#GumaMuRugo: Imyuka ihumanya ikirere yagabanutseho 24% i Kigali

Yanditswe na Ishimwe Israel
Kuya 3 Gicurasi 2020 saa 02:41
Yasuwe :
0 0

Umwuka mwiza uri mu by’ingenzi umuntu akenera mu buzima bwe ngo abeho neza! Ibi bituma ingaruka ziterwa n’imyuka ihumanya ikirere iza ku isonga mu bihangayikishije Isi. U Rwanda ruri mu bihugu byafashe ingamba zigamije kubungabunga ikirere hirindwa gukwirakwiza imyuka ihumanya ikirere.

Ni inzira itoroshye cyane ko inyigo iheruka gukorwa n’Ishami ry’Umuryango w’Abibumbye ryita ku Buzima, OMS, ku bijyanye n’ubuziranenge bw’umwuka yagaragaje ko abaturage bangana na 92% baba mu duce tubonekamo ihumana ry’ikirere ryo ku rwego rwo hejuru.

Imibare igaragaza ko buri mwaka abantu miliyoni zirindwi bicwa n’indwara zituruka ku guhumana kw’ikirere.

Ubwiyongere bw’abaturage n’abatura mu mijyi yo mu Rwanda biri mu byongera imirimo ituma habaho n’imyuka yoherezwa mu kirere irimo ishobora kuva imbere mu nzu no hanze yazo.

Mu byangiza ikirere harimo impamvu kamere nk’iruka ry’ibirunga, ibikorwa bya muntu, ibinyabiziga bikoresha mazutu bisohora imyuka ihumanya ikirere. Muri make, ibyangiza ikirere bishobora kuba imyuka iboneshwa amaso n’itaboneshwa amaso.

Muri iki gihe hafashwe ingamba zikomeye zigamije kwirinda icyorezo cya COVID-19 giterwa n’agakoko gashya ka Coronavirus, ibihugu byinshi byafashe ingamba zanatumye imyuka ihumanya ikirere igabanuka.

Mu Rwanda, ku wa 21 Werurwe 2020, nibwo hafashwe icyemezo cyo guhagarika ibikorwa bitari iby’ingenzi ndetse abaturage bategekwa kuguma mu rugo.

Ni icyemezo cyagize ingaruka ku bukungu bw’igihugu n’imibereho y’abagituye ariko kiba inyungu ku kirere cyongeye gusubirana umwimerere wacyo.

Dr Kalisa Egide, Umwarimu muri Kaminuza y’u Rwanda, Ishami ry’Ubumenyi n’Ikoranabuhanga akaba n’Umushakashatsi mu Kigo cy’Igihugu cy’Ibidukikije, REMA, ku bijyanye no kureba ibitera imyuka yanduza ikirere n’uburyo bwo kuyirinda, yabwiye IGIHE ko ihagarikwa ry’ingendo n’ibikorwa by’inganda byagize uruhare mu kugabanya imyuka ihumanya ikirere.

Mu Rwanda, ibinyabiziga birimo imodoka na moto n’ibicanwa nk’inkwi n’amakara biza ku isonga mu guhumanya ikirere.

Dr Kalisa Egide avuga ko “Usanga mu bihugu biri mu nzira y’amajyambere byugarijwe n’imyuka ihumanya ikirere iterwa cyane n’imyuka iva ku modoka, gutekesha inkwi n’imyotsi y’amakara ndetse n’ibindi.’’

Mu gihe cyo kubahiriza gahunda ya Guma mu rugo, bitewe nuko imwe mu mirimo n’ingendo byahagaze, byatumye imyuka ihumanya ikirere igabanuka.

Mu Rwanda imyuka ihumanya ikirere iterwa na PM2.5 [utuvungukira duto cyane tungana n’umurambararo wa 2.5 dushobora kwinjira mu bihaha tugatera indwara] ari nayo ihangayikishije Isi, yaragabanutse.

Ibipimo byafashwe mu minsi 35 y’ibihe bya Guma mu rugo byerekana ko igabanuka ry’imyuka ihumanya ikirere ryagaragaye mu Ruhango (-28%), Kigali (-24 %), Rubavu (-15 %), Rusizi (-14 %), Nyagatare (-13%), Nyabihu (-11%) na Kirehe (- 4%) mu gihe Kawangire [mu Burasirazuba] yo yazamutseho 19%.

Imyuka ihumanya ikirere yagabanutseho 24% muri Kigali, i Kawangire izamukaho 19%. Ruhango ni yo iri imbere kuko yazamutseho 28%

Dr Kalisa yavuze ko ubwiyongere bw’imyuka ihumanya ikirere muri Kawangire bushingiye ku kuba aka gace k’icyaro kabonekamo imyuka iva mu gucana no gutwika isanzwe ariyo yiganje mu ihumanya ikirere.

Ati “Muri ako gace ibi bikorwa ntibiri mu byahagaze mu gihe cya COVID-19.’’

Asobanura impamvu mu Karere ka Ruhango habonetse igabanuka ryo hejuru, yagize ati “Ubusanzwe aho ibipimo byafatiwe ni mu Byimana ku muhanda wa Kigali-Huye. Ni umwe mu mihanda igendwa cyane mu Rwanda ariko muri iki gihe ingendo zikorwa mu ntara ni nke. Mu Rwanda umwuka waho ni mwiza ugendeye ku bipimo mpuzamahanga, intara zose zifite umwuka mwiza ugereranyije na Kigali.’’

Mu Mujyi wa Kigali aho igabanuka ry’imyuka mu kirere ryageze kuri 24% bijyanye no kuba hari ibikorwa byinshi byahagaze nk’ingendo z’ibinyabiziga, ubwubatsi, n’ibindi.

Dr Kalisa akomeza avuga ko “U Rwanda ruri mu bihugu byashyizeho ingamba zikomeye mu kurwanya imyuka ihumanya ikirere REMA ifite sitasiyo zitandukanye zifata ibipimo by’imyuka ihumanya ikirere muri Kigali no mu turere dutandukanye tw’igihugu.”

Igihugu kandi cyanatangije ikoreshwa rya moto n’imodoka zifashisha amashanyarazi zidasohora umwuka uhumanye no kunoza ubwikorezi rusange hagabanywa imodoka zishaje ziganje mu zohereza imyuka ihumanya cyane ikirere hifashishijwe igenzurwa ry’ibinyabiziga bisohora imyuka yangiza ikirere.

Mu yindi mijyi ku Isi, ibipimo ku myuka ihumanya ikirere byerekana mu gihe cy’ibyumweru bitatu bya Guma mu rugo, Londres yagize igabanuka rya 9%, New York (-25%), Los Angeles (-32%), Madrid (-11%), Sao Paulo (-32%), Wuhan (-44%), Delhi (-60), Mumbai (-34%) na Rome yiyongereyeho 30% .

Ishusho yuko gahunda ya Guma mu rugo yagabanyije imyuka ihumanya ikirere mu mijyi itandukanye ku Isi

Ubushakashatsi bwamuritswe na REMA mu 2017 bwagaragaje ko 95,2% y’imodoka ziri mu Rwanda zimaze imyaka irenga 10 zikozwe; 56,6 % ni iza mbere yo mu 1999 naho 77,2% zakozwe mbere ya 2000.

Minisiteri y’Ubuzima igaragaza ko buri mwaka mu mavuriro hakirwa miliyoni eshatu z’abivuza indwara z’ubuhumekero barimo 13% bazitewe n’ihumana ry’ikirere.

Amafoto yafashwe na Dr Kalisa agaragaza imiterere y'ikirere cyo mu Mujyi wa Kigali mu myaka ibiri itandukanye n'uko cyagiye gicya kikaba ubururu
Ikirere cy'i Remera hafi ya Stade Amahoro kiracyeye bigaragarira amaso
Sitasiyo y'Ikigo cy'Igihugu cy'Ibidukikije (REMA) ahagenzurirwa imyuka ihumanya ikirere
Rema ifite sitasiyo zigera ku 10 mu gihugu cyose zipima ibijyanye n'imyuka ihumanya ikirere
Dr Kalisa Egide ni Umwarimu muri Kaminuza y’u Rwanda, Ishami ry’Ubumenyi n’Ikoranabuhanga akaba n’Umushakashatsi mu Kigo cy’Igihugu cy’Ibidukikije, REMA, ku bijyanye no kureba ibitera imyuka yanduza ikirere n’uburyo bwo kuyirinda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .