Gukunda ibyo yize muri Kaminuza y’u Rwanda byamuhesheje kujya kubitangamo umusanzu muri Centrafrique

Yanditswe na IGIHE
Kuya 20 Kanama 2020 saa 11:40
Yasuwe :
0 0

Umunyarwanda Elisa Tumwesigye, warangije muri Kaminuza y’u Rwanda muri koreji y’ubumenyi n’ikoranabuhanga mu byerekeye kubungabunga urusobe rw’ibinyabuzima no kwita ku bidukikije, arishimira ko yatanze umusanzu we muri Repubulika ya Centrafrique abikesha gukunda ibyo yize no kugerageza kubikora, atangira ibikorwa bibyara inyungu birengera ibidukikije.

Tumwesigye yarangije Kaminuza mu 2014, ntabwo yahise abona akazi gahoraho, gusa yakundaga gukora imirimo itandukanye yerekeye kubungabunga ibidukikije no kwita ku rusobe rw’ibinyabuzima nk’uko yabyize.

Mu 2018 Ikigo cy’igihugu cy’Iterambere (RDB) cyaje kumuha amezi atandatu yo kwimenyereza umwuga, bimwongerera ubumenyi.

Muri uko kwimenyereza, yahabwaga ibihumbi 50 Frw buri kwezi yo kwifashisha. Yatangiye kujya akuraho make akayizigamira kugira ngo azayakoreshe yihangira umurimo mu byo yize. Amezi atandatu arangiye yaje kongererwa igihe bituma arushaho kwizigamira no kugira ubumenyi.

Ati “Nagiye mbikaho make kugira ngo nzatangire gushyira mu bikorwa ibyo nize nihangira umurimo kubera ko ntatekerezaga guhita mbona akazi.”

Nyuma y’iryo menyerezamwuga yaje kwihuza n’urundi rubyiruko bose hamwe bagera kuri 12 bashinga umuryango utegamiye kuri leta ugamije kwita ku rusobe rw’ibinyabuzima no kurengera ibidukikije witwa SAEB (Social Actions for Environment protection and Biodiversity conservation).

Batangiye gufatanya n’abaturage n’urubyiruko gutera ibiti by’imbuto ziribwa n’amashyamba no gushyira ubusitani mu bigo by’amashuri.

Ati “Intego kwari ugufasha urubyiruko n’abaturage guhanga imirimo ibyara inyungu ariko igamije kurengera ibidukikije. Bivuze ko iyo bafite ibikorwa bibazanira amafaranga bikabatunga, ntabwo bajya kwangiza amashyamba cyangwa ngo bajye mu buhigi.”

Abarenga 2000 bateye ibiti by’imbuto bigishwa gukora imirima y’igikoni

Tumwesigye yavuze ko yatangiranye n’urubyiruko rwo mu mashuri hirya no hino mu gihugu, aruhugurira kubaka imirima y’igikoni no gutera ibiti by’imbuto mu bigo byabo bikarangira bagiye no kubikora mu ngo zabo.

Uretse kurwanya imirire mibi, ibyo biti by’imbuto byinjirizaga amafaranga urubyiruko n’abandi baturage babikora. Ni mu gihe kandi biri mu murongo wa Guverinoma wo kugira umurima w’igikoni n’ibiti by’imbuto nibura bitatu kuri buri muryango.

Ati “Niba abana bateye ibinyomoro, avoka, indimu cyangwa imyembe, ni ibintu bishobora kubazanira amafaranga bakaba bakwigurira n’ibikoresho by’ishuri cyangwa ibindi.”

Yavuze ko abanyeshuri barenga 2000 bahuguwe kandi bagatera ibiti by’imbuto bitandukanye birimo; ibinyomoro, imyembe, orange n’ibindi bishobora kubunganira mu mirire kandi bikabazanira inyungu y’amafaranga.

Muri rusange ngo bateye ibiti by’imbuto birenga 6000 mu ngo zabo no mu bigo by’amashuri mu bice by’icyaro mu Karere ka Gasabo.

Uko yagiye gutanga umusanzu muri Centrafrique

Mu Ukuboza 2018, Ambasade ya Leta Zunze Ubumwe za Amerika mu Rwanda ku bufatanye n’Ikigo cy’Indashyikirwa mu micungire y’ibinyabuzima n’umutungo kamere kibarizwa muri Kaminuza y’u Rwanda (Center of Excellence in Biodiversity conservation and Natural Resources management), yazanye urubyiruko 10 rwa Centrafrique kwigira ku Rwanda ibijyanye no kubungabunga urusobe rw’ibinyabuzima no kwita ku bidukikije.

Abo baje guhuzwa n’abandi banyarwanda 12 barimo Tumwesigye. Nyuma yo gusoza urugendo rwabo mu Rwanda, baje kumutumira kugira ngo ajye kubunganira mu guhugura abantu bo muri icyo gihugu.

Mu mpera za 2019 yerekeje muri Centrafrique ku nkunga ya Kaminuza y’u Rwanda na Ambasade ya Amerika muri Centrafrique.

Ati “Kubera ko ari igihugu cyazahajwe n’intambara, kwita ku bidukikije nta mwanya bihabwa cyane. Nabahuguye kureka guhiga inyamanswa. Twabubakiye ubuhumbikiro bw’imboga n’iz’ibiti by’imbuto n’ibiti bisanzwe bazajya bifashisha mu gutunganya amakara babikora nk’ubucuruzi.”

Urubyiruko rwahuguwe muri Centrafrique rwateye ibihumbi 21 by’ibiti by’imbuto ziganjemo avoka, ibinyomoro, amatunda, orange, amapapayi n’ibindi biti bisanzwe byo kubungabunga amashyamba.

Hashinzwe amatsinda (Clubs) y’urubyiruko yo kwita ku bidukikije agera kuri arindwi rimwe rigizwe n’abantu 50 hashingwa n’imiryango 11 y’abahoze ari abahigi yiyemeza kurengera ibidukikije.

Umuyobozi w’Ikigo cy’Indashyikirwa mu micungire y’ibinyabuzima n’umutungo kamere kibarizwa muri Kaminuza y’u Rwanda, Professor Beth Kaplin, yavuze ko Tumwesigye ari urugero rwiza rwerekana ko urubyiruko rwo mu Rwanda rugeze ahashimishije mu kubungabunga ibidukikije, ibyo bizatuma ruhanga imirimo urundi rukayibona mu miryango yita ku bidukikije no kurengera urusobe rw’ibinyabuzima.

Kuri ubu Elisa Tumwesigye akomeje ibikorwa byo kwita ku bidukikije no kubungabunga urusobe rw’ibinyabuzima mu Rwanda nyuma yo kuva gutanga umusanzu muri Repubulika ya Centrafrique.

Abaturage bakanguriwe gutera ibiti kandi bibinjiriza amafaranga
Gutera ibiti biri muri gahunda ya leta yo kugira nibura ibiti by'imbuto bitatu ku muryango
Intego ya Tumwesigye ni ugufasha urubyiruko n’abaturage guhanga imirimo ibyara inyungu ariko igamije kurengera ibidukikije
Ibiti biterwa birimo n'iby'imbuto nk'ibinyomoro n'izindi
Abana bigishwa inyungu ziri mu gutera ibiti bakanabitozwa
Tumwesigye arimo guhugura abanya-Centrafrique ku byiza byo kubungabunga ibidukikije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .