00:00:00 IGIHE NETWORK KN KINYARWANDA EN ENGLISH FR FRANCAIS

Nyamagabe: Hatangiye gutangwa ibihembo ku babona inzoka ntibazice bakazishyikiriza ababishinzwe

Yanditswe na Prudence Kwizera
Kuya 13 Kamena 2021 saa 11:33
Yasuwe :
0 0

Nyuma yo kubona ko hari zimwe mu nyamaswa zikomeza kwicwa bitewe n’uko abantu bazifata nk’aho ari mbi zidakwiye kubaho, umuryango BIOCOOR (Biodiversity Conservation Organization) ukorera mu Karere ka Nyamagabe wiyemeje kujya uhemba abantu bazabona inyamaswa zirimo inzoka n’izindi ntibazice ahubwo bakazibashyikiriza.

Pariki y’Igihugu ya Nyungwe igizwe n’ishyamba ry’inzitane ribonekamo amoko y’inguge atandukanye, amoko y’ibimera arenga 1019, inyamabere zirenga 90, amoko y’inyoni arenga 320 n’ibikururanda bitandukanye.

Gusa byakunze kugaragara ko abayituriye bica inyamaswa ziyisohotsemo zirimo ifumberi bakajya kuzirya n’izindi nk’ibikururanda kuko babifata nk’ibidakwiye kubaho.

Umushakashatsi ku rusobe rw’ibinyabuzima n’iterambere ry’abaturage, Dr Imanishimwe Ange, yashinze Ikigo cyitwa BIOCOOP n’Umuryango witwa BIOCOOR hagamijwe kumenyekanisha ibyiza bya Nyungwe, kubungabunga urusobe rw’ibinyabuzima ruyibonekamo no kuyitemberezamo ba mukerarugendo no kubasobanurira ibyiza biyibonekamo.

Dr Imanishimwe yabwiye IGIHE ko kuri ubu umuntu ubonye inzoka cyangwa indi nyamaswa ntayice akayibazanira bamugenera ishimwe, bakayijyana muri Nyungwe aho ikwiye kuba itekanye.

Ati “Twashyizeho ubu buryo bwo gushishikariza abantu kutica inyamaswa no guhemba umuntu uyituzaniye nyuma y’uko twabonaga inyamaswa zigenda zangirika, ugasanga nk’abana bagiye kwarurira inyoni amagi cyangwa yakora nk’impanuka ikagonga ikirahure bagahita bayica.”

“Noneho dutangira kwigisha abaturage ko inyamaswa yose bazajya babona iri mu kaga bazajya batumenyesha bakayituzanira tukayitaho tukayivura, yamara kugira ubuzima bwiza tukayisubiza mu ishyamba aho ikwiye kuba itekanye.”

Dr Imanishimwe avuga ko by’umwihariko bitaye ku nzoka cyane kuko zikunze guhura n’akaga gakomeye iyo abantu bazibonye kuko bihutira kuzimena imitwe bazishinja ko ari zo zazanye icyaha ku Isi.

Ati “Kubera ko abantu bazi ngo inzoka ni mbi ngo yashutse Eva akora icyaha, twatangiye kubwira abantu ko iyo ari imyumvire idasobanutse ko n’iyo byaba byarabayeho bitavuze ko inzoka yose yabirenganiramo. Uyizanye rero cyangwa akaturangira aho ayibonye turamuhemba, tukayisubiza mu ishyamba.”

Yakomeje avuga ko abantu bakwiye guhindura imyumvire ntibice inyamaswa kuko aho batuye muri iki gihe, kera hahoze ari ahazo.

Yasobanuye ko inzoka zifite akamaro kuko zigabanya udusimba duto dushobora gukwirakwiza indwara, ubumara bwazo bukorwamo imiti, zihinduka ibyo kurya by’ibindi binyabuzima bikabaho neza kandi ziri mu nyamaswa zikoreshwa cyane mu bushakashatsi kuko zerekana ko hagiye kuba ihindagurika ry’ikirere.

Ati “Nka Nyiragongo buriya ijya kuruka, inzoka n’imiserebanya byabanje guhunga, kuko ibikururanda biri mu nyamaswa zumva mbere ko hagiye kuba impinduka mu gace runaka.”

Avuga ko kugeza ubu bamaze kwakira inzoka 15 z’amoko atanu atandukanye kandi izigera kuri 12 muri zo bazisubije muri Nyungwe, naho izindi eshatu zikiri kwitabwaho kuko basanze zifite ibibazo.

Mu gihe baba bazifite ziri kwitabwaho bazifashisha mu kwigisha abantu ko badakwiye kuzihohotera cyangwa ngo bazice.

Usibye inzoka hari izindi nyamaswa bakiriye zigera ku 100 zirimo inguge, inyoni z’amoko arindwi atandukanye n’izindi nyamaswa zirmo uruvu.

Dr Imanishimwe avuga ko inyamaswa yitwa ifuku nayo iri kugenda icika kuko bantu iyo bayibonye bayifata nk’iyona bagahita bayica, bityo bari gushaka uko bazayibungabunga kugira ngo itazazimira burundu.

Umuntu uzanye inzoka imwe ahabwa 1000 Frw nk’ishimwe kuko aba ayitabaye.

Mugendashyamba Emmanuel wamaze imyaka irenga 10 ari umuhigi muri Nyungwe, avuga ko nyuma yo kubireka yayobotse ibikorwa byo kubungabunga ibidukikije no kubyigisha abandi.

Ati “Abaturage bo muri aka gace bamaze gusobanukirwa agaciro k’urusobe rw’ibinyabuzima, izi nzoka mubona ni izo abaturage baba bakuye nko mu mirima y’ibyayi n’ahandi aho kuzica kabazituzanira kugira ngo tuzazisubize mu ishyamba.’’

Muri Nzeri 2020 umuturage witwa Nzamuturimana Innocent wo mu Murenge wa Buruhukiro mu Karere ka Nyamagabe, yahawe inka nk’ishimwe ryo kuba yarabonye inyamaswa y’ifumberi aho kuyirya akayishyikiriza umukozi w’Urwego rw’Igihugu rw’Iterambere, RDB.

Dr Imanishimwe yashimye abaturage batuye mu nkengero za Nyungwe kuko bamaze gusobanukirwa ibyiza byo kubungabunga urusobe rw’ibinyabuzima, abasaba kubikomeza.

Yavuze ko abantu n’inyamaswa bakwiye kugirana imibanire myiza, inyamaswa yava mu cyanya cyayo ikajya mu giturage bakayifata neza bakayisubizayo batayihutaje.

Imwe mu nzoka ziri kwitabwaho kugira ngo izajyanwe muri Nyungwe aho ishobora kuba itekanye
Umuntu uzanye inzoka ahabwa ishimwe kuko ayikuye aho ishobora guhurira n'ibibazo
Pariki y’Igihugu ya Nyungwe igizwe n’ishyamba ry’inzitane ribonekamo amoko atandukanye y'inyamaswa arimo n'ibikururanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .