Turahirwa washinze ’Moshions’ yagizwe Ambasaderi wa PSG

Yanditswe na Uwiduhaye Theos
Kuya 15 Mutarama 2020 saa 09:24
Yasuwe :
0 0

Moses Turahirwa ufite inzu ihanga imideli yitwa Moshions, yagizwe Ambasaderi w’Ikipe y’umupira w’amaguru yo mu Bufaransa, Paris Saint Germain [PSG] nyuma y’aho isinyaniye amasezerano y’imikoranire n’u Rwanda.

Uyu musore yinjiye mu mikorere na PSG biturutse ku masezerano u Rwanda ruherutse kugirana n’iyi kipe yo kujya yambara imyambaro yanditseho amagambo ‘Visit Rwanda’ mu rwego rwa kwamamaza ubukerarugendo bw’u Rwanda no kumenyekanisha ibindi byiza bitatse igihugu.

Yanditse kuri Instagram agaragaza ko yishimiye kuba ari umwe mu batoranyijwe, ashimira RDB na Visit Rwanda kuba ariwe bahisemo.

Ati “Ntewe ishema n’ibyaranze impera z’icyumweru bidasanzwe hamwe na ALL - Accor Live Limitless na PSG ndetse nishimiye gutoranywa nk’umwe mu bagiye kuba aba Ambasaderi babo. Ndashimira cyane RDB na Visit Rwanda ku buranga bankoreye. »

Turahirwa yaratoranyijwe biturutse ku Kigo cy’Igihugu cy’Iterambere, RDB, cyamuhaye PSG na ALL nk’umwe mu banyarwanda bamaze kwiteza imbere kandi bafite izina rikomeye mu Rwanda mu ruhango rw’imideli.

Uyu musore mu mpera z’icyumweru gishize yagiye mu Bufaransa mu ifatwa ry’amashusho azajya hanze mu minsi iri imbere yo kwamamaza iyi kipe ndetse na Sosiyete ya ALL.

Ubufatanye bwa PSG na RDB buzafasha abakurikirana iyi kipe n’Isi muri rusange kumenya ubwiza bw’u Rwanda, umuco n’udushya twaruhangwamo kimwe n’ibicuruzwa birukorerwamo.

Nk’uko bikubiye mu masezerano y’impande zombi, ikirango cya Visit Rwanda kigaragazwa kuri Stade ya Parc des Princes aho PSG yakirira imikino yayo ndetse no ku mugongo ku myenda iyi kipe ikoresha mu myitozo no mu gihe cyo kwishyushya mbere y’imikino ya Shampiyona.

U Rwanda rwiteze ko binyuze muri ubu bufatanye, abakinnyi ba PSG n’ibindi byamamare mpuzamahanga, bizabafasha gusura u Rwanda, bakabona ibyiza bitatse igihugu cy’imisozi igihumbi uhereye ku bijyanye n’ubugeni, umuco, siporo, muzika, ubukerarugendo, amafunguro n’ubwiza bw’igihugu muri rusange.

Ikindi ni uko icyayi cy’u Rwanda n’ikawa aribyo byonyine bizajya bitangwa kuri Parc des Princes mu mwaka utaha w’imikino.

Hazajya habaho kandi icyumweru cy’imishinga y’abanyempano b’Abanyarwanda n’Abafaransa. Icyo cyumweru cyiswe “Semaine du Rwanda à Paris” kizajya gitegurwa na PSG mu kumenyekanisha ibintu byose bikorerwa mu Rwanda.

Paris Saint Germain ni imwe mu makipe akomeye ku Isi, aho ikinamo Umunya-Brésil Neymar waciye agahigo ko kuba umukinnyi uhenze mu mateka ya ruhago ubwo yagurwaga avuye muri FC Barcelone mu 2017.

Mu mpera z'icyumweru gishize, Turahirwa yari kuri Stade ya PSG
Uyu musore yagiye mu Bufaransa mu Cyumweru gishize
Turahirwa ni umwe mu bahanzi b'imyambaro bamaze kubaka izina mu Rwanda
Turahirwa Moses yagiye yambika abantu bakomeye barimo n'Umuryango w'Umukuru w'Igihugu
Ibyishimo byari byose kuri Turahirwa na bagenzi be bahuriye mu Bufaransa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza