Hateganyijwe imvura nyinshi mu Mujyi wa Kigali n’Intara y’Iburasirazuba mu mezi atatu ari mbere

Yanditswe na Ntabareshya Jean de Dieu
Kuya 24 Gashyantare 2021 saa 04:59
Yasuwe :
0 0

Ikigo cy’Igihugu cy’Ubumenyi bw’ikirere, Meteo Rwanda, cyatagaje ko imvura y’itumba izagwa mu mezi atatu ari imbere iri ku kigero cy’imvura isanzwe, ariko ikaziyongeraho gato mu Mujyi wa Kigali, Intara y’Iburasirazuba n’ibice by’Intara y’Amajyepfo.

Ibi Meteo yabitangaje ubwo yagaragazaga iteganyagihe ry’amezi atatu ari imbere. Ni ukuvuga Werurwe, Mata na Gicurasi aho imvura izakomeza kugwa mu bice bitandukanye by’Igihugu, ndetse hamwe iziyongera cyane ahandi igabanuke ugerereranyije n’uko yari isanzwe.

Meteo Rwanda ivuga ko ibice bigaragara ko bizagwamo imvura nyinshi ari ibyiganje mu Ntara z’Uburasirazuba n’Amajyepfo nko mu karere ka Nyamagabe n’Umujyi wa Kigali.

Mu bice by’Uburengerazuba byegereye ikiyaga cya Kivu birimo Akarere ka Rustiro, Ngororero, Rubavu na Karongi imvura y’Itumba izabanyuka ugereranyije n’imvura y’Itumba yari isanzwe.

Imvura y’Itumba biteganyijwe ko izatangira kugwa mu bice byinshi by’Igihugu muri Gashyantare 2021, dore ko hari ibice iteganyijwe ko yagombaga gutangirana hejuru y’amatariki ya 20, 27 mu gihe ibindi bisigaye izatangira kugwa nyuma ya taliki ya 6 Werurwe 2021.

Muri iri teganyagihe kandi hagaragaramo igice kinini cy’Igihugu cyose imvura izacikira rimwe kuko biteganyijwe ko izacika mu mpera za Gicurasi 2021, naho uduce duke turimo Musanze, Nyabihu na Rubavu biteganyijwe ko imvura izacika mu ntangiriro za Kamena.

Abitabiriye iki gikorwa banyuranye bagaragaje ko kuba Meteo Rwanda ibasha kugaragariza abafatanyabikorwa bayo uko ikirere kizaba cyifashe mu bihe runaka ari ingirakamaro.

Umuyobozi mukuru wungirije ushinzwe gusakaza ibyavuye mu bushakashatsi mu Kigo cy’Ubuhinzi n’Ubworozi mu Rwanda RAB, Dr Bucagu Charles, yagize ati “Kubona aya makuru biradufasha cyane ndetse na buri wese amenye uko azakora bigendanye ahanini n’uko iteganyagihe ribiteganya.”

“Abahinzi babasha kumenya ibyo bahinga bigendanye n’uko ikirere kimeze. Niba ahantu hazagwa imvura nyinshi, tumenya neza ko ibihingwa bidatinya imvura ari byo bikwiye guhingwa, cyangwa niba hazagaragara imvura nke tukabasha kubagenera ibihingwa byihanganira imvura nkeya.”

Yongeye kwibutsa abahinzi n’aborozi ko bakwiye kurushaho kwitabira ubwishingizi bw’ibihingwa n’amatungo mu bihe nk’ibi kugira ngo niba hanabayeho kwangizwa kw’ibyabo babashe kubikurikirana mu bwishingizi.

Umukozi Ushinzwe ibikorwa by’Ubutabazi muri Minisiteri ishinzwe Ibiza (Minema), Habinshuti Phillippe, yavuze ko kumenya neza aya makuru bibafasha mu igenamigambi ariko kandi bikanafasha abaturage kumenya neza ko bakwiye kwirinda ibijyanye n’ibiza byose.

Meteo Rwanda yashimangiye ko n’ubwo iri teganyagihe rifite umumaro ariko ibyateganyijwe bizaterwa ahanini n’uko ikigero cy’ubushyuhe kiri mu Nyanja ngari ya Pacifique n’iy’Abahindi kiri ku kigero gisanzwe; ariko ko hazakomeza gutangwa iteganyagihe ryunganira iri nk’uko byari bisanzwe bikorwa buri munsi.

Uko imvura izagwa hakurikijwe imiterere y’uturere

Imvura ifite milimetero hagati ya 350-450 izagwa mu mu Mujyi wa Kigali, Intara y’Iburasirazuba, ibice bimwe by’akarere ka Gicumbi, Rulindo, Amajyepfo ya Gakenke mu Ntara y’Amajyaruguru, ndetse na Kamonyi, Ruhango, Nyanza na Gisagara mu Majyepfo y’u Rwanda.

Imvura ifite ikigero cya milimetero hagati ya 400-450, izagwa Rutsiro, Rubavu, Ngororero na Karongi.

Iteganyagihe rya Meteo Rwanda rigaragaza ko hazagwa imvura ingana na milimetero 450 na 550 mu turere twiganjemo aka Gicumbi, Gakenke, Rulindo, Musanze, Burera mu Majyaruguru, naho Muhanga, Huye, Gisagara, Nyanza, Ruhango, Nyamagabe na Nyaruguru mu Majyepfo, ibice bya Rubavu na Rusizi mu Burengerazuba.

Imvura ifite ikigero kingana na milimetero 500-600, izagwa mu bice byegereye ishyamba rya Nyungwe nka Nyamagabe na Nyaruguru mu Ntara y’Amajyepfo, Nyamasheke na Rusizi mu ntara y’Uburengerazuba.

Biteganyijwe ko mu mezi atatu ari imbere hazagwa imvura nyinshi mu bice birimo Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .