Abashinzwe igenzura bagiye kujya basoma ubutumwa bwite bw’abakoresha WhatsApp

Yanditswe na IGIHE
Kuya 8 Ukuboza 2020 saa 09:07
Yasuwe :
0 0

Urubuga nkoranyambaga rwa WhatsApp rukomeje kwitabirwa n’abantu benshi barukoresha mu kohererezanya ubutumwa, ari nako rukaza amabwiriza ajyanye n’ubwirinzi, ku buryo igihe hari ubangamiwe n’ubutumwa yohererejwe ashobora kwitabaza abagenzuzi ba WhatsApp, ubutumwa bugasomwa, bugasesengurwa.

Mu gukoresha WhatsApp, umuntu wakiriye ubutumwa burimo nk’ibitutsi cyangwa akohererezwa ubutari umwimerere buzwi nka spam, ashobora kubimenyesha abagenzuzi ba WhatsApp (report) bugasibwa, n’iyo nimero ikabuzwa kongera kubwohereza.

Mu buryo buri mu igerageza, WhatsApp ishaka gutera indi ntambwe mu gukumira abafite imyitwarire idahwitse kuri uru rubuga, ku buryo umuntu usagariwe azaba ashobora kwitabaza ubugenzuzi bwa WhatsApp, nk’uko byatangajwe na WaBetaInfo.

Mu gihe hari ubutumwa bugaragajweho ikibazo binyuze mu nzira zateganyijwe, buzajya bwoherezwa mu bubiko bwa WhatsApp kugira ngo busomwe ndetse busesengurwe n’abagenzuzi. Bazaba basesengura niba ikirego gitanzwe gifite ishingiro, cyangwa niba nimero yakoreshejwe ikwiye guhagarikwa kuri WhatsApp.

Hari abagaragaza impungenge ku gikorwa cyo gusoma no kugenzura ubutumwa bw’abandi bantu, niba bizagarukira ku butumwa bwagaragajweho ikibazo cyangwa niba hazabaho kurengera, bagasoma ikiganiro cyose.

Bibaye mu gihe WhatsApp irimo gukora amavugurura menshi arimo ubutuma bwisiba nyuma y’igihe runaka.

Hari amabwiriza menshi WhatsApp yavuguruye, aho byatangajwe ko umuntu azaba ategetswe kuyemeza uko yakabaye, bitabaye ibyo ashobora kuzahagarikwa kuri uru rubuga ubwo impinduka nshya zizaba zigiye mu bikorwa guhera ku wa 8 Gashyantare 2021.

Uru rubuga ruheruka kugurwa na Facebook, bibarwa ko rukoreshwa n’abantu benshi cyane ku Isi, ku buryo bibarwa ko runyuzwaho ubutumwa miliyari 100 ku munsi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .