00:00:00 IGIHE NETWORK KN KINYARWANDA EN ENGLISH FR FRANCAIS

Aba mbere bagiye kuwutuzwamo: Sobanukirwa iby’umujyi w’ikoranabuhanga wubatswe na Toyota

Yanditswe na Mugisha Christian
Kuya 12 January 2025 saa 09:26
Yasuwe :

Mu 2020, Sosiyete imaze kuba ubukombe mu gukora imodoka, yatangaje umushinga wo kubaka ‘Woven City’. Icyo gihe iyi sosiyete yatangaje ko uyu mujyi w’ikoranabuhanga uzatwara miliyari 10 z’amadorali ya Amerika, kandi ko uzaza ari impinduka zikenewe mu rwego rw’ikoranabuhanga muri iki kinyejana.

Icyo gihe Toyota yanahise ishyiraho ikigo cya Woven by Toyota, Inc. cyo gukurikirana uyu mushinga. Ubu gifite abakozi 2.200 bazobereye mu ikoranabuhanga bo mu bihugu bitandukanye.

Uyu mushinga w’umujyi w’ikoranabuhanga ushyirirwa mu bikorwa hafi n’umusozi wa Fuji. Ufatwa nka ‘laboratwari y’ubushakashatsi bushingiye ku ikoranabuhanga’.

Ibi bishingira ku gitekerezo cyo kuwutangiza, aho intego nyamukuru yari ugushyiraho icyanya kizajya gikorerwamo kandi kikanageragerezwamo ikoranabuhanga riteye imbere mu nzego zinyuranye.

Ni ukuvuga ko Toyota yashaka gushyiraho ahantu hakorerwa ubushakashatsi ku ikoranabuhanga runaka, rikahubakirwa, abahatuye bakaba aba mbere bo kurigerageza mbere yo kurigeza mu bindi bice by’Isi.

Kuva ku bikoresho by’imyidagaduro ukageza kuri robot zizajya zifasha mu buzima bwa buri munsi, imodoka zitwara n’ibindi bishya bigamije koroshya ubuzima byose bizajya bihakorerwa.

Imirimo yo kuwubaka yatangiye mu 2021.

Abazaba batuye muri uyu mujyi nibo bazajya bagerageza udushya tuzajya tuhahangirwa

Inzego zizitabwaho mu bizahakorerwa zirimo urw’ubwikorezi aho hazibandwa k’uko abantu bagenda, bikaba bivugwa ko hazakoreshwa uburyo butangiza ibidukikije.

Hazibandwa kandi ku bijyanye no gukora ibicuruzwa bimwe hifashishijwe ikoranabuhanga, urwego rw’amakuru ndetse n’urw’ingufu.

Ibikoresho byitezwe kuzahakorerwa birimo imodoka zitwara, izigendera mu kirere, robot zifasha abantu mu mirimo isanzwe yo mu rugo, no kubaka ikoranabuhanga rishingiye ku iry’ubwenge buremano ‘AI’ zizajya ryifashishwa mu mirimo itandukanye.

Urugero nko gukora robot zishobora kuba zizinga imyenda, n’ibindi.

Mu minsi ishize mu imurikagurisha ngarukamwaka rijyanye n’ikoranabuhanga ribera i Las Vegas, ‘Consumer Electronics Show- CES’, Umuyobozi Mukuru wa Toyota Motor Corporation, Akio Toyoda, yavuze ko icyiciro cya mbere cy’uyu mujyi cyarangiye, ndetse ko muri uyu mwaka wa 2025 abantu 100 ba mbere bazawutuzwamo.

Ku ikubitiro hazaturamo abakozi ba Toyota n’imiryango yabo, n’abandi.

Aba mbere bazatuzwa muri uyi Mujyi mu 2025

Biteganyijwe ko mu gihe umushinga wose warangiye, umujyi uzaba utuwe n’abantu 2000 barimo ba rwiyemezamirimo, abo mu burezi, inganda, ibigo by’ikoranabuhanga, abari mu bihe by’izabukuru n’abandi.

Uyu mujyi uzakira kandi ibigo bishya, ba rwiyemezamirimo, kaminuza n’ibigo by’ubushakashatsi binyuze muri gahunda yo kwihutisha iterambere izatangizwa mu mpeshyi y’uyu mwaka.

Ibigo bitanu birimo Daikin Industries na Nissin Food Products byamaze gutoranywa nk’abafatanyabikorwa bazatangiriza ibikorwa muri Woven City.

Gahunda yo kuyifungura ku bantu rusange iteganyijwe gutangira mu 2026, aho bazajya bayisura bagasobanukirwa udushya twaho.

Toyota yavuze ko uyu mushinga ushobora kutazana inyungu z’ako kanya, ariko ugufasha abantu n’Isi muri rusange mu ikoranabuhanga.

Woven City yubatse hafi y'Umusozi wa Fuji mu Buyapani
Uyu mujyi ufatwa nka ‘laboratwari y’ubushakashatsi bushingiye ku ikoranabuhanga’
Uyu mujyi ufatwa nka ‘laboratwari y’ubushakashatsi bushingiye ku ikoranabuhanga’
Biteganyijwe ko guhera mu 2026, abantu zatangira gusura Woven City mu Buyapani

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .