TI-Rwanda igiye gukurikiranira hafi umushinga wa Gicumbi uzatwara miliyoni $ 32

Yanditswe na Twarabanye Venuste
Kuya 2 Ugushyingo 2019 saa 08:54
Yasuwe :
0 0

Umuryango urwanya ruswa n’akarengane, (Transparency International Rwanda) ugiye gufasha mu ikurikiranabikorwa ry’umushinga wo kwita ku bidukikije mu Karere ka Gicumbi, uzatwara miliyoni $ 32.

Umushinga wo kwita ku bidukikije mu karere ka Gicumbi uzamara imyaka itandatu, ukazakorerwa mu Mirenge itandatu y’ako Karere; ariyo Rubaya, Cyumba, Kaniga, Mukarange, Rushaki na Shangasha.

Imibare y’ubushakashatsi bwakozwe n’umuryango urwanya ruswa n’akarengane mu 2017 yerekana ko imishinga yerekeye imihindagurikire y’ikirere yabayeho mu Rwanda yagiye irangwa n’ibura ry’uruhare rw’abaturage rimwe na rimwe n’abayobozi mu nzego z’ibanze ugasanga batayizi.

Ibyo bigatuma abayishyira mu bikorwa bakoresha ingengo y’imari yayo mu buryo abagenerwabikorwa badasobanukiwe.

Umuyobozi Nshingwabikorwa wa TI Rwanda, Mupiganyi Apolinaire asobanura ko imibare yerekana ko abaturage 55.5% batari bazi iby’iyo mishinga ndetse ngo hari n’abayobozi mu nzego z’ibanze bagera kuri 40.4% nabo ntibagishijwe inama ngo harebwe niba ariyo bakeneye cyangwa bamenye uruhare rwabo.

Ati “Hari imbogamizi twabonye mu mishinga itandukanye nka za biogaz n’indi mishinga igerageza kugabanya kwangiza ibidukikije. Dushingiye kuri ibyo bibazo twabonye mu isesengura twakoze ku yindi mishinga yabanje, twafashe iya mberengo turebe uko twatera ingabo mu bitugu gahunda y’igihugu cyacu yo guha uruhare umuturage kugira ngo amenye ibimukorerwa”.

Avuga ko ibi ari byo bizatuma bagira uruhare rukomeye bafatanyije n’indi miryango, inzego n’umuturage kugira ngo ibipimo by’abagenerwabikorwa bavugaga ko batazi ibikorerwa bigabanyuke.

Ati "Turemera ko niba tuzamuye imyumvire y’umuturage, gukorera mu mucyo no kubaza utanga serivisi ibyo yakoze niba atabikurikiranye akabibazwa bizafasha kugira ngo uriya mushinga w’icyitegererezo muri Gicumbi uzagere ku ntego twifuza hanyuma bishobore no gukorerwa mu tundi turere.”

Yongeyeho ko bagendeye ku byo babonye mu bushakashatsi bakoze, uyu mushinga munini wa mbere FONERWA ikoze ugomba kurindwa ba rusahurira mu nduru.

Umuyobozi mukuru wa FONERWA, Hubert Ruzibiza, yavuze ko binjiye mu bufatanye na TI Rwanda, kugira ngo uzabafashe mu ikurikiranabikorwa bityo ibyo abagenerwabikorwa, abafatanyabikorwa n’igihugu bawitezeho bizagerweho.

Ati "Mu by’ukuri aya ni amafaranga menshi, kandi ibyitezwe biri hejuru cyane, yaba ari ku muturage yaba ari kuri twebwe, na leta cyangwa n’ikigega cyita ku bidukikije [cyateye inkunga uwo mushinga]”.

Yongeyeho ko hari uburyo butandukanye burimo ubwo mu ikoranabuhanga buzatuma umuturage ashobora gutanga igitekerezo ku byo abona aho umushinga uri gukorerwa, ku buryo ayo makuru yagera no ku bafatanyabikorwa b’umushinga baba mu mahanga.

Biteganyijwe ko mu myaka itandatu uyu mushinga uzafasha abaturage kugabanya imyuka ya gaz carbonique (CO2) ingana na toni 273,720. Uzagera ku baturage 150,000 ugirire akamaro abarenga 380,000 muri rusange.

Mupiganyi avuga ko bashaka gukumira ba rusahurira mu nduru muri uyu mushinga wa mbere ukomeye Fonerwa igiye gukora
Ruzibiza uyobora Fonerwa avuga ko hari byinshi TI Rwanda izafasha mu migendekere myiza y'umushinga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza