00:00:00 IGIHE NETWORK KN KINYARWANDA EN ENGLISH FR FRANCAIS

Rubavu: Bralirwa yifatanyije n’abaturage mu gutera ibiti ibihumbi 20 (Amafoto)

Yanditswe na Mukwaya Olivier
Kuya 20 Ugushyingo 2021 saa 08:21
Yasuwe :
0 0

Abakozi b’uruganda rwa Bralirwa bifatanije n’abaturage b’akarere ka Rubavu gutera ibiti ibihumbi 20 birimo ibyera imbuto ziribwa n’iby’imitako.

Iki gikorwa cyabereye mu mirenge ya Gisenyi, Rugerero na Nyamyumba ahari uruganda rwa Bralirwa.

Uretse ibiti byatewe ku mihanda abaturage bahawe n’ibyo bajya gutera mu mirima yabo.

Muhawenimana Clementine wo mu Murenge wa Gisenyi yavuze ko ashimishijwe n’uko yahawe iby’imbuto zizamufasha kunoza imirire no kwiteza imbere mu bukungu.

Yagize ati “Turishimye kuko badufashije nubwo twateye ibiti ku muhanda banaduhaye ibiti by’imbuto byo gutera mu mirima yacu. Iki giti cya avoka kizamfasha; nikimara gukura nzajya mbona imbuto zo kurya cyangwa nzigurishe mbashe kwiteza imbere.”

Niyomizero Desiré wiga muri TTC Gacuba, yavuze ko ibiti byatewe bizafasha abanyeshuri bazaba bigisha kubona umwuka mwiza kandi banabone imbuto zo kurya.

Batamuliza Aline Pascale ushinzwe imirimo rusange n’itumanaho muri Bralirwa, yavuze ko gutera ibiti ari igikorwa bamazemo imyaka ine mu rwego rwo kwegera abaturage baturiye uruganda bareba uko bahindura imibereho yabo.

Ati “Iki ni igikorwa dukora buri mwaka. Hashize imyaka ine dutera ibiti hamwe n’abaturage tugamije kubungabunga ibidukikije. Mu Karere ka Rubavu twateye ibiti ibihumbi 10 bifasha abaturage kunoza imirire yabo n’ibindi byo gutaka umujyi wa Rubavu byose ni ukwegera abaturage duturanye kuko ibiti bibungabunga amazi kandi mu kwenga inzoga turayakenera. Niyo mpamvu twifuza kuyabungabunga.”

Yakomeje avuga ko nubwo bateye ibiti by’imitako hari n’iby’imbuto mu rwego rwo gufasha abaturage mu rwego rwo kongera ibiribwa.

Umuyobozi w’Akarere ka Rubavu w’agateganyo, Ruhamyambuga Olivier yashimiye Bralirwa ku bwo kwibuka aho bakorera abizeza ubufatanye burambye.

Ati “Ni abafatanyabikorwa beza uretse n’ibi batuba hafi mu buzima busanzwe bw’abaturage b’akarere ka Rubavu natwe turabizeza ko tuzakomeza kuba hafi yabo.”

Iki gikorwa cyaherukaga muri 2019 ubwo abakozi b’uruganda rwa Bralirwa binyuze mu kinyobwa cya Heineken bifatanije n’abaturage gutera ibiti ibihumbi 20 muri byo 6500 bikaba ari ibyera imbuto ziribwa naho 13500 akaba ari ibiti by’ubwiza byatewe ku muhanda wegereye ikiyaga cya Kivu by’umwihariko Mu murenge wa Nyamyumba ikoreramo ikaba yari yarahaye abaturage 38 000 ifumbire naho abagera ku 1000 bahawe mituweli.

U Rwanda rufite gahunda y’uko kugera mu 2030 ruzaba rumaze kugabanya 38% by’umwuka wangiza ikirere rwoherezayo aho mu biteganyijwe gukorwa harimo no gutera amashyamba n’ibiti bivangwa n’imyaka ndetse no korohereza abaturage gutekesha gaz aho kuba amakara n’inkwi.

Ibarura ry’amashyamba ryakozwe mu 2019 ryerekanye ko ubuso buteyeho amashyamba bwiyongereye bukagera kuri 30,4% by’ubuso bw’igihugu mu gihe intego yari ukugera kuri 30% kugeza mu 2020.

Abakozi b'Akarere bifatanyije na Bralirwa
Abanyerondo bari bitabiriye iki gikorwa
Abaturage b'Umurenge wa Gisenyi bitabiriye uyu muganda wo gutera ibiti
Batamuliza Aline Pascale ushinzwe imirimo rusange n’itumanaho muri Bralirwa atera igiti
Abaturage bacyuye ibiti byo gutera mu mirima yabo
Batamuliza Aline Pascale ushinzwe imirimo rusange n’itumanaho muri Bralirwa,yavuze ko ri igikorwa bamazemo imyaka ine mu rwego rwo kwegera abaturage begeranye n’inganda bareba uko bahindura imibereho yabo
Umuyobozi w’akarere ka Rubavu w’agateganyo Ruhamyambuga Olivier yashimiye uruganda rwa Bralirwa ku bwo kwibuka aho bakorera abizeza ubufatanye burambye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .