00:00:00 IGIHE NETWORK KN KINYARWANDA EN ENGLISH FR FRANCAIS

Intambwe idasubira inyuma y’u Rwanda mu kwimakaza icukurwa ry’amabuye y’agaciro ritangiza ibidukikije

Yanditswe na IGIHE
Kuya 29 Nzeri 2022 saa 02:11
Yasuwe :

Imyaka ibaye 14 Guverinoma y’u Rwanda itangije mu buryo budasubira inyuma, urugamba rwo kurengera no kubungabunga ibidukikije mu nzego zose. Ni ibintu byigaragaje uhereye ku ihagarikwa ry’ikoreshwa ry’amashashi kugera ku kubaka amaparike yo kubungabunga ibidukikije.

Imiryango ndetse n’ibigo nk’Ikigo gishinzwe kurengera ibidukikije (REMA) ndetse n’ikigega cy’u Rwanda cyo kurengera ibidukikije (FONERWA) byashyizweho kugira ngo bimenyekanishe, bitange ubufasha nk’impuguke mu kugenzura uko ibidukikije bibungabungwa, gushaka ubushobozi bwo gushyira izo gahunda mu bikorwa n’ibindi ku nzego zose, harimo n’urwego rw’ubucukuzi bw’amabuye y’agaciro.

Guverinoma igaragaza ko byatanze umusaruro kuko sosiyete zikora ubucukuzi bw’amabuye y’agaciro zahise zihindura imikorere zigatangira gukoresha uburyo butekanye kandi bwizewe, zigakora ibishoboka ngo zirinde kandi zisubize ireme ubutaka zikoreraho, ari na ko zirinda umutekano w’abakozi zikoresha.

Ahacukurwa amabuye y’agaciro hirya no hino mu Rwanda, hifashishwa imashini zifite ikoranabuhanga rigezweho mu bucukuzi, kandi ibi byazamuye ubushobozi bwo kugera kure hashoboka mu bujyakuzimu binyuze mu gucukura no kubaka inzira hifashishijwe imbaho zikomeye, maze bigatuma ubutaka bwo hejuru busigara budahungabanyijwe.

Ibi byagabanyije iyangirika ry’ubutaka riterwa n’ibisimu bisigara birangaye ndetse bituma imyanda n’ibisigazwa biva mu bucukuzi bibasha gutunganywa mu buryo bwisumbuye.

Ikoreshwa risobanutse ry’amazi naryo ryatejwe imbere binyuze mu gushyiraho uburyo bwo gutunganya no kongera gukoresha amazi yakoreshejwe, aho amazi yifashishijwe mu gusukura amabuye y’agaciro, akusanyirizwa ahantu, akayungururwa maze akongera agakoreshwa.

Mu rwego rwo kurinda no kubungabunga ubuzima bw’abakora mu bucukuzi, amategeko n’amabwiriza akaze ashyirwaho ndetse hagakurikiranwa uburyo yubahirizwa. Kuri ubu bambara ingofero zirinda umutwe, inkweto zabugenewe zujuje ubuziranenge, uturindantoki ndetse n’amakote afite ikoranabuhanga rituma uyambaye abasha kugaragara n’iyo haba ari mu mwijima.

Hatangwa urumuri ruhagije hifashishijwe amashanyarazi, hagatangwa umwuka mwiza wo guhumeka hifashishijwe ibyuma bigezweho byohereza umwuka unyuzwa mu matiyo, kugira ngo hirindwe ko hagira ubura umwuka.

Ibyo gukora ubucukuzi bw’umwuga byavuye ku birombe bigera no mu mashuri kuko mu Rwanda hashinzwe ibigo by’amashuri makuru byemewe nk’ishuri ryigisha ubucukuzi (School of Mining & Geology) rya Kaminuza y’u Rwanda, bikaba biri gutuma imibare y’abakozi bafite ubuhanga bahabwa akazi muri sosiyete z’ubucuzi bw’amabuye y’agaciro igenda yiyongera.

Aba bakozi bashyira mu bikorwa ndetse bagakurikirana amabwiriza yo kubungabunga ibidukikije no kurinda ubuzima bw’abakora mu bucukuzi bw’amabuye y’agaciro ahantu hanyuranye hakorerwa iyo mirimo.

Bagenzura inzira zo mu butaka buri munsi mbere y’uko imirimo yo gucukura itangira, bagapima igipimo cya gaz muri izo nzira ndetse bakagenzura imbaraga imyubakire irinda izo nzira kuriduka zifite n’ibindi.

Hakorwa kandi amasuzuma ahoraho akorwa n’impuguke, kugira ngo hagaragazwe kandi hakurweho uburozi bushobora kuboneka mu mazi.

Mu gihe imirimo yo gucukura irangiye, amabuye amaze gutwarwa, hahita habaho gusoza imirimo no gutunganya ubutaka bwakoreweho ubucukuzi. Abacukura basabwa gusubiza ubutaka mu bisimu, guteraho ibiti, gusenya inzu bifashishaga mu mirimo yabo, kuringaniza ubutaka igihe butaringaniye n’ibindi.

Gahunda zo gusubiza ubutaka uko busanzwe ndetse n’igiciro bizatwara bigaragazwa mu Isuzuma ry’ingaruka z’ubukuzi ku bidukikije rikorwa na sosiyete igiye gucukura mbere y’uko imirimo y’ubucukuzi itangira. Iri suzuma rigaragaza kandi amabwiriza aherutse gushyirwaho ndetse na mubazi igaragaza igiciro gikenewe ngo ubutaka buzakorerwaho ubucukuzi busubizwe uko bwahoze.

Uko u Rwanda rukomeza gushimangira no kubungabunga ibidukikije, ni ko urwego rw’ubucukuzi rukomeza gushyigikira gahunda zo gusubizaho no kurengera umutungo kamere binyuze mu gukomeza gushyiraho no gushyira mu bikorwa gahunda n’imikorere byifashisha ikoranabuhanga rigezweho, hagamijwe iterambere rirambye ry’Abanyarwanda.

Bitandukanye no mu myaka yashize, ubu abakora mu mabuye y'agaciro bahabwa ibikoresho bitandukanye bibakingira birimo n'uturindantoki
Hifashishwa uburyo bwose bushoboka ku buryo nta mabuye y'agaciro asigara mu kuyungurura
Imashini nizo rutirigongo rw'ubucukuzi bw'amabuye y'agaciro bugezweho mu Rwanda
Sosiyete zemewe zicukura amabuye y'agaciro mu Rwanda mubyo zisabwa kuba zifite harimo n'imashini zikoresha ikoranabuhanga
Mu byo abacukuzi kuri ubu basabwa harimo gukora ubucukuzi bubungabunga ibidukikije
Kubera imbaraga zashyizwe mu bucukuzi bw'amabuye y'agaciro, byatumye urwo rwego ruza mu za mbere zinjiriza u Rwanda akayabo
Uretse gucukura amabuye y'agaciro, u Rwanda rwabonye inganda ziyatunganya cyane cyane gasegereti na zahabu
Mbere yo gucukura, habanza gutunganywa inzira zizewe abazacukura bazakoresha
Imashini zisigaye zikora imirimo myinshi mu bucukuzi yakorwaga n'abantu benshi ariko nta musaruro ufatika
Abakozi bakora mu bucukuzi abenshi babanza kubihugurirwa
Inzobere zibanza kugenzura ahazakorerwa ubucukuzi kugira ngo hatagira ikibazo kiba nk'uko mbere byajyaga bigenda
Gasegereti iri mu mabuye acukurwa cyane mu Rwanda
Amabuye azwi nk'amabengeza cyangwa gemstone aboneka mu Rwanda. Yifashishwa mu gukora imitako itandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .