Minisitiri Biruta yagaragaje uko kubungabunga ibishanga byafasha mu guhangana n’inzara

Yanditswe na Akayezu Jean de Dieu
Kuya 31 Mutarama 2019 saa 12:32
Yasuwe :
0 0

Minisitiri w’Ibidukikije mu Rwanda, Dr. Vincent Biruta, yavuze ko ibishanga bibungabunzwe neza byafasha mu guhangana n’ibibazo by’imyuzure, amapfa n’inzara.

Yabigarutseho kuri uyu wa Kane mu ijambo yagejeje ku bitabiriye umunsi mpuzamahanga w’ibishanga, ufite insanganyamatsiko igira iti “Tubungabunge ibishanga duhangana n’ingaruka z’imihindagurikire y’ibihe”.

Uyu munsi wahuriranye no gusoza icyumweru cyahariwe kubungabunga ibishanga mu Rwanda, cyibanze ku bikorwa byo gukangurira abaturage kumenya akamaro k’ibishanga ku mibereho yabo n’abatuye Isi.

Hari kandi kubibutsa kubibungabunga, kubigarurira isura byari bifite no kuvanamo ibikorwa byagiye bibyangiza bikanatera ingaruka zitandukanye.

Minisitiri Biruta yavuze ko mu myaka 35 ishize ibiza byikubye kabiri kandi 90% bifite aho bihuriye n’amazi. Mu Rwanda ahanini ibiza biterwa n’imvura.

Yakomeje avuga ko mu igenzura riherutse gukorwa mu turere 15, by’umwihariko ibiza bituruka ku mwuzure mu Majyaruguru n’Amajyepfo n’ibituruka ku mapfa mu Ntara y’Iburasirazuba, byagize ingaruka za miliyari 204 z’amafaranga y’u Rwanda. Avuga ko ibishanga bicunzwe neza byafasha mu guhangana n’ibi bibazo byose.

Ati “Ayo mafaranga yose hamwe aruta ingengo y’imari igenda ku buhinzi bw’igihugu, ibi rero bigiye biba buri mwaka ntabwo dushobora guterera iyo ndetse byagira n’ingaruka nyinshi n’inzara yabaho.”

“Ibishanga rero bifite akamaro gakomeye mu buryo bwo guhangana n’imihindagurikire y’ibihe, mu kurwanya imyuzure bikagira uruhare no kuba twahangana n’amapfa n’inzara.”

Ibarura ry’ibishanga mu Mujyi wa Kigali ryakozwe na REMA, mu mpera za 2018, ryagaragaje ko ibikorwa bigera ku 7 222 bikorerwa mu bishanga, icyanya cy’inganda i Gikondo hatarimo.

Imirenge ya Remera, Gisozi, Gatsata, Kinyinya na Kacyiru ifite ibikorwa byinshi mu bishanga birimo; insengero, ubworozi, amasoko, amagorofa, gare, ubucuruzi n’ibindi.

Iyi mibare ikomeza igaragaza ko 78%, ari amazu atuwemo, naho 9.44%, ni ubucuruzi. Inyubako 3.18% ni izo abantu batuyemo kandi banacururizamo, naho ibiraro byo kororeramo ni 2.85%.

Mu bafite ibikorwa mu bishanga abagera kuri 51% ntabwo bafite ibyangombwa birimo iby’ubutaka, iby’ubugure n’ibindi.

Umuyobozi Mukuru wa REMA, Eng. Coletha Ruhamya, yavuze ko igenzura ryakozwe ryagaragaje ko hari ibintu byinshi bikeneye gushyira imbaraga hamwe by’umwihariko ibijyanye no kwigisha abantu amategeko n’impamvu zo kurengera ibishanga.

Itegeko rirengera ibidukikije rishyira ubutaka bungana na metero 50 uvuye kubiyaga, metero 20 uvuye ku bishanga na metero 10 uvuye ku migezi mu butaka rusange bwa Leta, bivuze ko nta muntu wemerewe kubwiyandikishaho no gushyiramo ibikorwa.

Abatandukanye bizihije ibirori by'umunsi mpuzamahanga w'ibishanga
Minisitiri w'Ibidukikije, Dr Vincent Biruta yavuze ko ibishanga bifashwe neza byarwanya amapfa n'inzara
Umuyobozi Mukuru wa REMA, Eng. Coletha Ruhamya, yashyimye abakomeje gutanga umusanzu mu kubungabunga ibishanga
Umuyobozi Mukuru Wungirije wa REMA, Munyazikwiye Faustin, yitabiriye uyu munsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza