00:00:00 IGIHE NETWORK KN KINYARWANDA EN ENGLISH FR FRANCAIS

Uduce wasura mu Mujyi wa Kigali tukagufasha kuruhuka (Amafoto)

Yanditswe na Mukahirwa Diane
Kuya 19 January 2022 saa 10:07
Yasuwe :

Mu 2019 nahuye n’Umunya-Canada wari wasuye u Rwanda avuye mu bindi bihugu bya Afurika. Ubwo yageraga ku Kibuga cy’Indege yatunguwe n’uburyo yakiriwe no gusanga Kigali ari umujyi usukuye kandi ufite umutekano.

Turimo tuganira namubajije uko yabonye Kigali, mu gutebya aravuga ngo ‘Kigali is too beautiful to be in Africa’, bishatse kuvuga ngo Kigali ni nziza ku buryo idakwiye kuba muri Afurika.

Ku mutima naravuze ngo nta kindi wavuga wicaye hagati y’abenegihugu batanu, gusa yaje kubingaragariza kuko ku gihe yagombaga kumara yongereyeho ukwezi ngo abanze yitegereze uyu murwa.

Si abanyamahanga gusa kuko na bamwe mu baturuka mu Ntara iyo bageze i Kigali barahishimira kubera ibikorwaremezo bitandukanye n’ibyo baba basanzwe babona iwabo.

Muri iyi nkuru twabateguriye uduce ushobora gusura mu Mujyi wa Kigali ukahishimira bitewe n’imiterere yatwo cyangwa serivisi zihatangirwa.

Fazenda Sengha

Fazenda ni ahantu hatangirwa serivisi zitandukanye mu Murenge wa Kigali. Ni ahantu wajya yaba wowe ubwawe, inshuti n’umuryango buri wese akahava abonye ikimushimisha kuko huzuye ibyiza byinshi.

Iminsi yose igize icyumweru bakira ababagana bakeneye kugendera ku mafarasi, imigozi yo mu kirere, kurasa, kugenda ku migozi yo mu kirere, imigozi iterera abantu mu kirere (bongee), restaurant, utubari n’ibindi byinshi bituma uwahageze arushaho kunezerwa.

Aka ni agace ko muri Kigali ushobora gusangamo ibintu bitandukanye kandi ukaba wemerewe kubisura bitewe n’ubushobozi bwawe n’uko wifuza kunezerwa.

Abasura Fazenda banyurwa na serivisi nziza bahabwa

Umusambi village

‘Umusambi Village’ ni agace k’igishanga cyatunganyijwe mu Karere ka Kicukiro aho abantu bakunda kurebera ubwiza bw’urusobe rw’ibinyabuzima bakunda.

Usibye umwihariko w’imisambi hakorerwa ibikorwa birimo kureba inyoni zigera ku moko ijana, gutambagira werekwa ibinyabuzima biri muri aka gace, gusura ubusitani butewemo ibimera bikorwamo imiti, imikino y’abana ndetse no kuganirizwa n’ubuyobozi n’abakozi baho.

Umusambi Village haba hafunguye buri munsi, nta wuhezwa gusura aka gace kashyizweho mu rwego rwo kwigisha no kubungabunga urusobe rw’ibinyabuzima mu Rwanda.

Mu Umusambi Village hari ubwoko bugera ku ijana bw'inyoni

Kigali Golf Resort and Villas

Ikibuga cya Golf ni kimwe mu byazamuye urwego rw’ubukerarugendo mu Rwanda rugera ku ruhando mpuzamahanga. Iki kibuga gifite ubuso bwa hegitare 65.

Ni kimwe mu bikurura abantu bava imihanda yose bashaka kureba ubwiza bwacyo no kugikiniramo Golf, bagafata amafunguro meza muri restaurant zaho n’ibindi.

Nyandungu Urban Wetland Eco-Tourism Park

Pariki y’Ubukerarugendo bubungabunga ibidukikije ya Nyandungu ni hamwe mu hantu hashya abari muri Kigali bazajya basura bakaryoherwa n’amahumbezi n’urusobe rw’ibinyabuzima.

Iyi pariki iherereye mu Karere ka Gasabo na Nyarugunga muri Kicukiro, ikaba yarubatswe ahari igishanga, hakorwa neza hahindurwa pariki itatswe n’ibyiza bitandukanye.

Abazajya basura iyi pariki bazajya basangamo ibikorwa bitandukanye birimo ibiyaga by’ibikorano, ubusitani bw’imiti ya Kinyarwanda yakoreshwaga mu kuvura, restaurant n’ahashobora kureberwa cyangwa gukinirwa amakinamico.

Hari kandi n’ibiti bya kera byashyizwemo mu rwego rwo gufasha abato kubimenya no korohereza ubushakashatsi birimo umugote, igikakarubamba, umuravumba, umunyinya, umubirizi, igicunshu, ikinetenete, umukunde n’ibindi.

Gutembera uduce dutandukanye na Kigali City Tour

Mu rwego rwo korohereza abakeneye gusura ibindi bice bitandukanye by’Umujyi wa Kigali, sosiyete yitwa Kigali City Tour, yashyizeho imodoka zitembereza abo bantu.

Izo modoka zitembereza abantu harimo nko ku isoko rya Kimironko, Urwibutso rwa Jenoside rwa Kigali, Nyamirambo n’utundi duce dutandukanye tugaragaza ubwiza bwa Kigali.

Utu duce nitwo IGIHE yahisemo ariko Kigali itatswe n’ibyiza byinshi birimo amahoteli, inyubako nziza ndetse n’ibindi.

Imodoka za Kigali City Tour zifasha abantu gutembera uduce dutandukanye tw'Umujyi wa Kigali
Pariki ya Nyandungu abakunda urusobe rw'ibinyabuzima bazaryoherwa no kuhasura
Muri Pariki ya Nyandungu habarizwamo ibiti n'inyoni bw'ubwoko butandukanye
Abakunda ubugeni bashyiriweho ahantu ho gushushanyiriza
Abashaka kujya ku bikinisho bibambika imigozi ibaterera mu kirere kuri Fazenda batekerejweho
Bamwe mu banyabugeni bajya gukorera ubuhanzi bwabo kuri Fazenda
Fazenda ifite restaurant n'utubari ku buryo uwagiyeyo atakwicwa n'inzara n'inyota
Fazenda yitaruye Umujyi ku buryo uwahasuye atongera kumva urusaku rw'ibinyabiziga
Kurasa hakoreshejwe umuheto ni bimwe mu bikorerwa muri Fazenda
Kuri Fazenda hari inzobere mu bukerarugendo zifasha abahasuye
Kuri Fazenda uwahagiye abasha no kugenda ku ifarashi
Ikibuga cya Golf giherereye mu Karere ka Gasabo mu Mujyi wa Kigali
Ikibuga cya Golf cyatumye ba mukerarugendo b'abanyamahanga barushaho kwibona muri Kigali
Kubera ubunini bw'iki kibuga hari utunyabiziga duto tugenewe gutembereza abantu
Kuri Golf hari iduka ry'imyenda ya siporo
Abakunda ubukerarugendo burimo ubwo gusura inyoni bisanga mu Umusambi Village
Umusambi Village ni hamwe mu hakundwa n'abasura Kigali
Umusambi Village ufite umwihariko w'ubukerarugendo bushingiye ku nyoni
Abifuza gutembera Umujyi wa Kigali bayireba neza bagenda muri izi modoka

Amafoto: Girubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .