00:00:00 IGIHE NETWORK KN KINYARWANDA EN ENGLISH FR FRANCAIS

Karongi: Ingo ibihumbi 90 zigiye guhabwa amashyiga arondereza ibicanwa

Yanditswe na Nsanzimana Erneste
Kuya 8 September 2022 saa 01:52
Yasuwe :

Abaturage bo mu Karere ka Karongi bishimiye ko bagiye guhabwa amashyiga ya ‘cana rumwe’ bavuga ko basanzwe bazi akamaro kayo ariko bari barabuze ubushobozi bwo kuyigurira.

Aya mashyiga agiye gutagwa hagamijwe gushyira mu bikorwa intego u Rwanda rwihaye yo kugabanya amashyiga ya gakondo akagera kuri 42% bitarenze 2024.

Inyigo yakozwe n’umuryango Rural Environment and Devepment Organisation (REDO) yagaragaje ko aho ayo mashyiga akoresha imyase umunani, amashyiga ya ‘cana rumwe’ akoresha imyase ine.

Nyirabihogo Donatille yabwiye IGIHE ko bazi akamaro ka ‘cana rumwe’ avuga ko impamvu batayakoresha ari uko babuze ubushobozi bwo kuyigura.

Ati "Ncana ku matafari atatu ya rukarakara kubera ubukene. Mfite ubushobozi bucye ntabwo nabona amashyiga agezweho ya rondereza.”

Umuyobozi w’Umuryango wita kubidukikije, REDO ari na wo uzatanga aya mashyiga, Dr Gashumba Jean Damascène, yavuze ko iri shyiga rya ‘cana rumwe’ rifatwa vuba kandi rikoroshya akazi ko guteka.

Ati "Umuntu ucanye ntabwo yongera kuba umugaragu w’umuriro, mu yandi mashyiga umuyaga uzimya umuriro ariko ‘cana rumwe’ umuyaga uraryatsa kurushaho. Ryongera isuku mu gikoni, ariko cyane cyane rigabanya ibicanwa. Ibicanwa bimaze kuba ikibazo ku gihugu".

Umuyobozi wungirije w’Akarere ka Karongi ushinzwe ubukungu n’iterambere, Niragire Théophile yavuze ko iyi gahunda izafasha akarere kubungabunga amashyamba macye gasigaranye.

Urugo ruzahabwa ‘cana rumwe’, ruzasabwa amatafari ane ya rukarakara, ingorofani y’umucanga munini n’ibase y’umucanga muto kugira ngo iri shyiga ryubakirwe ritazangirika vuba.

Ati "Abaturage bakwiye kugaragaza uruhare rwabo kugira ngo turebe ko baje gufashwa icyo bari bakeneye. Tubasaba kurikoresha neza kuko bashobora kuryubakirwa ntibarikoreshe, ntacyo byaba bimaze".

Mu rwego rwo kugabanya umwuka wa gaz carbonique uhumanya ikirere u Rwanda rwiyemeje kugabanya amashyiga ya gakondo akagera kuri 42% muri 2024, ubu rugeze kuri 61%.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .