikoranabuhanga n’itumanaho hagamijwe guhindura imibereho y’abaturage n’iterambere ry’ubukungu.

Kugeza ubu abarenga 15 000, bamaze kwitabira inama ya Transform Africa iba buri mwaka kuva mu 2013, bakaba baraturutse mu bihugu birenga 112.

Smart Africa ifite intego yo guhindura ikoranabuhanga ishingiro ry’iterambere n’imibereho myiza, kugeza abantu ku ikoreshwa ry’ikoranabuhanga cyane cyane hakoreshejwe umuyoboro mugari w’itumanaho (broadband), gushyira imbere urwego rw’abikorera mu ikoranabuhanga, no kubakira iterambere rirambye ku ikoranabuhanga.

Umuyobozi mukuru ushinzwe ikoranabuhanga no guhanga udushya muri Smart Africa, Didier Nkurikiyimfura asinyana na Algeria amasezerano y'icyo gihugu yo kwinjira muri iyi gahunda
Algeria ibaye igihugu cya 27 cyinjiye muri Smart Africa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza